ამ დღეს ოზურგეთის მუნიციპალიტეტის საკრებულოს სხდომა გაიმართება, რომელიც, ზოგიერთის პროგნოზით, სკანდალური და ხმაურიანი იქნება, ზოგის თქმით კი _ სიურპრიზებით აღსავსე. თუ საკრებულოს წევრები მაჟორიტარი დეპუტატის ზვიად კვაჭანტირაძის ფავორიტ დიმიტრი კვერღელიძეს აირჩევენ, მაშინ გამგებლის მოვალეობის შემსრულებელ კოტე შარაშენიძეს დიდი “ბატალიების” გადალახვა მოუწევს.
საკრებულოს თავმჯდომარედ ორი კანდიდატურა სახელდება. პარტია “თავისუფალი დემოკრატების” ოზურგეთის რაიონული ორგანიზაციის თავმჯდომარე დიმიტრი კვერღელიძე, რომელიც როგორც აღვნიშნეთ, ოზურგეთის მაჟორიტარი დეპუტატის ზვიად კვაჭანტირაძის ფავორიტია. ასევე საუბარია ჭანიეთის მაჟორიტარი დეპუტატის ავთანდილ სურგულაძის კანდიდატურაზე, რომელსაც ჩვენი ინფორმაციით, ოზურგეთის გამგებელი კონსტანტინე შარაშენიძე და მისი მომხრე მეგობარი დეპუტატები უჭერენ მხარს.
ოზურგეთში, კარგა ხანია, საუბრობენ ზვიად კვაჭანტირაძესა და კოტე შარაშენიძეს შორის გართულებულ ურთიერთობაზე და ამბობენ, რომ მათ შორის დაძაბულობა უკვე პიკს აღწევს. როგორც კოალიციაში აცხადებენ, ამ დაპირისპირების მიზეზი არის ის, რომ კოტე შარაშენიძემ ზვიად კვაჭანტირაძეს სასურველი კადრები არსად დაუნიშნა. ერთ-ერთ ასეთ ფაქტად ზვიად კვაჭანტირაძის მშობლიური სოფლის, გურიანთის რწმუნებულის პოსტი სახელდება. ჩვენი წყაროს ცნობით, კვაჭანტირაძე ჩაერია რწმუნებულის გათავისუფლების პროცესში და მის შეცვლას ითხოვდა, თუმცა, შარაშენიძემ დეპუტატის თხოვნა არ გაითვალისწინა.
ამის შემდეგ შედგა დეპუტატის შეხვედრა საზოგადოებასთან, სადაც უშუალოდ ზვიად კვაჭანტირაძის ბიუროს მიერ დაპატიჟებული ადამიანები იმყოფებოდნენ. აქვე იმყოფებოდა გამგებელიც. ღონისძიებაზე გამგებლის მიმართ შეურაცხმყოფელი ფრაზები გაისმა. კოალიციის ერთ-ერთი ლიდერის განცხადებით, ეს შეხვედრა კოტე შარაშენიძის “დასაძირად” იყო დაგეგმილი. მისივე თქმით, დიმიტრი კვერღელიძის საკრებულოს თავმჯდომარეობაც სწორედ გამგებლის პოზიციების შესასუსტებლად ჭირდებათ.
მთავარი კითხვა, “მძიმე ორშაბათის” წინ, რომელსაც საზოგადოება სვამს, ასეთია: თუკი თავმჯდომარის ამრჩევი “ნაციონალების” დროინდელი საკრებულოა, რატომ უნდა იყოს ამ დეპუტატების მიერ არჩეული თავმჯდომარე “კარგი” თუ ეს დიმა კვერღელიძე იქნება და რატომ უნდა იყოს “ცუდი”, თუ ეს ავთანდილ სურგულაძე იქნება?
