ამოტომ გადავწყვიტეთ ფართო საზოგადოებას მოვუთხრო გოგონას შესახებ, რომლის სახელი უკვე გასცდა საქართველოს ფარგლებს და სპორტულ სამყაროში, ასაკის მიუხედავად, თავისი ადგილი დაიმკვიდრა.
მარიამ ჭანტურია აბაშაში ცხოვრობს. გოგონას ძალიან უყვარს სპორტი და თავადაც ვარჯიშობს კინბოქსინგსა და სანდაში. 4 წლის განმავლობაში მრავალ ჩემპიონატში თუ ტურნირში მიიღო მონაწილეობა, საქართველოს მრავალგზის ჩემპიონი და საერთაშორისო ტურნირების გამარჯვებული გახდა.
2008 წლიდან, მარიამმა მამუკა ალანიას ხელმძღვანელობით დაიწყო ვარჯიში კინბოქსინგსა და სანდაში. ერთი წლის შემდეგ გოგონა საქართველოს ჩემპიონი გახდა სანდაში. იმავე წელს ბაქოში ჩატარებულ საერთაშორისო ტურნირშიც მიიღო მონაწილეობა და პირველი ადგილი დაიკავა. 2009 წელს აჭარის შავი ზღვისპირეთის თასზე ბავშვებსა და მოზარდებს შორის პირველი ადგილის მფლობელი გახდა.
2010 წელს მარიამი სანდაში საქართველოს სამგზის ჩემპიონი გახდა. 2010 წელსვე აჭარაში ახლა უკვე კინბოქსინგში ჩატარდა ჩემპიონატი და აქაც საქართველოს ჩემპიონობა მოიპოვა. 2010 წლის 26 დეკემბერს გაემგზავრა ბაქოში, მოიგო საერთაშორისო ჩემპიონატი სანდაში და გამარჯვებული დაბრუნდა სამშობლოში.
2011 წელს მონაწილეობა მიიღო აფხაზეთის ღია ჩემპიონატში ხელჩართულ ბრძოლაში და მეორე ადგილის მფლობელი გახდა. 2011 წლის 21-22 მაისს თბილისში ჩატარდა საქართველოს მორიგი ჩემპიონატი სანდაში. მარიამმა აქაც ისახელა თავი და საქართველოს ჩემპიონი გახდა. 2011 წლის 10 ივნისს ზესტაფონში გამართულ დასავლეთ რეგიონის პირველობაზე სანდაში მარიამმა პირველი ადგილი მოიპოვა.
მწვრთნელი ხედავდა მარიამის დიდ მომავალს და ურჩია, ვარჯიში თბილისში გაეგრძელებინა. გოგონა თბილისში გადავიდა და ვარჯიში თამაზ კარიაულთან და გიგა ბოჭორიძესთან გააგრძელა. მისი წარმატებები უფრო და უფრო გაიზარდა _ 2011 წლის 10 დეკემბერს, 17 წლამდე გოგონათა შორის ჩატარებულ საქართველოს პირველობაზე 40 კგ. წონით კატეგორიაში პირველი ადგილი დაიკავა. 2012 წელს საქართველოს სარეიტინგო პირველობაში 1999-2000 წლებში დაბადებულ გოგონათა შორის 40 კგ. წონით კატეგორიაში ისევ პირველი ადგილი აიღო. იმავე წონით კატეგორიაში ძიუდოს მსოფლიო დღეზე, 2012 წლის 28 ოქტომბერსაც პირველი ადგილის მფლობელი გახდა. ამავე წელს უკვე 44 კგ. წონით კატეგორიაში, 17-18 მაისს ჩატარებულ ჩემპიონატზე საქართველოს ჩემპიონის ტიტული მოიპოვა; ამ ტიტულის მფლობელი გახდა 2013 წლის 16-17 თებერვალს ჩატარებულ ჩემპიონატზეც. მორიგი წარმატება გოგონამ, 2013 წლის 27 მაისს უკვე თურქეთში, ქ. კარასუსში ჩატარებულ თურქეთის ღია ჩემპიონატზე მოიპოვა _ მან 48 კგ. წონით კატეგორიაში პირველი ადგილი აიღო.
მარიამი 2012 წლიდან საქართველოს ძიუდოს ნაკრების წევრია. მომავალ წელს გოგონა მსოფლიო ჩემპიონატში მიიღებს მონაწილეობას. მორიგი წარმატების მოსაპოვებლად განსაკუთრებული ვარჯიში სჭირდება, მაგრამ მშობლებმა გოგონა თბილისიდან ისევ აბაშაში დააბრუნეს მძიმე ფინანსური პირობების გამო. მამამისის თქმით, ბინის ქირის გადახდა უჭირთ და იძულებულები გახდნენ, გოგონა თბილისიდან წამოეყვანა.
მარიამი და მისნაირები საქართველოს მომავალია, უკეთესი მომავლისთვის კი ინვესტიცია სწორედ აწმყოში უნდა ჩაიდოს. დარწმუნებული ვართ, გოგონა კიდევ მრავალ წარმატებას მიაღწევს და საქართველოს ღირსებას წარმატებით დაიცავს მსოფლიო ჩემპიონატზე.
ამიტომ გვინდა, პირველ რიგში მოგმართოთ იმ რაიონის მუნიციპალიტეტის ხელმძღვანელებს, სადაც მარიამი ცხოვრობს, ბიზნესმენებს, კომპანიებს, ყველა იმ ადამიანს, რომლებსაც შეგიძლიათ საქართველოს კიდევ ერთი ძლიერი სპორტსმენი აჩუქოთ _ გამოეხმაურეთ მარიამს და აიღეთ შეფობა მასზე.
