_ ბატონო ბიძინა, ჩვენ, კოოპერატიული ბინათმშენებლობის წევრებს, 25 წლიანი ლოდინის შემდეგ, თქვენი მოსვლით ხელისუფლებაში (რაშიც ჩვენი მოკრძალებული წვლილიც არის) დიდი იმედი ჩაგვესახა, რომ ახლა მაინც მივაღწევდით მიზანს _ სახელმწიფოსაგან აღიარებული ვალის მიღებას. ეს იმედი გაგვიმყარა 2012 წლის 17 მაისს თქვენთან შეხვედრამ, სადაც ბრძანეთ: „როცა ჩვენ ხელისუფლებაში მოვალთ, ამ საკითხს უახლოეს მომავალში გადავწყვეტთ. ამ პრობლემის მოგვარება ჩვენი პირველი რიგის ამოცანა იქნება“.
2012 წლის 26 ივნისს ჩვენთან შეხვედრის სურვილი გამოთქვა ბატონმა დავით ონოფრიშვილმა, რომელმაც განგვიცხადა: “ ჩვენ აქედანვე შემუშავებული გვაქვს გეგმა თქვენი ვალის გასტუმრებისა. შესაძლებელია ეს მოხდეს კერძო კომპანიებიდან ბინების შესყიდვით და თქვენთვის გადმოცემით, რაც ყველაზე მიზანშეწონილად მიგვაჩნია და ხელისუფლებაში ჩვენი მოსვლის შემთხვევაში ამას ოპერატიულად განვახორციელებთ“.
2012 წლის 12 ნოემბერს საქართველოს პარლამენტის საფინანსო-საბიუჯეტო კომიტეტის სხდომაზე თავად ფინანსთა მინისტრმა დაავალა აპარატის უფროსს, რომ სასწრაფოდ შექმნილიყო ამ მიმართებით „სამუშაო ჯგუფი“ და მასში გაერთიანებულიყო სხდომაზე წარმოდგენილი არასამთავრობო სექტორისა და საინიციატივო ჯგუფის წარმომადგენლები.
2012 წლის 12 დეკემბერს თქვენს მიერ განახლდა წინა ხელისუფლებისგან ფიქტიურად შექმნილი „სახელმწიფო ვალის შემსწავლელი სახელმწიფო კომისიის“ საქმიანობა, რომელმაც, თავის მხრივ, ა/წ 25 დეკემბერს, ჩვენი პრობლემის მოსაგვარებლად, შექმნა „სამუშაო ჯგუფი“.
2013 წლის 20 მარტს შეხვედრა შედგა ფინანსთა მინისტრსა და ცენტრ „ერთობას“ შორის, სადაც ბატონმა ნოდარ ხადურმა აღნიშნა, რომ უახლოეს სამ კვირაში მოიწვევდა „სახელმწიფო კომისიის“ სხდომას (თავმჯდომარე ბ-ნი ნ. ხადური), სადაც დასწრების საშუალება ექნებოდა არასამთავრობო სექტორსა და დაზარალებულთა წარმომადგენლებს. ამასთანავე, მინისტრმა ცენტრ „ერთობას“ სთხოვა მოეწოდებინა დოკუმენტაცია ამ სფეროში არსებულ დანაშაულებრივ დარღვევებზე, რაც მეორე დღესვე იქნა წარდგენილი. ამასთანავე ცენტრმა „ერთობამ“ შესაბამისი ახსნა-განმარტებაც გადასცა ფინანსთა სამინისტროს საგამოძიებო სამსახურს, თუმცა დღემდე არავითარი რეაგირება არ მომხდარა.
2013 წლის 25 მაისს თბილისის სახელმწიფო უნივერსიტეტის გაზეთის საიუბილეო საღამოზე ფინანსთა მინისტრმა, თბილისის სახელმწიფო სამედიცინო უნივერსიტეტის კოოპერატიული ბინათმშენებლობის თავმჯდომარესთან, ქ-ნ დალი გაბეშიასა და გამგეობის ორ წევრთან საუბრისას თქვა:„ ყველაფერს ვაკეთებთ ამ საქმის ბოლომდე მისაყვანად. დავიჭირეთ თადარიგი ცხრა სართულიანი კორპუსების მოსაძიებლად და შესასყიდად. ეს ჩვენი წინასაარჩევნო დაპირებაა თქვენს მიმართ და ამას უმოკლეს დროში შევასრულებთ. ამის შესახებ ოფიციალურად გეცნობებათ ნოემბრის თვეში, როცა 2014 წლის ბიუჯეტში აისახება გასასტუმრებელი ვალის ოდენობა“.
ბატონო ბიძინა, აქ ჩამოთვლილთაგან ყველაფერი მხოლოდ დაპირებად დარჩა. წინ ერთი ნაბიჯიც არ გადადგმულა პრობლემის მოსაგვარებლად. რაც მთავარია, ფინანსთა სამინისტრომ უგულებელყო პროცესების გამჭვირვალობა და სამოქალაქო სექტორის ჩართულობა.
ბატონო პრემიერ-მინისტრო, მოვლენების მიმდინარეობა გვარწმუნებს, რომ მიზანმიმართულად ხდება კოოპერატიული ბინათმშენებლობის წევრთა 8000-მდე ოჯახის მეტად მწვავე პრობლემის იგნორირება. ირღვევა ადამიანის ყველაზე მთავარი უფლება საკუთარი „საცხოვრისის“ შესახებ. ასევე ხდება, მათი, საკმაოდ სოლიდური რაოდენობის, დღევანდელი ხელისუფლების მიმართ უკმაყოფილოთა რიგებში ჩართვა.
გთხოვთ სამართლიანობის აღდგენას! _ აღნიშნულია წერილში.
