ჟურნალისტებთან გამართულ შეხვედრაზე გივი თარგამაძემ 2013 წლის 26 მაისს მომხდარ ფაქტზე ისაუბრა, რომლის მიხედვით, დავით გელაძემ 18 წლის მოქალაქეს, გიგი სვანს ცეცხლსასროლი იარაღით ჭრილობა მიაყენა. თარგამაძის განცხადებით, შემთხვევა თბილისში, ჭავჭავაძის გამზირზე მოხდა, საიდანაც გელაძემ 18 წლის გიგი სვანი, კამერებისგან თავის არიდების მიზნით, ყიფშიძის ქუჩაზე ჩაიყვანა და იარაღი თავზე დაადო. თარგამაძის ინფორმაციით, გასროლამდე 18 წლის მოზარდმა მოძრაობა მოასწრო და ტყვია თავის ნაცვლად მხარში მოხვდა, რის შედეგადაც ის ამ დრომდე საავადმყოფოში წევს და მორიგი ოპერაციისთვის ემზადება. თარგამაძის, განცხადებით, შესაძლოა 18 წლის ახალგაზრდა ამ შემთხვევის გამო, სამუდამოდ დაინვალიდდეს.
საპარლამენტო უმცირესობის წევრი გამოძიებას საქმის გაჭიანურებასა და უმოქმედობაში ადანაშაულებს.
“ჩვენ აქამდე ვცდილობდით, დავლოდებოდით გამოძიებას. ასევე, არ გვინდოდა რეაგირება ყურმოკრული ამბის შესახებ. დღეს აშკარაა, რომ გამოძიება ადგილიდან არ იძვრის და არანაირი შედეგი არ აქვს. მეტიც, გამოჩნდა დაზარალებულის ბებიის ინტერვიუ, სადაც ის ამბობს, რომ შსს კვალის დაფარვას ცდილობს, მათ შორის, საავადმყოფოში. თავს მოვალედ ვთვლით, ჩავერიოთ და მოვახდინოთ საზოგადოების და მედიის სრული ინფორმირება ამ საკითხზე,” _ განაცხადა გივი თარგამაძემ ჟურნალისტებთან შეხვედრისას.
უმცირესობის წევრმა ჟურნალისტებს ასევე ინტერნეტ ტელევიზია “itv”-ის მიერ მომზადებული სიუჟეტი უჩვენა, რომელიც ამ ფაქტზეა მომზადებული და რესპონდენტები ფარულად არიან ჩაწერილები. სიუჟეტში აღნიშნულ საქმეზე გიგი სვანის ბებია საუბრობს და გამოძიების მხრიდან ფაქტის დამალვის მცდელობაზე ამახვილებს ყურადღებას, თუმცა, გიგი სვანის მამა, იგივე ფაქტს უარყოფს და ჟურნალისტებს თხოვს, ნუ ჩაერევიან საქმეში, რომელიც მხოლოდ ჭორის დონეზეა ცნობილი.
ამ ფაქტის გადასამოწმებლად “გურია ნიუსი” შსს-ს პრესსამსახურის ხელმძღვანელს ნინო გიორგობიანს დაუკავშირდა, რომლის განცხადებით, გელაძე თანამდებობიდან უკვე გათავისუფლებული და დაპატიმრებულია. საქმეზე გამოძიება სისხლის სამართლის კოდექსის 117 მუხლით მიმდინარეობს.
სასამართლო პროცესი დღესაა დაგეგმილი, საქმეს პროკურატურა იძიებს.
