ამ წერილს გამოხმაურება მოჰყვა _ “ქართული პარტიის” ლანჩხუთის ორგანიზაციის ხელმძღვანელის მერაბ ქარჩავას სახელით, პრესკონფერენციაზე მიგვიპატიჟეს, სადაც განხილვის თემა ზემოთ ნახსენები წერილი აღმოჩნდა. ბატონ ქარჩავას გვარიანად უშრომია და წითლად მოუნიშნავს ის თემები, რომლის გამოც ჟურნალისტი უნდა “დაეტუქსა”.
_ ამ წერილს რომ წერდით, ინფორმაციის მისაღებად პარტიის ოფისში მოხვედით თუ დაგიძახეს, რომ მოსულიყავით?
_ ბატონო მერაბ, ამ წერილის გამო დანიშნეთ პრესკონფერენცია?
_ დიახ, თქვენი წერილის გამო, რომელსაც დიდი ამბები მოჰყვა.
_ მაინც რა ამბები?
_ ამის მერე სიუჟეტები გაკეთდა “რეალ-ტვ”-ზე, ინტერნეტში…
_ მერე, ჩვენ რა შუაში ვართ?
_ თქვენ გიწერიათ: ადგილობრივ ოფისში “წამოსცდათ”, რომ ჟორდანიას კანდიდატურას მხარს დაუჭერენ. ეს დადასტურებას ნიშნავს, რომ ბატონი მერაბი პოლიტიკაში ერთვება. ჩვენ კი მივესალმებით, რომ ის იყოს ჩვენი კანდიდატურა, მაგრამ სიტყვა “წამოსცდათ” სხვანაირად გამოვიდა.
_ ბატონო მერაბ, თავადაც ადასტურებთ იმას, რაც თქვენ ოფისში მითხრეს, აქ რას ცვლის სიტყვა “წამოსცდათ”?
_ ჩემთვის გეკითხათ, აქ, ოფისში რომ იკითხეთ.
_ თქვენ რა შუაში ხართ?
_ ჟურნალისტს ხომ ევალება ინფორმაცია ყველა მხარესთან გადაამოწმოს? გიწერიათ კიდეც აი, მეორე გვერდზე ეთიკურ კოდექსში _ ჟურნალისტი ვალდებულია ინფორმაცია ყველა მხარესთან გადაამოწმოს.
_ მე თქვენი ოფისის კომენტარი მქონდა, ჟორდანიას პრესსამსახურსაც დავუკავშირდი და სოზარ სუბარსაც… ფიქრობთ, ვალდებული ვიყავი, პარტიის ყველა წევრს დავკავშირებოდი? თქვენ ახალი რა უნდა გეთქვათ?
_ იმის თქმა მინდა, რომ ჟორდანიასთან დაკავშირებით, ჩვენი ადგილობრივი ოფისი ინფორმირებული არ არის.
_ ასეც გვეწერა, სოზარ სუბარსაც ამიტომ დავუკავშირდით; ვწერდით იმასაც, რომ მხოლოდ ადგილობრივი ოფისის სურვილების გამო, ჟორდანია პოლიტიკაში არ ჩაერთვება.
_ სიტყვა “წამოსცდათ” იყო ძალიან ცუდი.
_ ამის მეტი სათქმელი არაფერი გაქვთ?
_ აი, ჩვენი გია ქურიძე რომ გამოუშვეს თეატრის რეჟისორობიდან, ამაზე რატომ არ წერთ?
_ ამის შესახებ ერთხელ უკვე ვწერდით. თავად გია დაგვპირდა, რომ დეტალებს და ახალ ინფორმაციას ექსკლუზიურად მოგვაწვდიდა, ამ ეტაპზე კი გაჩერება ამჯობინა _ ფაქტების დადგენას ელოდება…
საუბარში გია ქურიძეც ჩაერთო და აღნიშნა, რომ დეტალური ინფორმაციის შეჩერება ქარჩავასთან ერთად მიღებული გადაწყვეტილება იყო. ეს ვერც პარტიის თავკაცმა უარყო:
_ კი, ბატონო, ასე იყო, მაგრამ მას მერე რამდენი დღე გავიდა?
_ შეთანხმებისამებრ, გელოდებოდით.
