საინიციატივო ჯგუფი “ანტიპოდები” უკვე რამდენიმე დღეა, ამ აქციას აანონსებენ და ამბობენ: “წინა წლამდე, მოსწავლეებთან ერთად, სტუდენტებიც ისვენებდნენ და შესანიშნავ 10 დღეს ატარებდნენ ბანაკებში ზღვაზე ან მთაში.
ახლა ამ ბანაკს სახელი გადაერქვა, დაერქვა “მომავლის ბანაკი” და ახლა სტუდენტებს არ აქვთ საშუალება, დაისვენონ ამ ბანაკში. ეს იყო ძალიან კარგი საშუალება დასვენებისთვის ისეთი სტუდენტებისთვის, რომლებსაც არ აქვთ საშუალება დაისვენონ.
ამიტომაც ამ აქციით, რომელიც იქნება რაღაც მხრივ ფლეშმობი, ვთხოვთ სპორტისა და ახალგაზრდობის სამინისტროს, სტუდენტებსაც მისცეს დასვენების საშუალება საზაფხულო ბანაკში”.
ისევ აქცია და ისევ “ანტიპოდები”… პრეზიდენტის სტუდენტებთან შეხვედრის დროს ბევრი მოთქმა-მოთქმა იყო ატეხილი ამ ჯგუფის მიმართ. სწორედ ამიტომ ჯგუფის ერთ-ერთ დამაარსებელს, თორნიკე ჩიქოვანს გავესაუბრეთ.
_ აქციას კიდევ ვინ უერთდება?
_ აქციას ვაკეთებთ ჩვენ _”ანტიპოდები”. გვიერთდებიან სოხუმის უნივერსიტეტის სტუდენტები, ასევე სხვა უმაღლესი სასწავლებლის სტუდენტები.
_ ამ ბოლო ხანებში თითქმის ყველა საპროტესტო აქცია თქვენი ინიცირებული და ორგანიზებულია, ალბათ ,ამიტომაც, ” ანტიპოდებზე” ამბობენ, მართული ჯგუფიაო.
_ ჩვენ არავინ არ გვმართავს და ვერც ვერასოდეს ვერ შეძლებს ამას. არავისგან ვფინანსდებით, მაისურების ფულიც კი მშობლებს გამოვართვით, ჩვენი ხარჯებით ვაკეთებთ ყველაფერს. ასე რომ, ეს ჭორია და სხვა არაფერი. თვითონ განსაჯეთ _ სააკაშვილთან შეხვედრაზე თქვეს, “ანტიპოდები” მთელი შემადგენლობით არიანო და იქ მხოლოდ 2 წევრი იყო საკუთარი სურვილით. ხომ არ იყო ეს სიმართლე? ისევე არ არის სიმართლე, რომ ჩვენ მართულები ვართ.
_ წინა აქციის დროს ითხოვდით დასაქმების პროგრამის აღდგენას. ახლა უკვე სხვადასხვა სტრუქტურებმა აიყვანეს სტაჟიორები და კიდევ გრძელდება უმაღლეს სასწავლებლებთან სტაჟირების პროგრამის ფარგლებში ხელმოწერები.
_ სწორედ ეს იყო ჩვენი მოთხოვნა, რომ პროგრამა უნდა შეცვლილიყო, ფული და ხელფასი ხომ არ არის მთავარი? ჩვენი მოთხოვნის მთავარი მიზანი იყო სტაჟირება.
_ გამოდის, ეს მოთხოვნა აღარ გექნებათ.
_ როცა ეს პროექტი სრულად გაკეთდება, მაშინ იქნება დაკმაყოფილებული ჩვენი მოთხოვნა. ჩვენ მივმართეთ პრემიერს, რომ ამ ახალ პროექტზე განათლების სამინისტრომ სტუდენტებთან ერთად იმუშაოს, ჩვენც დავეხმარებით, რომ ყველანაირად კარგი პროექტი გამოვიდეს.
_ თორნიკე, ფლეშმობი დღესაა, მაგრამ უკვე გაავრცელეთ კლიპი, რომელიც თქვენმა ჯგუფმა გააკეთა. რა მიზანი გამოძრავებდათ და რა გინდათ ამ კლიპით თქვათ?
_ გახსოვთ ალბათ, სტუდენტების დასაქმებას ფულის ფლანგვა უწოდა მინისტრმა. კლიპი იმიტომ გაკეთდა, რომ რეალურად დაინახოს ყველამ, რა არის და სად არის ფულის ფლანგვა. ამ კლიპით _ “დასაქმება და ფინანსების ფლანგვა” , ვეუბნებით ყველას _ მოუფრთხილდნენ ბიუჯეტს.