ზვიად კვაჭანტირაძემ “გურია ნიუსთან” სკანდალურ შეხვედრაზე ასეთ კომენტარს აკეთებს:
_ ბევრი საუბრობს, რომ ეს შეხვედრა მე მოვუწყვე კოტეს. ეს შეიძლება, ერთის მხრივ ასეც მოგეჩვენოთ, მაგრამ მე ვფიქრობ, რომ ყველა ის კრიტიკა, რომელიც იმ დღეს ისმოდა გამგებლის მიმართ, ჩემს მიმართაც იყო მომართული. ბოლოს და ბოლოს, ამ ფაქტებზე დაყრდნობით, ხომ შეიძლება გაირჩეს მტყუან- მართალი? მე ვერავის დავუხურავ კარს, ვისაც ჩემთან შეხვედრა უნდა, მე ვერ გავაგდებდი ვერავის…
ერთ-ერთი დეპუტატის თქმით, თუ კენჭისყრა დაფარული იქნება, მაშინ თავმჯდომარე შარაშენიძის კადრი სურგულაძე გახდება, თუ ღია, _ მაშინ კვერღელიძე. დეპუტატი ამას იმით ხსნის, რომ სხდომაზე დასწრებას მაჟორიტარი დეპუტატი ზვიად კვაჭანტირაძე აპირებს და შესაძლოა, საკრებულოს წევრები სხვა კანდიდატზე ღიად თავისი პოზიციის დაფიქსირებას მოერიდონ.
სხდომას დაესწრებიან ასევე თბილისიდან მოწვეული სტუმრები, კვაჭანტირაძის თანმხლებნი და ასევე დიმა კვერღელიძის მხარდამჭერები. იქნებიან კოტე შარაშენიძის მხარდამჭერებიც. საინტერესოა ერთი დეტალიც, დიმიტრი კვერღელიძე გამგებელს, უკანონოდ დანიშნულს უწოდებს და დღემდე ისმის მისი მისამართით ბრალდებები, რომ შარაშენიძე იმ საკრებულომ აირჩია, რომელიც “ნაციონალებისაა”.
“საინტერესოა, ეს იგივე საკრებულო არაა, ის დეპუტატები არ არიან, რომლებმაც ასევე ერთხმად უნდა დაამტკიცონ საკრებულოს თავმჯდომარედ დიმიტრი კვერღელიძე?”_ აცხადებენ “გურია ნიუსთან” საჯარო მოხელეები, რომლებიც ორშაბათის მოლოდინში არიან.
“გურია ნიუსს” რამდენიმე თვის წინ წყარომ აცნობა, რომ დიმიტრი კვერღელიძე იბარებდა საკრებულოს დეპუტატებს და ეუბნებოდა, თუ მხარს არ დამიჭერთ, სოფლის პროგრამებს პროკურატურა შეისწავლის და საქმე კარგად არ წაგივათ, წინააღმდეგ შემთხვევაში კი პროკურატურა გაჩუმდებაო.
ამ ინფორმაციას დიმიტრი კვერღელიძე უარყოფდა. როცა ჩვენმა წყარომ კიდევ ერთხელ შეგვატყობინა, რომ კვერღელიძეს საკრებულოს ფრაქცია “ერთობის” თავმჯდომარის თემურ მოქიას ოთახში ჰყავდა დეპუტატები შეკრებილი, ჩვენ ადგილზე მივედით იქ და ფაქტიც დადასტურდა: საკრებულოს დეპუტატი, პარტია “თავისუფალი დემოკრატების” ლიდერი დიმიტრი კვერღელიძე, ფრაქცია “ერთობის” თავმჯდომარის თემურ მოქიას ოთახში საკმაოდ ხმამაღლა ესაუბრებოდა დეპუტატებს: თემურ მოქიას, ვალია გირკელიძეს, მერაბ მჟავიას, კობა ხაბალაშვილს და ხვიჩა კილაძეს. თუმცა, მან ჩვენი შესვლისთანავე დატოვა ოთახი.
ამის შემდეგ მას ტელეფონით ვესაუბრეთ:
_ ბატონო დიმიტრი, დღეს რა სახის შეხვედრა გქონდათ დეპუტატებთან?
_ ჩვეულებრივი შეხვედრა გვქონდა, როგორც ყოველთვის, ისეთი.
_ ბატონო დიმიტრი, გვაქვს ინფორმაცია, რომ თქვენ საკრებულოს დეპუტატებს გუშინ და დღეს თხოვდით, მხარი დაგიჭირონ საკრებულოს თავმჯდომარის პოსტზე და თუ ასე არ მოხდება, დაემუქრეთ, რომ პროკურატურა არ გავიდოდა საკრებულოდან. მხარის დაჭერის შემთხვევაში კი, პროკურატურას გაიყვანდით. შეესაბამება თუ არა ეს ინფორმაცია სინამდვილეს?