_ კი, არ მაქვს პრეტენზია, უბრალოდ, ვამბობ, რომ შეიძლებოდა, ამის შესახებ მწვავე წერილის დაწერა, _ შეკვეთების მოცემა გადაწყვიტა ქარჩავამ.
_ ადასტურებთ, დაწერა არ გინდოდათ და მაინც ამბობთ _ რატომ არ დაწერეთო. საკუთარ თავთან მაინც შეთანხმდით, რა გინდათ.
_ ვფიქრობ, უნდა დაგეწერათ, _ თავისას აქ იშლიდა ოპოზიციონერი.
_ თქვენი სურვილები თქვენსავე პარტიულ გამოცემაში შეგიძლიათ გააჟღეროთ, ჩვენი გაზეთი კი დამოუკიდებელი გამოცემაა.
_ რა თქმა უნდა, მე ვერ დაგავალებთ. უბრალოდ, ვთქვი, თორემ თქვენი საქმეა _ ვის გამოაჩენთ და ვის არა.
_ გამოჩენა თქვენს საქმიანობაზეა დამოკიდებული… ვერაფერი გაგიგეთ, ვარაუდობთ, რომ ხელისუფლებამ “დაგვავალა” არ “გამოგაჩინოთ”?
_ თქვენ სიცხემ ხომ არ დაგარტყათ?! _ ზრდილობამ უღალატა “დემოკრატიის დროშით” ხელისუფლებაში მოსვლის მოსურნე ქარჩავას.
_ არა, კარგად ვარ, არ ინერვიულოთ.
_ როდის ვთქვი ხელისუფლება? ხომ არ “აგეწვა”?! მე არაფერი მითქვამს.
_ ბატონო მერაბ, მე რა უნდა “ამეწვას”, იმ ხალხიდან განსხვავებით, სახლის სხვენში ყველა პარტიის დროშა რომ აქვთ შენახული, რა იცი რომელი მოვიდეს ხელისუფლებაში…
_ რომელ პარტიაში ვიყავი?
_ რომელი ერთი ჩამოვთვალო?! წინა არჩევნებისას, რეგისტრაციის წინა დღეს აღმოჩნდით ერთ-ერთ პარტიაში…
_ არ მქონდა უფლება შევსულიყავი?
რა თქმა უნდა, ჰქონდა და ახლაც აქვს მერაბ ქარჩავას უფლება, ნებისმიერ პარტიაში შევიდეს. თუმცა, აქ მთავარი სულაც არ არის მისი მრავალპარტიულობა ან თუნდაც ის, რომ შევარდნაძის ხელისუფლებაში ქალაქის გამგებლის მოადგილე იყო, უფრო ადრე კი _ ლანჩხუთის მერი; უფრო მნიშვნელოვანი ისაა, რა უნდა უხელმძღვანელოს და რისი იმედი უნდა ჰქონდეს “ქართულ პარტიას” იმ ადამიანის, რომელიც პრესკონფერენციებს საგაზეთო წერილის მიმართ გაუგებარი პრეტენზიების გამო მართავს.
ჩვენი წყაროს ინფორმაციით, ქარჩავამ თბილისიდან მიიღო საყვედური “ჟორდანიას თემის” ასეთი სახით გახმაურების გამო. თუმცა, ერთობ გასაკვირია _ რა შუაშია ლანჩხუთის ოფისი და მისი რაიმეში დადანაშაულება, როცა პარტიის თანათავმჯდომარის სოზარ სუბარის და ლანჩხუთის ოფისის კომენტარები ერთმანეთს ზუსტად ემთხვევა?!
რაც შეეხება გია ქურიძის თემას; მკითხველს შევახსენებთ, რომ იგი ლანჩხუთის კულტურის ცენტრიდან მხოლოდ “ქართული პარტიის” საინიციატივო ჯგუფში შესვლის გამო გაუშვეს. მართალია, მან განცხადება თავად დაწერა, რადგან ხელმძღვანელობის უხერხულ სიტუაციაში ჩაყენება არ სურდა, მაგრამ პარტიაში არ მალავენ, რომ ქურიძის გაშვება “ზემოდან” მოდიოდა და მას ოპოზიციასთან ყოფნა არ აპატიეს. ამ თემას, წყაროსთან შეთანხმებისამებრ, აუცილებლად დავუბრუნდებით.
