ჰელმანდის პროვინციის ეს ურთულესი სოფელი არაკონვენციური (მტრული) მოქმედებებიდან ნელ-ნელა გადავიდა ISAF-ის ძალებთან თანამშრომლობაზე. ცოტა ხნის წინ, სოფელში, რომელიც განლაგებულია მუსაქალას რაიონში და ძალიან საშიში და მტრულად განწყობილი დასახლებას წარმოადგენდა, ქართველების წყალობით, სიმშვიდემ დაისადგურა.
კაპიტანი ჯემალ წითაძე: “ყველაზე დიდ საფრთხეს ჩვენი მოქმედების რაიონში თალიბანის მებრძოლები წარმოადგენენ, რომლებიც გვებრძვიან სხვადასხვა ტაქტიკით (ხელნაკეთი ასაფეთქებელი მოწყობილობების დადება, ჩასაფრება), მაგრამ გასულ წლებთან შედარებით, მდგომარეობა საგრძნობლად გაუმჯობესდა. ეს ავღანელი პოლიციელი დაიჭრა აფეთქების შედეგად და დაკარგა თანამებრძოლი. მას პირველად სამედიცინო დახმარებას უწევენ ქართველი ჯარისკაცები ბაზა “ერთობაზე”. ქართველებთან და ავღანელებთან ერთად მუშაობენ ამერიკელი საზღვაო-ქვეითები, რომლებიც უზრუნველყოფენ საცეცხლე მხარდაჭერას.”
ამერიკელი საზღვაო ქვეითი კაპიტანი ნაით ვარზენი: “რა თქმა უნდა, მოსახლეობის უნებლიე დაზიანება ხდება ჩვენი მხრიდან, მაგრამ იგივე ხდება ავღანური მხრიდანაც მოსახლეობის მიმართ, მიუხედავად ამისა, ჩვენ განვაგრძობთ მუშაობას ერთიანი ძალისხმევით.”
ამ დროისთვის ბაზა „ერთობის“ ირგვლივ სიმშვიდეა, მაგრამ თალიბანს არ სძინავს და ისინი პერიოდულად ახდენენ თავდასხმებს. თალიბანი უფრო აქტიურია მაშინ, როდესაც ყაყაჩოს მოსავლის დრო დგება, ბალახი ამოსულია და მათ შეუძლიათ თავის შეფარება გაფოთლილ ხეებში.
ქართველები აწარმოებენ ყოველდღიურ პატრულირებას, რათა ხელი შეუწყონ ადგილობრივი მთავრობის მშვიდობიან და თავისუფალ გადაადგილებას რაიონში.
წარმატების მიღწევა რთულია, რადგანაც ის ჯარისკაცების სიცოცხლის ფასად ხდება.
