ამ მოთხოვნით საკრებულოს წევრებმა თავმჯდომარეს წერილობით მიმართეს. თავის მხრივ, მურად შამათავა აცხადებს, რომ არ აპირებს ამ მოთხოვნის დაკმაყოფილებას.
“წერილით, რომელიც საკრებულოს წევრებმა კანცელარიაში წარადგინეს, ჩემს გადადგომას ითხოვენ, თუმცა მე არ ვაპირებ მათი მოთხოვნის გათვალისწინებას და თანამდებობიდან გადადგომას,” _ აცხადებს მურად შამათავა.
სენაკის საზოგადოების ერთი ნაწილი მიიჩნევს, რომ რაიონში სიტუაცია უმართავი გახდა. ამ აზრს იზიარებენ არასამთავრობო ორგანიზაცია “ქალთა კავშირი _ ქალები მშვიდობისა და სამართლიანობისთვის” წევრებიც, სწორედ ამიტომ, ორგანიზაციის ერთ-ერთმა დამფუძნებელმა ინგა ქარდავამ საქართველოს პრემიერს ბიძინა ივანიშვილს საგანგებო მიმართვა გაუგზავნა, რომელსაც უცვლელად გთავაზობთ:
“საქართველოს პრემიერ-მინისტრ ბიძინა ივანიშვილს;
ბატონო პრემიერო, კიდევ ერთხელ მოგმართავთ თხოვნით მიხედოთ სენაკის რაიონს, სადაც საერთო მდგომარეობა არის დაძაბული და ამ სიტუაციას მართავენ ერთეულები, რომელსაც სათავეში უდგას სენაკის მაჟორიტარი დეპუტატი გურამ მისაბიშვილი. მისი მიზანია ადგილობრივ ხელისუფლებას მოაშოროს ის ძალები, რომლებიც მთელი 9 წლის განმავლობაში ებრძოდნენ მიხეილ სააკაშვილის სისხლიან რეჟიმს. სწორედ მისი დირექტივებითა და უშუალო მითითებით სენაკის რაიონის საკრებულოს 19 წევრს დაევალა იმპიჩმენტი გამოუცხადონ კოალიციიდან ერთხმად არჩეულ საკრებულოს თავმჯდომარეს მურად შამათავას. ჩემი ინფორმაციით ზუსტად ანალოგიური სიტუაციაა აბაშისა და მარტვილის რაიონებში. გარდა საკუთარი რაიონისა სიტუაციას სხვა ორ რაიონშიც ხელოვნურად მართავს ბატონი მისაბიშვილი, რომელსაც მხარს უჭერენ პარლამენტარებიც.
ჩემივე ინფორმაციით, გურამ მისაბიშვილს მხარს უჭერს ე.წ არალეგიტიმური “ქართუ ჯგუფში“ არსებული პოლიტსაბჭო, რომელსაც ხელმძღვანელობენ მალხაზ მჭედლიშვილი და ირაკლი მელაშვილი. თითოეული ფაქტი, თანამდებობებზე დანიშვნა სწორედ რომ ამ ადამიანების მეშვეობით წყდება, რაც თვითმმართველი სტრუქტურების საქმიანობაში უხეშ ჩარევად აღიქმება. ყოველივე ეს კი იწვევს საზოგადოებაში ახალი ხელისუფლების მიმართ უნდობლობის გაღვივებას. სამეგრელო კი თავის მხრივ სპეციფიკური რეგიონია, რომელიც მსგავს მეთოდებს ყოველთვის მტკივნეულად აღიქვამს.
ბატონო პრემიერო!
მინდა გთხოვოთ კიდევ ერთხელ, რომ ზედმიწევნით მოიკითხოთ სამეგრელოში, კერძოდ კი სენაკში, აბაშასა და მარტვილის რაიონში მიმდინარე მოვლენები და ზემოთ ნახსენებ დეპუტატებსა და მაღალი თანამდებობის პირებს მოუწოდოთ ნუ ჩაერევიან მუნიციპალური თვითმმართველობების საქმიანობაში. ჩვენ გვჯერა თქვენი და ღრმად გვწამს იმის, რომ ის პრობლემები, რაც ზემოთ იყო ნახსენები ისევ თქვენი დახმარებით მოკლე ხანებში მოგვარდება.
პატივისცემით ინგა ქარდავა, არასამთავრობო ორგანიზაცია “ქალთა კავშირი _ ქალები მშვიდობისა და სამართლიანობისთვის”
განცხადების გაცნობის შემდეგ ჩვენ დავუკავშირდით პარტიის “ქართული ოცნება _ დემოკრატიული საქართველოს” აბაშის რაიონული პარტიის თავმჯდომარეს გიორგი გვილავას.
_ მიმართვაში, რომელიც ინგა ქარდავამ პრემიერს გაუგზავნა, ნათქვამია: “მინდა გთხოვოთ კიდევ ერთხელ, რომ ზედმიწევნით მოიკითხოთ სამეგრელოში, კერძოდ კი სენაკში, აბაშასა და მარტვილის რაიონში მიმდინარე მოვლენები”. რა ხდება აბაშაში?
_ ამ მიმართვას მეც გავეცანი, მაქვს ჩემი მოსაზრებებიც, სენაკში რა ხდება არ ვიცი, მაგრამ განცხადებიდან გამომდინარე აბაშაში ანალოგიური სიტუაცია ნამდვილად არ არის, მაგრამ ახლა არაფერს ვიტყვით, გპირდებით რომ ორ-სამ დღეში გავაკეთებ კომენტარს და სრულად მოგახსენებთ აბაშაში შექმნილ ვითარებას.
