ჩოლობარგის მოსახლეობა სასმელი წყლის პრობლემა უკვე დიდი ხანია აწუხებს. როგორც ადგილობრივები აცხადებენ, ერთი წლის წინ, მუნიციპალიტეტის ბიუჯეტიდან გამოიყო თანხა _ 130 ათას ლარი: "ამ თანხით უნდა მომხდარიყო სასმელი წყლით მომარაგების პრობლემის მოგვარება, მაგრამ მთავარ სათაო ნაგებობას მიუერთეს მილები, რომელშიც ღელის წყალი მიედინება და ამით დამთავრდა სამუშაოები. დაწყებული სამუშაოები არ არის ბოლომდე მიყვანილი, ჩაყარეს უხარისხო მილები, ასევე არ არის დაყენებული წყლის ფილტრები. ეს ტექნიკური წყალიც უვარგისია, განსაკუთრებით ნაწვიმარზე საშინელი სიბინძურე მოყვება, დაბანაც კი შეუძლებელია ამ წყლით," _ ამბობს მოსახლეობა.
ჩოლობარგის დასახლება ახალ მთავრობას თხოვნით მიმართავს, იქნებ, გაგრძელდეს დაწყებული სამუშაოები და ბოლომდე იქნას მოგვარებული ეს პრობლემა; გამოძიებულ იქნას, რაში გაიხარჯა ის 130 ათასი ლარი, რომელიც სასმელი წყლისთვის გამოიყო: "150 ოჯახო ღელის წყალს ვსვამთ, რაც უვარგისია და ვნებს ჩვენს ჯანმრთელობას," _ ამბობენ ჩოლობარგელები.
"ეს პრობლემა დღემდე მოუგვარებელია, ზაფხული მოვიდა და ვიხრჩობით უწყლოდ", _ ეუბნებიოდნენ მოსახლეობასთან შეხვედრაზე მისულ გამგებლის მოვალეობის შემსრულებელს ზაზა ურუშაძეს ადგილობრივები.
მასალა მომზადებულია ფონდის "ღია საზოგადოება _ საქართველოს" მიერ დაფინანსებული პროექტის _ "დათვალე საკუთარი ფული!", ფარგლებში
და მასში გამოთქმული მოსაზრება არ გამოხატავს ფონდის პოზიციას.
