ადგილობრივი მოსახლეობის თქმით, ურეკში ამ ეტაპზე მოსაგვარებელია წყალგაყვანილობისა და კანალიზაციის სისტემები. მათი თქმით, ყველა ხელისუფლების მოსვლის დროს ამ საკითხების გადაჭრის შესახებ მხოლოდ საუბარი მიდის.
აი, რას ამბობენ ურეკელები ურეკის და ხელისუფლების დაპირებების შესახებ:
_ ამ ეტაპზე არაფერი არ ხდება. პლაჟზე ჯებირი რომ არის ჩანგრეული, ამას ხომ უნდა გაკეთება? ცხრაჯერ მაინც გაიგზავნა ურეკიდან ოზურგეთის მუნიციპალიტეტში წერილი ამის შესახებ, მაგრამ პრობლემა პრობლემად ჩნდება. პასუხი მივიღეთ, ის ადგილი კერძო პირზეა გაფორმებულიო. როგორ შეიძლება პლაჟი კერძო იყოს? კეთილი ინებოს მთავრობამ, ის ჯებირი აიღოს, ეზოში გადაუტანოს იმ კერძო პირს და დამსვენებლებს მისცეს იმის უფლება, პრობლემის გარეშე დაისვენონ.
_ მაგნეტიტში, სანაპიროს ქუჩაზე, წლებია, საწრეტი არხის მოწესრიგებას ვითხოვთ და არავინ ყურადღებას არ გვაქცევს. ზაფხულში სანაპიროზე ვერ გაივლით _ ყარს ყველაფერი. არ დაადგა საშველი ამ არხის გაწმენდას. არჩევნებში ხმა მივეცით “ქართულ ოცნებას”, თუმცა, ჯერჯერობით არაფერი არ გაკეთებულა. მინდა, სიცოცხლეში ვნახო ეს კურორტი აღორძინებული.
წყალგაყვანილობისა და საკანალიზაციო მილების სისტემის მოგვარებას, როგორც ხელისუფლების წარმომადგენლები ამბობენ, სექტემბრიდან დაიწყებენ, მაგრამ დაიწყებენ კი?! სერიოზულად უნდა მოხდეს ურეკში სხვადასხვა პრობლემების გადაჭრა. ამასწინათ სოფლის რწმუნებულმა ვაუჩერით გამოიტანა მავთულხლართი და პლაჟზე მისასვლელი ერთი ნაწილი გადაიღობა, საიდანაც ძროხები გადადიოდნენ პლაჟზე. ასე არ გამოვა საქმის კეთება.
_ ამბობდნენ, ურეკში ველოსიპედის სავალი ბილიკი კეთდებაო, რომელიც 16 000 ლარი ჯდება. კარგია, მაგრამ ჯერ პლაჟი გაკეთდეს, როგორც ბათუმში და ქობულეთში ხდება ეს პროცესი და შემდეგ მივხედოთ სხვა სავალ ბილიკებს.
_ რამდენიმე დღის წინ პოლონელი სტუმრები მყავდა, მაგრამ ერთ დღეში დატოვეს ურეკი, რადგან არ არის ის პირობები, რაც დამსვენებელს მოეწონება და გააჩერებს. გასაგებია, რომ მაგნიტური ქვიშა გვაქვს, მაგრამ მხოლოდ ეს არ არის მთავარი.
ოზურგეთის მუნიციპალიტეტის გამგეობის facebook-ის გვერდზე იმ სამუშაოების შესახებ ინფორმაციაა გამოქვეყნებული, რომელიც ურეკში მიმდინარეობს: “საქართველოს რკინიგზის დეპარტამენტის შესაბამისმა სამსახურმა კურორტ ურეკში ცენტრალური შესასვლელი გზა, რომელიც ლიანდაგზე გადის, შეაკეთა, რადგან ის მოძრაობას აფერხებდა და მანქანებს აზიანებდა; ოზურგეთის მუნიციპალიტეტის სერვისცენტრი დაბა ურეკში გაწმენდით სამუშაოებს აწარმოებს და ტერიტორიას სპეციალური საცელი აპარატით ეკალ-ბარდისაგან ასუფთავებს.
კონსტანტინე შარაშენიძე დაბა ურეკში დუმბაძის ქუჩის მცხოვრებლებს შეხვდა, რომლებმაც მიმდებარე ტერიტორიაზე წყლისგან დამცავი ნაპირსამაგრი ჯებირის აუცილებლობაზე ისაუბრეს. წლებია, წყლის ადიდების შედეგად, ადგილობრივების საცხოვრებელი სახლები იტბორება და მოსავალი ნადგურდება. გამგებელმა აღნიშნა, რომ ამ პრობლემასთან დაკავშირებით წერილი მომზადდება, რომელიც ინფრასტრუქტურისა და რეგიონალური განვითარების სამინისტროს გადაეგზავნება შესაბამისი რეაგირებისათვის.
გამგებელმა განაცხადა, რომ აუცილებლად შემუშავდება კურორტის განაშენიანების გენგეგმა და მოგვარდება წყალმომარაგების პრობლემა, რაც ხელშემწყობი ფაქტორი გახდება მისი განვითარებისა, მაგრამ ზუსტი დრო არ უხსენებია, თუ როდის მოხდება ეს ყველაფერი.”
რაც შეეხება დანგრეულ ჯებირს ოზურგეთის მუნიციპალიტეტის გამგეობის პრესასთან და საზოგადოებასთან ურთიერთობის სამსახურის უფროსის, ნინო სალუქვაძის თქმით, ჯებირის გადატანა და ამ პრობლემის მოგვარება ამ დღეებში იგეგმება.
და ბოლოს, ურეკის მცხოვრებლებს კარგად ახსოვთ საქართველოს პრეზიდენტის მიხეილ სააკაშვილის დაპირებები. საპარლამენტო არჩევნების დროს მან ურეკში განაცხადა: “ასეთი პლაჟი ჩვენ გავაკეთეთ ბათუმში, ანაკლიაში, ქობულეთში კეთდება ახლა ძალიან მაგარი და ყველაზე მაგარი იქნება კიდევ ურეკი. ურეკი დასასვენებლად ძალიან მნიშვნელოვანია, ურეკში კეთდება საუკეთესო წყალგაყვანილობის სისტემა, 24-საათიანი წყალი იქნება. გურიაში წელს ჩვენ ვაკეთებთ ბახმაროს და მაგრად ვაკეთებთ ზღვას. გურიას ექნება მთის კურორტი მაგარი და ზღვის კურორტი მაგარი და ეს ყველაფერი შეიკვრება მთლიანად. სხვათაშორის, ფოთშიც უნდა გავაკეთოთ ბულვარი, ქობულეთში კეთდება, მაგრამ მთავარია, ახლა წყალი ჰქონდეს ხალხს, გურულებს. გურულებს ძალიან სჭირდებათ ჩვენი განსაკუთრებული ზრუნვა, ყველაფერი აქვს გურიას _ მთა, ზღვაც, მცირემიწიანია, მაგრამ ნაყოფიერი. დაუსაქმებელი ადამიანი არ უნდა იყოს საქართველოში”.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
