ეს ის დაბაა, სადაც თითქმის ყველა არჩევნებში მმართველი პარტია 80 პროცენტით იმარჯვებს. თუმცა, როგორც იქაურები ამბობენ, ხელისუფლებას ისინი მხოლოდ წინასაარჩევნოდ ახსენდება, დაპირებებიდან კი არაფერი სრულდება. მათი განცხადებით, ნასაკირალელებისთვის მნიშვნელოვნად არჩევნების შემდეგ არაფერი შეცვლილა. უმთავრესი პრობლემა კვლავ უგზობა, უწყლობა და უმუშევრობაა. როგორც დაბის რწმუნებული შოთა ართმელაძე ” გურია ნიუსთან” აცხადებს, დაბის მოსახლეობის შემოსავლის წყარო ადრე გაზაფხულზე და გვიან შემოდგომამდე თურქეთში მუშაობაა.
_ გაჭირვებულად ვცხოვრობთ, არავინ ყურადღებას არ გვაქცევს. ნახეთ, როგორი გზები გვაქვს, წყალი სამ დღეში ერთხელ მოდის, ისიც ახლა, თორემ ადრე სულ არ იყო _ უწყლოდ ვიხრჩობოდით. საიდან ვეზიდებოდით წყალს, ვინ იცის. ცენტრში ყველაფერი დაშლილია. აღარც კლუბი გვაქვს _ დაანგრიეს. სიცოცხლე ჩამკვდარია _ თუ დაბაში გზა არ იქნება, რაც არ უნდა, გააკეთო აქ, არაფერს მნიშვნელობა არ აქვს. გზაა ჩვენი უპირველესი პრობლემა. დანგრეულია უზარმაზარი ჩაის ფაბრიკა, სადაც ათასობით ტონა ჩაი მუშავდებოდა. დასაქმებული იყო ადგილობრივი მოსახლეობის უმეტესობა, რამდენი წელია უკვე, გაზაფხულზე თურქეთში 90 პროცენტი მიდის სამუშაოდ, ჩაის საკრეფად და ასე მოხდა წელსაც, დაცლილია დაბა კაცებისგან, _ გვითხრეს ნასაკირალის მცხოვრებლებმა.
ოზურგეთის მუნიციპალიტეტის დაბა ნასაკირალის რწმუნებული შოთა ართმელაძე “გურია ნიუსთან” აღნიშნავს, რომ დაბის ერთ-ერთი უმთავრესი და მოუგვარებელი პრობლემა წყლის საკითხია:
_ დაბა ნასაკირალში წყალთან დაკავშირებული პრობლემები კვლავ არის, თანაც სერიოზული. გასულ წელს შეცვალეს წყალგაყვანილობის ცეტრალური ხაზი, ჩააწყვეს მილები, რომელიც უხარისხო დარჩა, მოიმადლიერეს ხალხი, მაგრამ დროებით, კვირა არ გავა, რომ არ გაფუჭდეს და თავიდან არის საკეთებელი. არის პრობლემები, ვერ უძლებს ეს მილები წნევას და არის სოფელში ერთი ამბავი. წელს სოფლის პროგრამით გათვალისწინებული ფული, რაც გვაქვს, ალბათ, ყველა წყლის პრობლემის მოგვარებას დასჭირდებაა, არც ეყოს, იქნებ, წყლის საკითხი არის ძალიან სერიოზული პრობლემა.
_ რამდენი ლარია გამოყოფილი დაბა ნასაკირალში სოფლის მხარდამჭერი პროგრამით?
_ 51 600 ლარი გვაქვს გამოყოფილი, რომელიც წყალთან არსებულ პრობლემას დასჭირდება, მთელი სოფლის მოსახლეობა მოითხოვს ამას, არც ჰყოფნის. წელს ალბათ, ისევ ნახევარი გაკეთდება, ნახევარს მომავალში გაკეთებენ. შარშან რაც იყო გამოყოფილი, ყველა ამაში ჩადეს და უხარისხოდ გაკეთდა, რომელიც უნდა შეიცვალოს. დაბა ნასაკირალის ერთ-ერთი უპირველესი და უმნიშვნელოვანესი პრობლემაა წყალი.
_ მოსახლეობა რას შვება უწყლოდ?
_ რას იზამს, წვალობენ. სამ დღეში ერთხელ ვაწვდით, წყალსადენი მალე ფუჭდება და მერე სამ დღეს იმის კეთებას ვუნდებით. ნასაკირალში 3000-ზე მეტი მაცხოვრებელია, ცხოვრობს 700 კომლი. დაბა ნასაკირალის მცხოვრებთა 90 პროცენტი წასულია თურქეთში სამუშაოდ. ესეც რომ ესეც არ იყოს, დაიხოცებოდნენ შიმშილით.
_ სხვა რა პრობლემებია დაბაში?
_ ძირითადად გაზის. შეწყვეტილია გაზიფირების სამუშაოები, თითქმის, მიყვანილია ბოლომდე, წინასაარჩვენოდ დაიწყეს და მერე მიატოვეს. 2011 წელს სხვა კომპანია აკეთებდა და მერე ის სამუშაოები დაწუნებული იქნა მთლიანად და თავიდან დარჩა გასაკეთებელი, 2012 წელს იმუშავეს, შეასრულეს 80 პროცენტი სამუშაოსი და ისევ შეწყდა, არსაიდან აღარ ჩანს ეს ხალხი.
_ სტიქიით დაზარალებულთა შესახებ რას გვეტყვით? რამდენი ოჯახი დაზარალდა და რამდენი დააკმაყოფილა ხელისუფლებამ?
_ დაზარალებული იყო 4 ოჯახი, აქედან ორი გაკეთდა, ორი სახლი გადაიხურა.
_ რა კრიტერიუმით შეარჩიეთ ის ორი ოჯახი, რომელსაც დაეხმარეთ?
_ მრავალშვილიანი იყო ერთი, ქათამიძის ოჯახი და ასევე ქარქაშაძის ოჯახი. შევარჩიეთ იმის მიხედვით, რომელი უფრო დაზარალებული იყო. ასევე მრავალშვილიანი ოჯახის სახლი გადავხურეთ მეხუთე რაიონში. ამ ბინაში 12 ოჯახი ცხოვრობს და მათ შორის, ძირითადი ნაწილი სოციალურად დაუცველია. დაზარალებულთა სიაშია ჩვენი ადმინისტრაციული შენობაც, დაგვპირდნენ გაკეთებას და ვნახოთ.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
