მან გაფრთხილების სახით განაცხადა, მათ შორის, ვინც შენობაში შევარდნას აპირებდა, დაინახა რამდენიმე საჯარო მოხელე: “ვაფრთხილებ ყველა საჯარო პირს _ თუ კი ისინი აღნიშნულ დროზე მათ გვერდით იქნებიან, მაშინ ფაქტია, რომ ეს საჯარო მოხელე არღვევს კანონს და სამუშაო საათებში სამსახურს. თუ გახორციელდება მსგავსი ქმედება, ეს იქნება ადგილობრივ ხელისუფლების მუშაობაში ხელის შეშლა, რაც ისჯება კანონით.”
ეს ინფორმაცია გააჩნდა ” გურია ნიუსსაც” _ აქციის მონაწილეების მოთხოვნა, როგორც წყარო გვატყობინებდა, იქნებოდა საკრებულოს თავმჯდომარისა და გამგებლის მოადგილის, ვახტანგ ზენაიშვილის გადადგომა. თუმცა, მსგავსი არაფერი მომხდარა.
აღნიშნულ საკითხთან დაკავშირდებით მოგვიანებით პრესკონფერენცია გაიმართა, რომელზეც ჯგუფმა, რომელიც საკუთარი თავს “რევოლუციურ ჯგუფად” მოიხსენიებს, განმარტა, თუ რასთან დაკავშირებით უნდა გამართულიყო აქცია.
ნუგზარ ჩხაიძე: “22 ივნისს იგეგმებოდა ეს აქცია, თუმცა აქციას ვერ დავარქმევ, უფრო შეკრება იყო და შედგა კიდეც. გვინდოდა გამოგვეხატა პროტესტი იმ არაადამიანურ ფაქტთან დაკავშირებით, რომელიც ახლახან იქნა ცნობილი საზოგადოებისათვის _ საქმე ეხება სამეგრელოს სამალავში აღმოჩენილ არაადამიანური წამებისა და შეურაცხყოფილი ფაქტების ამსახველ ინფორმაციას. ჩვენში აღშფოთებას იწვევს ის ფაქტი, რომ გამგეობისა და საკრებულოს არც ერთ წევრს არ დაუფიქსირებია თავისი პოზიცია ამ შემაშფოთებელ მოვლენებთან დაკავშირებით.
მოვითხოვთ, ერთხელ და სამუდამოდ დამთავრდეს ეგრეთწოდებული “ჩახუტებული კოჰაბიტაცია”, ვაჭრობა და პროტექცია ხელმძღვანელ სტრუქტურებს შორის და გადაიდგას კონკრეტული ნაბიჯი ძველი ხელისუფლების კრიმინალური, დანაშაულებრივი ქმედების შესაფასებლად. ზემოაღნიშნულის გარდა, მე, როგორც რევოლუციურ ჯგუფში მყოფმა წევრმა ნუგზარ ჩხაიძემ, მინდა დამატებით განვაცხადო შემდეგი _ არჩევნების შემდეგ პირველივე პრესკონფერენციაზე გაკეთებულ განცხადებაში დავაფიქსირე ჩემი პოზიცია და ვთქვი, რომ არ განეხილათ ჩემი კანდიდატურა საჯარო სამსახურში დასაქმების მიზნით. მე მინდოდა რაიონში ბიზნესის და მეწარმეობის განვითარების ხელშეწყობა და მივიღებდი აქტიურ მონაწილეობას პარტია “ქართული ოცნების” ორგანიზაციის მშენებლობაში. არჩევნების შემდეგ განვითარებულმა მოვლენებმა, რამოდენიმეჯერ მაიძულა მეთქვა _ გამომიყენეთ და გამოიყენეთ ჩემი გამოცდილება ნებისმიერ სამსახურში, თუ ამას საჭიროება იქნება. ამჯერად მე საჯაროდ ვაცხადებ _ რადგან რაიონში კვლავ კლინიკურ სიკვდილს განიცდის ბიზნესი და მრეწველობა, გადავწყვიტე, მონაწილეობა მიმეღო საქართველოს გარემოსა და ბუნებრივი რესურსების სამინისტროს მიერ გამოცხადებულ კონკურსში, გურიის სამსახურის უფროსის თანამდებობის დასაკავებლად _ ეს პროცესი, ჯერჯერობით, არ დასრულებულა. ასე რომ, ის ხმები, თითქოს მე გამგებლობა მინდა, არ არის მართალი _ მე თავიდანვე უარი ვთქვი გამგებლობაზე. 22 წელია ბიზნესში ვარ, 8 საწარმო ავამოქმედე და ახლა მათგან 2 ისევ ფუნქციონირებს.”
