“საქართველოს პატრიოტთა ალიანსი” ქუთაისის მერს დიმიტრი კოპალიანს აკრიტიკებს და იმპიჩმენტით ემუქრება. ბოლო ორი დღეა, ყოფილი “ნაცმოძრაობის” წევრები, დღეს უკვე “პატრიოტთა ალიანსის” წევრები აშკარად უტევენ ქალაქის მერს, რომელსაც ბრალს მერიის სამსახურების სრულ პარალიზებაში დებენ.
გუშინდელ ბრიფინგზე “საქართველოს პატრიოტთა ალიანსის” ლიდერმა გოჩა თევდორაძემ ხმამაღლა განაცხადა, რომ დიმიტრი კოპალიანი საკუთარ უფლება-მოვალეობებს სათანადოდ ვერ ასრულებდა და თუ ის ასე გააგრძელებდა, მაშინ “პატრიოტთა ალიანსი” მას იმპიჩმენტს გამოუცხადებდა.
თევდორაძეს კოპალიანი საგანგებო განცხადებით გამოეხმაურა. ქუთაისის მერი მიიჩნევს, რომ მსგავსი უზნეო პოლიტიკოსები, როგორებიც ქუთაისში დახვდა, არსად უნახავს. ის უზნეოს უწოდებს იმ ადამიანებს, ვინც მის ირგვლივაა და მოუწოდებს, მუშაობაში ხელი არ შეუშალონ, წინააღმდეგ შემთხვევაში კი “ქართულ ოცნებაში” შემავალ პარტიებს მიმართავს, დაინტერესდნენ ქუთაისში მიმდინარე მოვლენებით.
“როცა ქუთაისში ჩამოვდიოდი, ვიცოდი, ბევრ სირთულეებს წავაწყდებოდი, მაგრამ იმან, რაც ქუთაისში ვნახე, მოლოდინს გადააჭარბა. ჩემთვის საოცარი იყო ასეთი უზნეო ადამიანების ნახვა, რომლებიც გვერდში მიდგანან და მუშაობის საშუალებას არ მაძლევენ. მე არ მჭირდება იმპიჩმენტი, რომლითაც ისინი მემუქრებიან _ ეს მათ სჭირდებათ. 22 წლის წინ მე ასეთი ქუთაისი არ დამიტოვებია. დღეს კი ვხედავ, რომ ქუთაისს იქამდე არ ეშველება, ვიდრე ქალაქს “ნაციონალური” მოძრაობა მართავს. ამიტომ, მივმართავ კოალიციაში შემავალ პოლიტიკურ პარტიებს, შეისწავლონ ქალაქში მიმდინარე პროცესები,” _ განაცხადა ქუთაისის მერმა დღევანდელ ბრიფინგზე.
კოპალიანის პასუხის პასუხად, გოჩა თევდორაძემ ისევ ბრიფინგი გამართა, სადაც მერს მოუწოდა, რომ თავი დაანებოს შეურაცხმყოფელ განცხადებებს.
“ჩვენ არ გვიფიქრია მისი შეურაცხყოფა და თვითონაც ჯობია, ჩვენს შეურაცხყოფას თავი დაანებოს. წინააღმდეგ შემთხვევაში, გუშინ უკვე დავაანონსეთ ჩვენი რადიკალური გადაწყვეტილების შესახებ,” _ განაცხადა “საქართველოს პატრიოტთა ალიანსის” ლიდერმა გოჩა თევდორაძემ.
ქუთაისის მერის პოლიტიკას და საქმიანობა აკრიტიკებს “საქართველოს პატრიოტთა ალიანსის” წევრი კახა ნემსიწვერიძე, რომელიც “გურია ნიუსთან” საუბრისას აღნიშნავს, რომ “ქალაქის მერი აზრზე არ არის, რას აკეთებს და როგორ იქცევა.” მისი განცხადებით, “კოპალიანის საქმე იუმორისტულ გადაცემებში მოხვედრაა და კარგი იქნება, თუ მისი საქმიანობით იუმორისტული გადაცემები დაინტერესდებიან.”
