შეხვედრა კითხვა -პასუხის რეჟიმში მიმდინარეობდა და ელჩმა ჟურნალისტების მიერ დასმულ ექვს შეკითხვას უპასუხა. მთავარი კითხვები საქართველოში მედიის თავისუფლების ხარისხს, ადამიანის უფლებებს, სამართლიან სასამართლოს და საარჩევნო გარემოს შეეხებოდა.
“რაც შეეხება მედიის თავისუფლების ხარისხის გაუმჯობესებას საქართველოში, ეს სამუშაო პროცესია. საქართველოში არის შესაძლებლობა ახალი ხედვების მიღების. მედია საშუალებებში, რომლებსაც ჩვენ ვკითხულობთ და რომელსაც ჩვენ ვხედავთ, ხშირად ვაწყდებით ისეთ მასალას და სიუჟეტს, რომელიც არ არის დაბალანსებული და არ არის წარმოდგენილი სამართლიანად მასალა, ხშირად არ არის გადმოცემული ორივე მხარის ხედვა, ვხედავთ ცალმხრივ რეპორტაჟებს. ეს, რასაკვირველია, უკავშირდება მედია-კულტურის განვითარებას, ჟურნალისტური პროფესიონალიზმის ხარისხის ზრდას. თავის მხრივ, ამისი მიღწევა გაზრდიდა მთავრობისადმი, საზოგადოებისადმი ნდობას, დემოკრატიული პროცესებისადმი, ანუ თუ როგორ პასუხობს მთავრობა საზოგადოებაში არსებულ საჭიროებებს. ასევე, კითხვის გარეშეა, რომ შეიძლება მეტი პროგრესი იქნას მიღწეული ანგარიშვალდებულების კულტურის დანერგვის თაობაზე, მთავრობის სხვადასხვა დონეზე, სამთავრობო გადაწყვეტილებები უნდა იყოს მეტად გამჭვირვალე და ხელმისაწვდომი ჟურნალისტებისთვის; ჟურნალისტების კითხვები, რომელიც შეიძლება უკავშირდებოდეს თანხების გამოყოფას თუ გარკვეული თანხების ხარჯვას ამა თუ იმ მიმართულებით, უნდა იყოს ამომწურავად პასუხიგაცემული, სრული პასუხი უნდა გაეცემოდეს ჟურნალისტების მიერ დასმულ შეკითხვებს. ასევე, ადგილობრივი ხელისუფლებისა და პარლამენტის მიერ უნდა ხდებოდეს ჟურნალისტების დროული ინფორმირება იმ თემებთან დაკავშირებით, თუ რა საკითხები იქნება განხილული შემდგომ სესიებზე, იმისთვის, რომ ჟურნალისტებს ჰქონდეს საშუალება დროულად მოემზადონ, მოაგროვონ მასალა და შემდგომში მოახდინონ საზოგადოების ინფორმირება. ეს ეხება ყველა დონეს, რაც დაკავშირებულია ჟურნალისტების სტანდარტების ზრდასთან”, _ თქვა ჯონ ბასმა.
“გურია ნიუსის” მიერ დასმულ შეკითხვებს, არის თუ არა დაცული საქართველოში ადამიანის უფლებები, კონკრეტულად სამართლიანი სასამართლოს და საკუთრების უფლება? ქვეყანას, რომელსაც აქვს პრეტენზია იყოს დემოკრატიული, ის საარჩევნო კოდექსი, რომელიც დღეს გვაქვს აკმაყოფილებს თუ არა დემოკრატიის მოთხოვნებს? _ ელჩმა ასე უპასუხა:
_ რამდენიმე რამეს აღვნიშნავდი ამასთან დაკავშირებით: სამი კვირის წინ, ჩვენ გამოვაქვეყნეთ სახელმწიფო დეპარტამენტის 2010 წლის ანგარიში. ანგარიშში დეტალურად არის განხილული ზოგიერთი ის თემა და საკითხი, რომელიც შეეხება ადამიანის უფლებებს საქართველოში. მსგავსად ჩემი კომენტარისა, რომელიც გავაკეთე მედიის თავისუფლებასთან დაკავშირებით, აღვნიშნავდი, რომ ამ საკითხებშიც ბევრი რამ არის გასაკეთებელი იმისთვის, რომ უზრუნველყოფილი იყოს დემოკრატიული საზოგადოებისთვის დამახასიათებელი მდგრადობა. ეს გახლავთ სამუშაო პროცესი, ბევრი რამ შეერთებულ შტატებშიც სამუშაო პროცესშია. უკანასკნელ, გასულ წლებში, ვიხილეთ ის პროგრესი, რაც მიღწეულია, რომელიც ნამდვილად აძლიერებს დემოკრატიულ პროცესებს საქართველოში. გასული წლის ადგილობრივი არჩევნები მთლიანობაში იყო წინგადადგმული ნაბიჯი იმ კუთხით, რომ არჩევნებში ბევრი პარტია იღებდა მონაწილეობას, ხარისხი პოლიტიკური პარტიების საარჩევნო კამპანიისა, რომელსაც ეს პარტიები სთავაზობდნენ ამომრჩევლებს. კამპანია იყო უფრო თემატურ პრობლემებზე მიმართული და ნაკლებად იყო პიროვნებებზე გამახვილებული ყურადღება, პოლიტიკური პარტიები ცდილობდნენ, რომ თავისი გზავნილი მიეტანათ ამომრჩევლამდე და ამომრჩეველი მოტივირებული ყოფილიყო მათთვის მიეცა ხმა. ადგილობრივი არჩევნები რომ გადავდოთ გვერდზე და დავუბრუნდეთ საარჩევნო კოდექსზე მუშაობას, მომდევნო წლის და შემდგომ არჩევნებს, რომელზეც მიმდინარეობს მუშაობა, მე აღვნიშნავდი, რომ აქ დემოკრატიულ პროცესში მონაწილეობა უფრო მნიშვნელოვანია, ვიდრე ქუჩაში გასვლა და პროტესტის მოწყობა იქ. გრძელვადიან პერსპექტივაში ეს უფრო მეტად სასარგებლო იქნებოდა. რაც შეეხება მოლაპარაკებებს, საარჩევნო კოდექსის რეფორმირებასთან დაკავშირებით, ასევე არჩევნებთან დაკავშირებულ გარემოს, ეს ის სფეროებია, სადაც მუშაობა მიმდინარეობს, სადაც მეტი პროგრესის ნახვა შეიძლება; მომდევნო წელს დაგეგმილი საპარლამენტო არჩევნების შედეგები უნდა იყოს ისეთი, რომ განამტკიცოს საზოგადოებაში პროცესისადმი ნდობა და ეს დამოკიდებულია რასაკვირველია, როგორც საარჩევნო გარემოს გაუმჯობესებაზე, ასევე არჩევნების ადმინისტრირებაზე. შემდეგი საპარლამენტო არჩევნების შედეგად, პარლამენტი უმჯობესია იყოს ისეთი, სადაც მეტად იქნება წარმოდგენილი მრავალფეროვანი ხედვა, რომელიც ახასიათებს ქართულ საზოგადოებას.
ჟურნალისტებთან შეხვედრამდე ელჩი ოზურგეთში, გურიის ახალგაზრდულ რესურსცენტრში “ინგლისური ენის შესწავლის ხელმისაწვდომობის სასტიპენდიო პროგრამის” მონაწილეებს და გურიაში მცხოვრებ მშვიდობის კორპუსის მოხალისეებს შეხვდა.
