განცხადებას უცვლელად გთავაზობთ:
“რამდენიმე დღეა, მიმდინარეობს მიზანმიმართული, პოლიტიკურად მოტივირებული, ცილისმწამებლური, უპასუხისმგებლო და სახელმწიფო ინტერესებისათვის საზიანო კამპანია, რომელიც შესაძლოა მიზნად ისახავდეს საზოგადოების განგებ შეცდომაში შეყვანას, არსებული რეალობის დამახინჯებასა და ახალგაზრდობის კეთილდღეობისათვის დაწყებულ ცვლილებათა დისკრედიტაციას. პატრიოტიზმთან დაკავშირებით განვმარტავთ, რომ ჩვენი პატრიოტიზმი საქმის სიყვარულში, მოვალეობათა კეთილსინდისიერ შესრულებასა და ხალხზე ზრუნვაში გამოიხატება, რაც ჩვენი ყოველდღიური საქმიანობის განუყრელი ნაწილი და ამოსავალი პრინციპია. ჩვენი მიზანი საკუთარი ქვეყნის ისეთი პატრიოტების აღზრდის ხელშეწყობაა, რომლებიც იქნებიან შემწყნარებლები, კეთილსინდისიერები, იცხოვრებენ ცხოვრების ჯანსაღი წესით, ექნებათ საზოგადოების დანარჩენი წევრების მიმართ სოლიდარობის განცდა, ხელს შეუწყობენ შეზღუდული შესაძლებლობების მქონე პირთა საზოგადოებაში სრულფასოვან ინტეგრაციას, დაიცავენ გარემოს, გაუფრთხილდებიან სხვის შრომას, პატივს სცემენ განსხვავებულ პოლიტიკურ შეხედულებებს და მუდამ ემახსოვრებათ, რომ მათი სამშობლოს ტერიტორიების ნაწილი ოკუპირებულია და სხვებთან ერთად ამ პრობლემის გადაჭრა მათი საზრუნავიცაა. ბანაკის პროგრამაში ცვლილებები ნამდვილად იქნა შეტანილი ახალგაზრდებისათვის უკეთესი პირობების შესაქმნელად. ესენია 1. 7 დღიანის ნაცვლად 10 დღიანი პროგრამის შემოღება, რაც პროგრამის მონაწილეებს მისცემს ხარისხიანი არაფორმალური განათლების მიღებისა და დასვენების უკეთესს საშუალებას. 2. გასულ წლებში დამკვიდრებული მონაწილეთა შერჩევის ბუნდოვანი კრიტერიუმების ნაცვლად შემოღებულ იქნა დაკომპლექტების სამართლიანი წესი. კერძოდ განათლებისა და მეცნიერების სამინისტროს გადაეგზავნა მოთხოვნა, რომ სკოლებმა წარმოადგინონ თითო წარჩინებული მოსწავლე 14-18 წლის ასაკამდე. წარჩინებულებს შორის სოციალურად დაუცველების ან დევნილების არსებობის შემთხვევაში პრიორიტეტი ამ კატეგორიის ბავშვებს მიენიჭება. 3. ბავშვთა კვების მენიუ განისაზღვრა საქართველოს შრომის, ჯანმრთელობისა და სოციალური დაცვის სამინისტროსთან თანამშრომლობით კვალიფიციური ექსპერტის დასკვნის საფუძველზე, რათა გარანტირებულად იქნას დაცული ახალგაზრდების ჯანმრთელობა და თავიდან იქნას აცილებული ის გაუგებრობები, რომლებსაც ადგილი ჰქონდა წარსულში. 4. ჩატარდა სარემონტო სამუშაოები და მიმდინარეობს ტერიტორიების დასუფთავება იმისათვის, რომ გამოგვესწორებინა ის მძიმე სურათი, რაც ადგილზე დაგვხვდა. გამოითქვა კრიტიკა, რომ სამინისტროს თანამშრომლები იმყოფებიან ბანაკის ტერიტორიაზე. აქ არაფერია საიდუმლო, დიახ ბანაკში იმყოფებიან ის პირები, რომლებიც პასუხისმგებელნი არიან ბანაკის საქმიანობის სწორად წარმართვაზე და ასრულებენ მათზე დაკისრებულ მოვალეობებს. გვდებენ ბრალს სახელმწიფო სახსრებით შეძენილი მაისურების დაწვაში, რაც სრული აბსურდი და ყოველგვარ ადეკვატურობას მოკლებული ბრალდებაა. ბანაკის საწყობის ტერიტორიაზე არის მაისურები და კეპები პატრიოტის აბრევიატურით და ნებისმიერ მსურველ ჟურნალისტს შეუძლია ჩავიდეს და საკუთარი თვალით იხილოს, რომ სახელმწიფო სახსრებით ადრე შეძენილი ქონება იქ უვნებლად არის განთავსებული. რაც შეეხება თითქოსდა მოსახლეობის არაერთგზის თხოვნას მაისურების გადაცემასთან დაკავშირებით განვმარტავთ, რომ მსგავსი თხოვნის შემცველი წერილი, არც სამინისტროში და არც ბავშვთა და ახალგაზრდობის ეროვნულ ცენტრში არ შემოსულა და მაშასადამე ეს განცხადებაც მტკნარი სიცრუეა. ჩვენ გადავწყვიტეთ, წარმოგიდგინოთ ფოტო და ვიდეომასალა იმისა თუ რა მდგომარეობაში დაგვახვედრეს ჩვენ ანაკლიის ბანაკი, რითიც დასტურდება თუ როგორი უპასუხისმგებლობით ექცეოდნენ სახელმწიფო ქონებას, როგორ არ იცავდნენ ელემენტარული სანიტარიის ნორმებს ჩვენამდე პასუხისმგებელი პირები ანაკლიის ბანაკში, სადაც ბავშვებს უნდა დაესვენათ და ჩვენის მხრივ განვაცხადებთ, რომ ჩვენი ხელმძღვანელობის პირობებში მემკვიდრეობით დატოვებული ეს ხარვეზები გამოსწორდება და ჩვენი ზრუნვა თითოეული ახალგაზრდის კეთილდღეობაზე იქნება მიმართული. განსხვავებით არაკეთილმოსურნეებისაგან, რომლებიც დაუდასტურებელი და ბინძური ტყუილებით ცდილობენ თქვენს შეცდომაში შეყვანას, ჩვენ ყოველთვის გეტყვით ფაქტებით გამყარებულ სიმართლეს”, _ ნათქვამია განცხადებაში.
