როგორც თბილისის საქალაქო სასამართლოს მიერ გავრცელებული განცხადებიდან ირკვევა, მისი დაპატიმრების მიზეზი ქურდული სამყაროს წევრობაა, რითაც “ხელს უწყობს ქურდული სამყაროს ფუნქციონირებას”. აღსანიშნავია, რომ ფოცხვერიას ჯანმრთელობის მდგომარეობა საკმაოდ მძიმეა _ დაკავების დროს ის საავადმყოფოში მკურნალობდა და პატიმრობაც სწორედ იქ შეუფარდა სასამართლომ.
“2013 წლის 18 ივნისს, თბილისის საქალაქო სასამართლომ დააკმაყოფილა პროკურატურის შუამდგომლობა, წარსულში ნასამართლევ, ბრალდებულ ტარიელ ფოცხვერიას მიმართ აღკვეთის ღონისძიების სახით პატიმრობის გამოყენების თაობაზე.
წარდგენილი ბრალდების თანახმად, ტარიელ ფოცხვერია, როგორც კანონიერი ქურდი, აღიარებს ქურდულ სამყაროს, თავისი ცხოვრების წესით საჯაროდ გამოხატავს ქურდული სამყაროსადმი პატივისცემას, ურთიერთობა აქვს ქურდული სამყაროს სხვა წევრებთან, აქტიურად მოქმედებს ქურდული სამყაროს მიზნების განსახორციელებლად, რითაც ხელს უწყობს ქურდული სამყაროს ფუნქციონირებას.
ბრალდებულის ჯანმრთელობის მდგომარეობის გათვალისწინებით, აღკვეთის ღონისძიების შეფარდების საკითხი განხილულ იქნა შპს ”ს. ხეჩინაშვილის სახელობის საუნივერსიტეტო კლინიკაში”, სადაც ტარიელ ფოცხვერია მკურნალობას გადის 2013 წლის 10 ივნისიდან.
სასამართლომ მიიჩნია, რომ მხოლოდ პატიმრობის გამოყენებით იქნება შესაძლებელი თავიდან იქნას აცილებული ბრალდებულის მიმალვა, მის მიერ ახალი დანაშაულის ჩადენა და მტკიცებულებების განადგურება. აღკვეთის ღონისძიების კონკრეტული სახის შერჩევისას სასამართლომ გაითვალისწინა ის, რომ ტარიელ ფოცხვერია წარსულში გასამართლებულია კანონიერი ქურდობის ბრალდებით და ამჟამადაც მას ბრალი ედება სასჯელაღსრულების დაწესებულებაში ყოფნის დროს ანალოგიური ქმედების გახორციელებაში, რის გამოც არსებობს საფუძველი დასაბუთებული ვარაუდისათვის, რომ მის მიმართ შემზღუდველი ღონისძიების გამოუყენებლობის შემთხვევაში იგი გააგრძელებს დანაშაულებრივ საქმიანობას. სასამართლომ, ასევე მხედველობაში მიიღო, რომ ბრალდებული მისი გავლენის გათვალისწინებით, მიუხედავად მეტყველების შეზღუდვისა, მოახერხებს გაანადგუროს საქმისათვის მნიშვნელოვანი ინფორმაცია და ზეგავლენა მოახდინოს მოწმეებზე.
აღნიშნულ საქმეზე წინასასამართლო სხდომა გაიმართება 2013 წლის 7 აგვისტოს 12 საათზე, თბილისის საქალაქო სასამართლოში,” _ ნათქვამია სასამართლოს მიერ გავრცელებულ განცხადებაში.
ტარიელ ფოცხვერიას დაკავებას ცოტნე გამსახურდია გამოეხმაურა, მისი თქმით პატიმრის ჯანმრთელობის მდგომარეობა უკიდურესად მძიმეა.
“არ ვაპირებ ქურდული სამყაროს დაცვას, უბრალოდ ყველაფერს ხომ საზღვარი აქვს?!
ეს ადამიანი ერთი კვირის წინ გათავისუფლდა. მას ქვეყნის დატოვება შესთავაზეს, მაგრამ ჯანმრთელობის მდგომარეობისა და უსახსრობის გამო ვერ შეძლო _ მაცადეთ, ცოტა მოვმჯობინდები და წავალო… მას იმ ჯოჯოხეთიდან ვიცნობ. იგი ერთ-ერთი იშვიათი პატიმარი იყო, ვინც კაცურად იქცეოდა და მისი “ტიტული” აქ ჩემთვის მეორეხარისხოვანია. ვისთვის წარმოადგენდა საფრთხეს ეს ავადმყოფი, მომაკვდავი კაცი, რომელიც ვერ ლაპარაკობს, და ვერ დადის?! ან მერამდენედ უნდა დააკავონ ქურდული სამყაროს წევრობისათვის? ნეტავ, მართლა იყოს კანონის უზენაესობა ქვეყანაში… ამ დროს, ჯალათები გარეთ არიან და კბილაშვილი ჯოკონდას ღიმილით რეპრესირებულ ადამიანებს ლამის ვიდეოებს თხოვს მტკიცებულებად, პოლიციელ გელაძეს 18 წლის ბიჭის დაჭრისთვის საპროცესოს უფორმებს, ხვედელიძეს ქვეყნის დატოვების უფლებას აძლევენ წინასწარი გამოძიების პერიოდში.
გთხოვთ, გულთან მიიტანოთ მომაკვდავი ადამიანის მდგომარეობა… იგი ამჟამად საავადმყოფოშია ბადრაგების თანხლებით, რადგან გაწერას არ ექვემდებარება!” _ წერს ცოტნე გამსახურდია “ფეისბუქში”.
ტარიელ ფოცხვერიამ ციხე სასჯელთა შეკრებითობის წესის გაუქმების შედეგად დატოვა . ამჟამად ის ხეჩინაშვილის სახელობის საუნივერსიტეტო კლინიკაში, სხივური თერაპიის კურსს უკვე ბადრაგების თანხლებით იტარებს.
