პირველი ვარჯიში უკვე მწვრთნელმა და ბავშვებმა ახალ ლეიბზე და ახალ დარბაზში უკვე ჩაატარეს.
შენობა მუნიციპალიტეტის ააიპ საფეხბურთო სკოლას ეკუთვნის.
მინდია დვალიშვილი, ააიპ “ლანჩხუთის მუნიციპალიტეტის სპორტული სკოლის” დირექტორი: “ორ ათეულ წელზე მეტია ლანჩხუთის რაიონი მოკლებულია ამ სიამოვნებას, ჩამოტანილია საჭიდაო ლეიბები და მისი გადასაფარებელი ხალიჩა, რომელიც ლანჩხუთის მაჟორიტარ დეპუტატის ძალისხმევით, ჭიდაობის ეროვნულ პრეზიდენტთან შეთანხმებით, გურული წარმოშობის ოლიმპიურმა ჩემპიონმა ვახტანგ ბლაგიძემ უსასყიდლოდ გადმოსცა სპორტულ ცენტრს. გაკეთდა საშვილიშვილო საქმე _ 100-მდე სპორტსმენი, რომლებიც ვარჯიშობდნენ ყოფილი ბიბლიოთეკის შენობაში, ძალიან მცირე დარბაზში, სადაც ვერ ახერხებდნენ ფაქტიურად ნორმალურ წვრთნას, ამჯერად გადმოვიდნენ ახალ შენობაში. ეს ფართი ეკუთვნის ააიპ “საფეხბურთო სკოლას”, ჩვენ ვთხოვეთ მის ხელმძღვანელს დურმიშხან ჩხაიძეს მიეცა უფლება, აქ ჩაგვეტარებინა წვრთნა, რაზეც ის დაგვთანხმდა. დარწმუნებული ვარ, ახალგაზრდა სპორტსმენები კიდევ ბევრ წარმატებას მიაღწევენ, რაც აქამდეც არ აკლდათ _ 6 თვის განმავლობაში 11 საერთაშორისო ტურნირში მიიღეს მონაწილეობა საქართველოს მასშტაბით და უამრავი მედლები აქვთ აღებული. ამ ხალიჩაზე გაწვრთნილი ბავშვები მომავალში უფრო დიდ შედეგებს გვაჩვენებენ.
გადავწყვიტეთ, ამ დღეებში ჩამოვაყალიბოთ ჭიდაობის კლუბი და დავარქვათ ვახტანგ ბლაგიძის სახელი _ ეს იმ დიდი საჩუქრისთვის, რაც მან ლანჩხუთის მუნიციპალიტეტის სპორტულ ცენტრს გაუკეთა. 115 ცალი ლეიბია და ორი გადასაფარებელი, რისი ღირებულებაც, დაახლოებით, 10-15 ათას ლარს შეადგენს.”
დურმიშხან ჩხაიძე, ლანჩხუთის ააიპ საფეხბურთო სკოლის დირექტორი: “როდესაც ვნახე, სად ვარჯიშობდნენ ეს ბავშვები, გავვოცდი _ ჩემი თვალით ვნახე მკვდარი მორიელი. მოვიდნენ აქ, ივარჯიშონ _ ამ ბავშვებს ვინ შეუშლის ხელს? თუ სურვილი ექნებათ, სპორტის სხვა სახეობის ბავშვებიც მოიყვანონ. მეამაყება, რომ ჩვენ პატარა რაიონში მცირე რაღაც გავაკეთეთ. თუ ამ შენობასაც გაარემონტებენ, მაგაზე უკეთეს საქმეს ვერ გააკეთებენ. ჩემი თავი ენაცვალოთ ოზურგეთელებს _ არაჩვეულებრივი დარბაზი აქვთ, ტურნირების ჩატარება როცა მინდა, მათგან ვთხოულობ. აქაც უნდა იყოს ერთი კარგი დარბაზი. დაპირებები არის, თანაც არაერთგზის და იმედია, ერთხელ მაინც შესრულდება.”
ზვიად აფხაზავა, მუნიციპალიტეტის საკრებულოს თავმჯდომარის მოადგილე: “ლანჩხუთი ცნობილია იმით, რომ სპორტს დიდ მნიშვნელობას ანიჭებენ. აუცილებელია, ჯანსაღი ცხოვრების წესის დანერგვა როგორც მოზარდ თაობაში, ისევე ახალგაზრდებში. თუ საშუალო ასაკის მოქალაქეებიც შემოგვიერთდებიან, მისასალმებელი იქნება. რაც შეეხება ჩვენს როლს, ვეცდებით, ყველანაირად გავაგრძელოთ ამ მიმართულებით მუშაობა და საქმისადმი ხელშეწყობა.”
