_ ფაშიზმზე გამარჯვების დღეს ჩვენ ვიწყებთ აქციებს ამ რეჟიმის შესაცვლელად და მთელ საქართველოს დავანახებთ, თუ როგორ განწყობაზეა “ქართული პარტია” და ქართველი ხალხი,” _ აღნიშნა “ინტერპრესნიუსთან” საუბრისას კიწმარიშვილმა.
მისივე თქმით, აქციები მთელ საქართველოს მოიცავს და რაიონებშიც გაიმართება. თუმცა, როგორც გავარკვიეთ, ამ განცხადების გაკეთების დღეს _ 5 მაისს, “ქართული პარტიის” რაიონულმა ორგანიზაციებმა აქციების დაწყების შესახებ არაფერი იცოდნენ.
“ქართული პარტიის” ჩოხატაურის ორგანიზაციას 150 წევრი ჰყავს, თუმცა, პარტიის ადგილობრივი ორგანიზაციის მდივანმა ვერ გვიპასუხა, გამოვა თუ არა ეს ხალხი ქუჩაში.
ჩოხატაურის რაიონული ორგანიზაციის ხელმძღვანელის მოადგილე, თამაზ ჩხიკვიშვილი ამბობს, რომ აქციის შესახებ ტელევიზიით გაიგო და მისთვის უცნობია, რა ფორმით მოეწყობა აქცია ჩოხატაურში.
ამავე პარტიის ლანჩხუთის ორგანიზაციის ხელმძღვანელი მერაბ ქარჩავაა. ჩვენთან საუბრისას იგი ამბობს, რომ აქციების დაწყების შესახებ ტელევიზიით შეიტყო:
_ მეც ის ვიცი, რაც თქვენ. აქციების დაწყების შესახებ ტელევიზიით გავიგე. პარტიიდან არავინ დაგვკავშირებია და არაფერი უთქვამთ, _ გვითხრა ქარჩავამ.
აქციების დაწყების შესახებ ინფორმაციას არც “ქართული პარტიის” ოზურგეთის ოფისის ხელმძღვანელი, გოჩა გორდელაძე ფლობდა:
_ ჩემთვის აქციების შესახებ არავის უცნობებია. არაფრის საქმის კურსში არ ვარ ჯერჯერობით, _ აღნიშნა 6 მაისს, დღის ბოლოს, გორდელაძემ.
“ქართული პარტიის” პრესსამსახურის ხელმძღვანელის, ლია ყავლაძის ინფორმაციით, აქცია ერთბაშად, ყველა რეგიონში არ გაიმართება:
_ პარტიის ხელმძღვანელები დღეს გორში არიან (საუბარი ჩაწერილია 6 მაისს). ხვალ სხვა ქალაქში წავლენ. ნელ-ნელა ყველა რეგიონს მოვიცავთ.
ყავლაძის თქმით, უცნობია, რამდენ ხანს გასტანს აქციები და ისიც, როდის მოუწოდებენ გურულებს ქუჩაში გამოსვლისკენ.
რაც შეეხება “სახალხო კრებას”, მისი წევრები ისინი დათქმულ 21 მაისს ელოდებიან. ამ დღისთვის მზად არიან ადგილობრივი ორგანიზაციებიც.
“სახალხო კრების” ჩოხატაურის კომიტეტის თავმჯდომარე მამია ბარამიძე სააკაშვილის რეჟიმის დამხობას 21 მაისს, ბათუმიდან გეგმავს. მისივე თქმით, შესაცვლელი მხოლოდ ცენტრალური მთავრობაა:
_ 21 მაისს ჩვენ ბათუმში ვიქნებით. ერთი მიკროავტობუსით მიმყავს ხალხი.
_ ასე ცოტა მხარდამჭერით აპირებთ სააკაშვილის გადაყენებას?
_ მეტი არ არის საჭირო. იქ სხვები დაგვხვდებიან.
_ ადგილობრივ მთავრობასაც უპირებთ შეცვლას?
_ არა, ადგილობრივს დავტოვებ. ესენი ჩემი მეგობრები არიან და კარგი ხალხია, _ გვითხრა ბარამიძემ, რომელიც ერთი წლის წინ ნოღაიდელთან ერთად აპირებდა “რევოლუციის” მოხდენას.
ლანჩხუთელი ოპოზიციონერი, მაკა კვირკველია აქციებზე წასვლას 21 მაისს გეგმავს:
_ მე ყველა იმ აქციას ვუჭერ მხარს, რომელიც ხალხის საკეთილდღეოდ არის მიმართული. როგორც რიგითი მოქალაქე, რიგითი ადამიანი, წავალ. როგორც ეროვნული საბჭოს გურიის კურატორი, ვასრულებ ყველა იმ დავალებას, რომელიც მოდის ეროვნული საბჭოდან. რა თქმა უნდა, მხარს ვუჭერ მოლაპარაკებებს და მიმაჩნია, რომ ეს აუცილებელია. ყველა ცივილიზებულ და ნორმალურ ქვეყანაში ხელისუფლება არჩევნების გზით უნდა შეიცვალოს, მაგრამ ეს ქვეყანა, არ ვიცი, ვინმეს ცივილიზებულად და დემოკრატიულად თუ მიაჩნია. ასე რომ, ძალიან დიდი იმედი მინდა მქონდეს მოლაპარაკებების, მაგრამ მე მგონი, ჯერ ხელისუფლებას კონკრეტული ნაბიჯი არ გადაუდგამს. ჩვენ ვართ მოლოდინის რეჟიმში და თუ არ წამოვლენ ოპოზიციის წინადადებებზე, მივიღებთ შესაბამის გადაწყვეტილებას. კიდევ ერთხელ ვიმეორებ _ მე აუცილებლად ვიქნები იმ აქციაზე, _ გვითხრა მაკა კვირკველიამ.