ნუგზარ ცინცაძე (უმცროსი): “მე არ ვმალავ არაფერს _ საზოგადოება ამიბამს მხარს თუ სხვა ვინმე, არ ვიცი, შეიძლება მარტომაც გავაკეთო _ ნამდვილად არ ვაპირებთ კარების აჭედვას , მაგრამ თხუთმეტი თუ თექვსმეტი ნაციონალი რომ უზის გია გოგუაძესთან ერთად ამირან გიგინეიშვილს, ყველა გამოსაძევებელია მაგ შენობიდან. კანონის ფარგლებში გავაკეთებთ ყველაფერს და თავისი ნებით დატოვებს იქაურობას ყველა. ამირან გიგინეიშვილს რაც შეეხება, რომ დევს იქ და არც უმრავლესობაშია და არც უმრავლესობაში, ფაქტია. არ ვმალავ _ ვიყავით შეკრებილები, რათა აგვეჭედა ნაციონალების ოფისი, შეგვეღება შავი საღებავით. გახშირდა “ნაციონალების” ვოიაჟი _ წინა კვირას, რესტორან “ბაბუნაში” გია გოგუაძე გიგი წერეთელთან და სხვა ნაციონალებთან ერთად ვახშმობდა. ამირან გიგინეიშვილი ვერ დაიხსნის თავს “ნაციონალებისგან”, ისეა გახლართულია მათში. რაც შეეხება გამგეობის შენობაში შესვლას და კარების აჭედვას, ცენტრალურ კარებს ავჭედავთ და ფანჯრებიდან გადმოვა ყველა. ვახტანგ ზენაიშვილს, რომელიც ჩვენი თანამებრძოლი იყო, მაგრამ სინამდვილეში 8 პარტია აქვს მოცლილი, ვპირდები მას, ამირან გიგინეიშვილს და საკრებულოს ნაციონალურ გუნდს, რომ ისინი მალე დატოვებენ იმ შენობას და საერთოდ პოლიტიკურ ასპარეზს. ამის გარანტიას მე, ნუგზარ ცინცაძე ვიძლევი.”
მაია ჩხაიძე: “მე არავისთან შევარდნას არ ვაპირებდი, მით უმეტეს, ამირან გიგინეიშვილის წინააღმდეგ არავინ არაფერს გეგმავს. მისმა კონკურენტმა დავით წულაძემაც აღნიშნა, რომ ამირანის წინააღმდეგ კომპრომატი არ არსებობს. მეტი რაღა უნდა ვთქვათ? ერთი მოსაზრება კი მაქვს _ აღმასრულებელი ხელისუფლებიდან ვახტანგ ზენაიშვილი საკრებულოს თავმჯდომარეზე ზეწოლას ცდილობს. ეს ის ვახტანგ ზენაიშვილია, რომლის წინააღმდეგ სუფსის მოსახლეობა ილაშქრებს, რადგან გამგებლის მოადგილემ მოსახლეობას შეურაცხყოფა მიაყენა. მას აუცილებლად მოუწევს თანამდებობის დატოვება.”
გულნარა ჩიჩუა, აკეთის თემის რწმუნებული: “ყველას კარგად მოგეხსენებათ, როგორ მდგომარეობაშია ჩვენი სოფელი. უნდა ამოვიყვანო ამირან გიგინეიშვილი და ვაჩვენო ეს ყველაფერი _ გაარკვიოს სად წავიდა ის თანხები, რომელიც სოფლის დახმარების პროგრამის ფარგლებში წინასაარჩევნოდ დაიხარჯა; ნახოს, სად უწევს აკეთის თემის მოსახლეობას ცხოვრება _ არა გზა, არა _ წყალი… მგლების ხროვად იქცა სოფელი. მე კი იმას მაბრალებენ, რომ მეამბოხე ვარ. არ ვარ მეამბოხე _ მართალი ადამიანი ვარ!”
დავით წულაძემ და მაკა კვირკველიამ დააფიქსირეს, რომ არავინ არსად შევარდნას არ აპირებდა.
იმის შესახებ, თუ საიდან მიიღო ინფორმაცია შენობაში შეჭრის შესახებ, საკრებულოს თავმჯდომარე ამირან გიგინეიშვილი განმარტავს: “რაკი თქვეს, რომ შენობაში შეჭრას არ ვაპირებდითო, ალბათ, მართლებიც არიან. ეს ინფორმაცია გავრცელდა ჭორის დონეზე. ფაქტია, რომ რაღაცას ნამდვილად გეგმავდნენ, მაგრამ, როგორც ჩანს, ეს “რაღაცა” შენობაში შემოჭრა არ ყოფილა,” _ გვითხრა გიგინეიშვილმა.
