სხდომა ღია იყო და ამიტომაც სხდომაზე დასწრების სურვილი ჟურნალისტებმა და არასამთავრობო ორგანიზაციების წარმომადგენლებმაც მოისურვეს, თუმცა, შემდეგ გამოცხადდა საგანგებო მდგომარეობა და სხდომა დაიხურა.
დღევანდელ სხდომაზე სავარაუდოდ საკრებულოს თავმჯდომარის, მურად შამათავას გადადგომის საკითხი უნდა განიხილონ.
ჩვენ ტელეფონით დაგვიკავშირდა არასამთავრობო ორგანიზაცია “ქალთა კავშირი _ ქალები მშვიდობისა და სამართლიანობისთვის” ერთ-ერთი დამფუძნებელი ინგა ქარდავა, რომელიც ამ წუთებში, მოთხოვნის მიუხედავად, სხვა არასამთავრობოებთან ერთად არ ტოვებს სხდომათა დარბაზს.
ინგა ქარდავა: “საკრებულოს მოვალეობის შემსრულებელმა ზურაბ ხაბურზანია ისევ წინააღმდეგია სხდომა ღიად ჩატარდეს და მას არასამთავრობოები და ჟურნალისტები დაესწრნონ. მიუხედავად ამისა, არასამთავრობოები და დამსწრე საზოგადოება საკრებულოს სხდომათა დარბაზს არ ტოვებს. ხაბურზანიამ დაარღვია კანონი, პროცესუალური ნორმები და საკრებულოს წევრების უკითხავად, სხდომა 14 საათამდე გადადო. მე ადრეც გავაჟღერე, თუ რას აპირებდნენ დღევანდელ სხდომაზე. რა საგანგებო მდგომარეობაა ისეთი, სხდომა რომ დახურეს _ იქნებ ომი დაიწყო და ჩვენ არ ვიცით? საკრებულოში იმყოფებიან სენაკის პოლიციის უფროსი, მისი მოადგილეები და პოლიციელები, ჩამოსული არიან სამხარეო ადმინისტრაციიდანაც. საკმაოდ დაძაბული მდგომარეობაა. მურად შამათავა დიაბეტიანია და კომაში ჩავარდა. დღევანდელ სხდომას ის დეპუტატებიც კი ესწრებიან, რომლებიც არასდროს უნახავთ სხდომაზე. ვაცხადებ, არ დავთმობთ, არ დავტოვებთ დარბაზს, ნაციონალებს და მისაბიშვილის კლანს არ გავატანინებთ თავისას. გაიგონ ერთხელ და სამუდამოდ _ დამთავრდა მაგათი უკანონო ქმედებები. ჩვენ არ გამოვალთ დარბაზიდან, არ მივცემთ არავის იმის უფლებას, სენაკში ისევ “კანონიერმა ქურდებმა” გადაგვიწყვიტონ საქმე. ჟურნალისტები გარეთ არიან, ვერ შემოდიან, აქ მხოლოდ რამდენიმე არასამთავრობოს წარმომადგენელი ვართ. მიაწვდინეთ ხმა პრემიერს და ირაკლი ღარიბაშვილს _ ალაგმონ ეს უკანონობა.”
ამ წუთებში საკრებულოს სხდომა განახლდა, თუმცა, ხმაური არ ცხრება _ არასამთავრობოებმა, მოთხოვნის მიუხედავად არ დატოვეს, დარბაზი.