_ ტყუილი არაფერში მჭირდება, დეპუტატებთან მაქვს ყოველდღიური შეხვედრა. მე რომ საკრებულოს თავმჯდომარეობაზე მაქვს ამბიცია, ეს არ არის ახალი. მე ვიყავი ყველაზე დიდი ფრაქციის თავმჯდომარის თემურ მოქიას ოთახში, სადაც დეპუტატები იყვნენ შეკრებილი. აქ მართლა იყო საუბარი იმაზე, რომ დამიჭირონ მხარი. მე ვუთხარი დეპუტატებს, რამდენ ხანს უნდა ვუყუროთ უმოქმედო საკრებულოს თავმჯდომარეს,-მეთქი? ვუთხარი ისიც, რომ მათ გადადგან ერთადერთი სწორი ნაბიჯი, რადგან მამეშვილი ამას ვერ ხვდება თავისით. საკრებულომ მიიღოს გადაწყვეტილება, რომ მამეშვილმა დატოვოს საკრებულოს თავმჯდომარის პოსტი. ამ ადამიანის თავმჯდომარეობის დროს, საკრებულო გახდა უმოქმედო. მისი მმართველობის დროს, მილიონობით ლარია დახარჯული არამიზნობრივად. მეტი რა უნდა ქნას? მაინც და მაინც კაცი უნდა მოკლას მამეშვილმა, რომ პასუხის აგოს? მომისმინეთ ყველამ საკრებულოს სხდომაზე და გაიგებთ, მე როგორ კვალიფიციურად ვხსნი ყველაფერს.
_ ბატონო დიმიტრი, კიდევ გიმეორებთ კითხვას. როგორც “გურია ნიუსს“ აცნობეს, თქვენ დეპუტატებს, მხარის დაჭერის შემთხვევაში, პირობა დაუდეთ, რომ პროკურატურა ძიებას შეწყვეტდა… წინააღმდეგ შემთხვევაში კი, შეიძლება, დადგეს სხვა შედეგი…
_ ჩემი ცხოვრების მანძილზე კანონის დამცველი კაცი ვიყავი და ასე ხდება დღესაც. დიმა კვერღელიძის გადასაწყვეტი არაა, პროკურატურის შეყვანა საკრებულოში და მერე იქედან მისი გამოყვანა. ეს ჩემთვის არ უკითხავს პროკურატურას და არც შემეკითხება, _გვითხრა კვერღელიძემ.
ის განმარტავდა, რომ გამგებლობაც არის საკონკურსო თანამდებობა და იმის ეჭვი არ უნდა გაუჩნდეს ვინმეს, რადგან გამგებელი წარმოადგენს “ქართულ ოცნებას”, მას ერთი წელი ხელშეუხებლობა უნდა ჰქონდეს.
საკრებულოს ერთ-ერთ სხდომაზე კვერღელიძემ პირადად ალეკო მამეშვილს მიმართა:
_ გადახედეთ თქვენს თავს, გაქვთ კი უფლება, რომ ჩაატაროთ კონკურსი? როგორ შეიძლება საზოგადოებამ თქვენ გამოგიცხადოთ ნდობა? როგორ შეიძლება იყოთ ობიექტური, როცა ნებისმიერ ადამიანს თანამდებობაზე ნიშნავდით პოლიტიკური ნიშნით. მართალია, თქვენი ბოლო მრჩეველი მერაბიშვილი უკვე აღარ გყავთ და მიკვირს, ახლა, თქვენ იქ რატომ არ ბრძანდებით მის მხარდასაჭერად! წინასაარჩევნოდ ეს ადმინისტრაციული შენობა გადაქცეული გქონდათ წინასაარჩევნო კამპანიად, ახლა კი ბოლო შანსი მიეცა “ნაციონალურ მოძრაობას” იმისა, რომ ამ კონკურსით ბოლო შანსი მიეცათ შეუნარჩუნდეთ ამ ადამიანებს სამსახური და კიდევ ერთხელ ფარულად დანიშნული იქნას ის ადამიანები, რომლებიც მომავალში კვლავ დარჩებიან „ნაციონალების“ მხარდამჭერებად.
მან, საკრებულოს თავმჯდომარეს ულტიმატუმიც წაუყენა, _ იგი არ ასახელებდა კერძო პირს, ინდმეწარმეს, რომელსაც, იანვრის თვეში შვებულებაში მყოფმა მამეშვილმა “რაღაც დოკუმენტზე” ხელი მოუწერა დეკემბრის რიცხვით.
