ამის შესახებ კომისიის თავმჯდომარემ, ნოდარ ებანოიძემ “გურია ნიუსთან” საუბრისას განაცხადა.
მისი თქმით, ბეჟაშვილი შეიძლება ანგარიშს ბოდვას უწოდებდეს, თუმცა, მისი საქმიანობა კონტროლის პალატაში კოშმარი იყო, არა მხოლოდ უწყებისთვის მთელი ქვეყნისთვის. ებანოიძის განცხადებით, აუდიტის სამსახურის არსებობის ისტორიაში, პირველად დაიდო რეალური სურათი იმისა, თუ რას საქმიანობდა ეს უწყება და რაში იხდიდა სახელმწიფო ფულს. მისივე თქმით, რომ არა კომისიის დასკვნა, ბევრი რამ ამ დრომდე გაურკვეველი დარჩებოდა. ის ერთგვარ აღიარებად მიიჩნევს იმ ფაქტს, რომ კონტროლის პალატის რიგმა თანამშრომლებმა პრემირებული თანხების უკან დაბრუნება დაიწყეს. ებანოიძე მიიჩნევს, რომ აუდიტის სამსახური ქვეყნის გამართული მუშაობისთვის უმნიშვნელოვანესი უწყებაა და კომიტეტში ამ სამსახურში ხელფასების ზრდას დაუჭირა მხარი, იმისთვის რომ სისტემა უფრო სამართლიანი და ფუნქციონირებადი გახდეს.
“ბოდვას რატომ ეძახის დასკვნას, ნამდვილად არ ვიცი, მაგრამ მას, რაც მან იმუშავა აუდიტის სამსახურში, ბოდვას არა მაგრამ, კოშმარს ნამდვილად დავარქმევდი, ჩვენი ქვეყნისთვის და აუდიტის სამსახურისთვის. ის შედეგები, რა შედეგებიც გამოჩნდა, სწორედ ასახავდა იმას, რომ ჩვენ ფული დავხარჯეთ ისეთი სამსახურის შექმნაზე, რომელსაც ქვეყნისთვის არავითარი სიკეთე არ მოქონდა. პირიქით _ რა მოვალეობაც ჰქონდა, საპირისპიროდ აკეთებდა ყველაფერს. რაც შეეხება ჩვენს ანგარიშს, ის მომავალ სასესიო კვირაში გავა. იმ დროს, როცა პარლამენტის სხდომაზე გამოვა აუდიტის სამსახურის 2012 წლის საქმიანობის ანგარიში, რომლის წარმოდგენაც მას კანონისმიერად მოეთხოვა. ასეთი კომისიები იქმნება იმისთვის, რომ შეაფასონ კონკრეტული წრის საქმიანობა. ბუნებრივია ის მოცემულობები, რაც არის აღნიშნულ ანგარიშში, ამის მიხედვით დეპუტატებს არ გაუჭირდებათ შესაბამისი შეფასების გაკეთება _ რა თქმა უნდა, ანალიზის უნარი არავის აკლია. ეს ანგარიში სესიაზეც იქნება წარმოდგენილი. ის შედეგები, რომელი შედეგებიც ასახულია ანგარიშში, კიდევ ვიტყვი, რომ ძალიან მძიმეა. აუდიტის სამსახურის შემოწმების ისტორიაში პირველად დაიდო რეალური სურათი. რეალური სურათის დადება ნიშნავს იმას რომ, ის დოკუმენტი, რომელიც ბეჟაშვილს ბოდვად მიაჩნია, უნდა გახდეს იმის საფუძველი, რომ ისეთი კოშმარი აღარ იყოს იმ სამსახურში, რომელიც ჩვენ დაგვხვდა. ყველა ნაბიჯზე იგრძნობა, რომ მაშინდელი ხელისუფლების ხელში ეს იყო სათამაშო იარაღი, რომელიც საკამაოდ მძიმედ ისროდა და რომელიც ბევრ ადამიანს მძიმე მდგომარეობაში აყენებდა. ამიტომ მე ვფიქრობ, ჩვენ გამოვალთ პარლამენტის სხდომაზე და გამოვიტანთ ამ შედეგებს. რატომ აბრუნებენ ზოგიერთები უკან პრემირებულ თანხებს? დააბრუნეს რიგმა თანამშრომელებმა, მათ შორის გურიის ვიცე გუბერნატორმა. რომ არა ჩვენი კომისია, დააბრუნებდნენ? რისი აღიარებაა ეს? ბევრი რამაა ამ დასკვნაში ისეთი, რომელიც ვერ დავწერეთ იმის გამო, მტკიცებულებები არ გვქონდა. მე ვიცი აუდიტის სამსახურის ბევრი თანამშრომელი, რომლებიც სამსახურებში არ დადიოდნენ და პრემიებს იღებდნენ. ამის შესახებაც განვაცხადებ სხდომაზე. თვითონ ხომ უკეთ იციან, რა მდგომარეობაში ჩააყენეს ქვეყანა? მე ბატონმა ლევანმა მისი ოჯახის წევრზე მითხრა, რომ ისინი მასალის წაკითხვის შემდეგ მძიმე დღეში აღმოჩნდნენ. არავის მძიმე დღეში აღმოჩენა არ მინდა, მაგრამ ბატონი ლევანი და სხვები, სხვების დედებს სახლებიდან ყრიდნენ,” _ თქვა საპარლამენტო კომისიის თავმჯდომარემ, ნოდარ ებანოიძემ “გურია ნიუსთან” საუბრისას.
შეგახსენებთ, რომ საპარალამენტო კომისიამ, რომელიც კონტროლის პალატის გასული წლების საქმიანობებს შეისწავლიდა, ამ უწყების შესახებ ანგარიში მოამზადა, რომელშიც ბეჟაშვილის ყოფილი უწყების ბევრ კანონდარღვევით გატარებულ საქმიანობაზეა საუბარი. არ არის გამორიცხული, ამ ანგარიშით პროკურატურაც დაინტერესდეს.
