იზორია თვლის, რომ სოდისა და კუდის თანამშრომლებმა 1 ოქტომბერს სისტემის შეცვლის ცალსახა სურვილი გამოთქვეს, როდესაც ხმა “ქართულ ოცნებას” მისცეს.
“კუდი და სოდი მართალია გაუქმდა , მაგრამ ეს იმას არ ნიშნავს , რომ ყველა ის თანამშრომელი, ვინც მერაბიშვილის სამსახურში იყო დავითხოვოთ . იცით, რომ “მოდულის” შენობაში 1 ოქტომბრის არჩევნებში ხმების უმრავლესობა მიიღო სწორედ ოპოზიციამ, იცით ამ ფაქტის შესახებ? თანამშრომელთა უმრავლესობა იყო შეშინებული, სისტემის მსხვერპლი.”
იზორია თვლის, რომ ყველა სისტემის მსხვერპლია, მათ შორის ის გალელი ტრაქტორისტიც, რომელიც პატიმრებს აწამებდა.
უფლებადამცველ ნანა კაკაბაძის აზრით, იზორიას პოზიცია თავისთავად არის დანაშაული.
“რა მნიშვნელობა აქვს ხმას ვის მისცემენ, თუ დანაშაული აქვთ ჩადენილი.იზორიას პოზიცია დანაშაულია, დანაშაულის დაფარვაა. რადგან “ქართულ ოცნებას” მისცეს ხმა, უნდა ეპატიოთ ყველაფერი?”
“გაუგებარია რასთან გვაქვს საქმე. ერთის მხრივ ვანგრევთ სოდს და კუდს, როგორც ბოროტების ბუდეს და მეორეს მხრივ ადამიანებს, რომლებიც წლების განმავლობაში ხელს უწყობდნენ ამ უკანონობას, ვაწინაურებთ? მაგალითისთვის ავიღოთ შინაგან საქმეთა სამინისტროს მაღალჩინოსანი დავით ბედია, რომელიც ყველამ ნახა, რომ 8 თებერვალს სტუდენტების აქციას არბევდა.დღეს ეს ადამიანი დაწინაურებულია. პროკურორი ბესო თხელიძე, რომელიც საპროცესო ზედამხედველობას უწევდა სოდს და კუდს, ასევე დაწინაურებულია (საქართველოს მთავარი პროკურატურის საგამოძიებო ნაწილი დეპარტამენტის უფროსის მოადგილე ). ასევე პოლიციელ დავით გელაძეს, რომელმაც რამდენიმე დღის წინ ვაკეში ახალგაზრდა ბიჭი დაჭრა, შს სამინისტრო 2 კვირის განმავლობში აფარებდა ხელს. ეს ის პოლიციელია, რომელმაც ჩემს საქმეში ნარკოტიკი ჩაუდო ირინა ლეჟავას და მის ძმას შანტაჟით დაადებინა ჩემზე ხელი”_ ამბობს ყოფილი პოლიტპატიმარი ლევან გოგიჩაიშვილი.
მთავარი პროკურორის მოადგილე კახა წერეთელი პროკურატურაში ძველი კადრების ლობირებას გამორიცხავს და შესაბამის სტატისტიკას იშველიებს.
“გარწმუნებთ, ძველი კადრების უმრავლესობა, განსაკუთრებით ხელმძღვანელი პირები შეცვლილები არიან . უკანასკნელი თვეების განმავლობაში, ხელმძღვანელი 50 პირიდან 38 გათავისუფლებულია თანამდებობიდან. შეცვლილია ყველა იმ დეპარტამენტის უფროსი და მოადგილე, რომლებიც დაკავებულები არიან უშუალოდ საგამოძიებო პროცესით. თბილისის პროკურორი და მოადგილეები შეიცვალნენ. ბოლო კვირებში შეიცვალა დედაქალაქის ხუთივე რაიონული პროკურორი. ასევე ყველა საოლქო პროკურორი და მოადგილეები. ასევე რაიონული პროკურორების უმრავლესობა. 170-მდე ახალი გამომძიებელი და პროკურორი დავიმატეთ, მათ შორის 70 წარსულში ადვოკატი იყო. რაც შეეხება ბესო თხელიძეს, ლევან, თქვენ ცალკე გეტყვით რა დონეზე მოხდა მისი დაწინაურება”.
გამოთქმა “სისტემის მსხვერპლი” განსაკუთრებით პოპულარული მას შემდეგ გახდა, როდესაც გია ხუხაშვილმა ამ ტერმინით ბაჩო ახალაი და სხვადასხვა დანაშაულებში ბრალდებული ყოფილი მაღალჩინოსნები მოიხსენია.