მისივე ვარაუდით, აქ რაღაც გარიგებას უნდა ჰქონოდა ადგილი. მაშინ კვერღელიძემ “გურია ნიუსთან“ საუბრისას განაცხადა, რომ მამეშვილს აძლევს დროს, 24 საათს, გადადგას საჭირო ნაბიჯი, რაშიც, მისივე თქმით გადადგომა იგულისხმა.
თუმცა, მაშინ არც მამეშვილი გადადგა და ვერც კვერღელიძემ დაუდო შეპირებული კომპრომატი.
“ქართული ოცნება-დემოკრატიული საქართველოს” ოზურგეთის რაიონული ორგანიზაციის თავმჯდომარე დავით დარჩია “გურია ნიუსთან” მიმდინარე მოვლენებზე საუბრობს:
_ ბატონო დავით, ორშაბათს ოზურგეთის საკრებულოს სხდომა ტარდება. ეთანხმებით თუ არა ზვიად კვაჭანტირაძის გადაწყვეტილებას, საკრებულოს თავმჯდომარის პოსტზე საკრებულოს წევრებმა დიმიტრი კვერღელიძის კანდიდატურა წარადგინონ?
_მე ცალსახად განვაცხადე და ბატონ ზვიადსაც ვუთხარი, თქვენც გულწრფელად გეუბნებით, რომ პატივს ვცემ საკრებულოს გადაწყვეტილებას. გულწრფელად ვცდილობდი და ვცდილობ, რომ ვინმეს ჩემი კანდიდატურა თავზე არ მოვახვიო, რასაც გადაწყვეტს საკრებულო, იმას მივესალმები და იმ ადამიანთან ვითანამშრომლებ. რა თქმა უნდა, პროტესტს არ გამოვხატავ ამ ადამიანის მიმართ, მაგრამ მე ჩემი პოზიცია დავაფიქსირე ამასთან დაკავშირებით, საკრებულოში 37 დეპუტატია. მე, დათო დარჩია არ ვარ ის ადამიანი, რომ ვინმეზე ზემოქმედება მოვახდინო.
_ ბატონო დავით, რას გვეტყვით კოტე შარაშენიძისა და ზვიად კვაჭანტირაძეს შორის არსებულ ურთიერთობაზე? ერთ შემთხვევაში მაჟორიტარი აცხადებდა, რომ მხარს უჭერდა გამგებელს, მეორე შემთხვევაში კი ის მხარს უჭერს ადამიანს, რომელიც აშკარად უპირისპირდება გამგებელს. უცნაურად არ გეჩვენებათ ეს ყველაფერი?
_საზოგადოებამ იცის, რომ ჩვენ, მე და კოტეს ბევრი საერთო გვაკავშირებს, გარკვეული პერიოდი, წინასაარჩევნოდ დაწყებული ბრძოლიდან დღემდე ათას ქარცეცხლში გამოვიარეთ, წყენა, სიხარული, ათასი რამ გვქონდა. ამიტომ მე დღეს ასე ვთვლი, რომ ბატონი კოტე შარაშენიძე თავის უფლებამოსილებას პირნათლად ასრულებს, რაც შეუძლია, იმას აკეთებს. რაც შეეხება დაპირისპირებას, გეტყვით გულწრფელად, ადამიანები ვართ ყველა, იმედი მაქვს, ყველაფერი დარეგულირდება და მოგვარდება, გამოინახება, ალბათ, რაღაც გზები…მე ყველას მოვუწოდებ, ვისაც გული შესტკივა ამ პროცესების სამართლიანად და მშვიდობიანად ჩატარებაზე, პატივი ვცეთ ერთმანეთის აზრს.
ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე “გურია ნიუსთან” აცხადებს, რომ ამ თემაზე კომენტარის გაკეთება ჯერ მიზანშეწოლილად არ მიაჩნია.
_ კი იცით ათას რაღაცას მაბრალებენ, სიტუაცია დაძაბულია, თუმცა იმედი მაქვს, რომ ყველაფერი კარგად იქნება, პატივს ვცემ საკრებულოს გადაწყვეტილებას, რაც შეეხება ჩემსა და მაჟორიტარ დეპუტატს შორის დაპირისპირებას, ამაზე კომენტარის გაკეთება არ მიმაჩნია სწორად, ამ ეტაპზე მაინც… ვნახოთ, დაველოდოთ ორშაბათს. ერთი რამ კი მინდა ვთქვა, რომ ყველამ ყველაფერი იცის, ვინ ვინაა, ვინ რას წარმოადგენს, რას ვაკეთებ მე და რას სხვა, _ განაცხადა შარაშენიძემ.