ნემსიწვერიძე აქვე აღნიშნავს, რომ ქალაქის მერმა კრიტიკას ვერ გაუძლო და მის განცხადებები უხეში გამოდგა: “მე არ ვიცი, ვისი მისამართით იყო ნათქვამი ფრაზა _ “უზნეო პოლიტიკოსები”, თუმცა, მსგავსი განცხადებები ქალაქის მერს არ შეშვენის. თუმცა, ჩვენი ქალაქის მერი მთელმა საქართველომ უკვე გაიცნო იუმორისტული გადაცემებიდან. ჩვენ ვაპროტესტებთ იმას, რომ ქალაქის მერია სრულიად პარალიზებულია, შეჩერებულია ინფრასტრუქტურული პროექტები, გაუქმებულია მოქალაქეთა მიღების საათები. მან კრიტიკა ვერ აიტანა. რომ იძახის, ამერიკაში მაქვს განათლება მიღებულიო, რომელ შტატში ასწავლეს, რომ კრიტიკას ასე უხეშად უნდა უპასუხოს?! ძალიან მწყდება გული, რომ ეს ადამიანი ასეთი სუსტი გამოდგა, აზრზე არ არის, რას აკეთებს და როგორ მუშაობს,” _ განაცხადა “გურია ნიუსთან” საუბრისას “საქართველოს პატრიოტთა ალიანსის” წევრმა და “ნაციონალური მოძრაობის” ყოფილმა თავმჯდომარემ კახა ნემსიწვერიძემ.
ქუთაისელებს კარგად ახსოვთ, ერთი თვის წინ ქალაქში განვითარებული პოლიტიკური მოვლენები და “საქართველოს პატრიოტთა ალიანსის” წევრების სრული მხარდაჭერა იმ კანდიდატის მიმართ, რომელსაც თავად ბიძინა ივანიშვილის მხარდაჭერა ჰქონდა. მაშინ გოჩა თევდორაძის ამ განცხადებამ საკმაოდ დიდი პროტესტი გამოიწვია. ქუთაისელები ფიქრობდნენ, რომ გოჩა თევდორაძეს არ ჰქონდა მსგავსი განცხადებების კეთების უფლება.
გოჩა თევდორაძის სახელი ქუთაისში, დიდი ხანი ასოცირდებოდა ნინო ბურჯანაძის პოლიტიკური თანაგუნდელის სტატუსთან, თუმცა, პარტიული აკლიმატიზაცია თევდორაძეს ბურჯანაძის შემდეგაც არ გასჭირვებია და მალევე გახდა “ნაციონალური მოძრაობის” ერთ-ერთი მთავარი საყრდენი ძალა. იგი, 2012 წლის საპარლამენტო არჩევნების შემდეგ, იმერეთის გუბერნატორის მოადგილედაც დანიშნეს, სადაც რამდენიმე თვის განმავლობაში იმუშავა, მაგრამ, როგორც აღმოჩნდა, თევდორაძეს ჩაძირულ გემზე ყოფნა არ მოეწონა და გადაწყვიტა, ცალკე პოლიტიკური ძალა შეექმნა, რომელიც კვლავ ყოფილი “ნაციონალებით” დაკომპლექტდა. ქუთაისის საკრებულოში სახელშეცვლილმა “ნაცებმა„ უმრავლესობა მოიპოვეს.
თევდორაძის სახელმა არა ერთხელ გაიჟღერა 2010 წელს ქუთაისის ბაღებში ჩატარებული ხმაურიანი სპეცოპერაციის შემდეგ _ მას პოლიტიკური ოპონენტები ბრალს ამ ბაღებში არსებული დანაშაულებრივი სქემის შექმნასა და ავტორობაში სდებდნენ. ამის შესახებ უკვე ხმამაღლა საუბრობს დასავლეთ საქართველოს საოლქო პროკურატურაში დაბარებული, იმერეთის ყოფილი გუბერნატორი ლაშა მაქაცარია, რომელიც “საქართველოს პატრიოტთა ალიანსის” ლიდერის სახელს აჟღერებს და აცხადებს, რომ მან გამოძიებას საკმაოდ ვრცელი ინფორმაცია მიაწოდა და პროკურატურა ბაღების ამბავზე გოჩა თევდორაძის პერსონითაც უნდა დაინტერესდეს.
როგორ გადანაწილდება პოლიტიკური ძალაუფლება და რა შეთანხმებები მიიღწევა ქუთაისის მერიასა და “საქართველოს პატრიოტთა ალიანსს” შორის, ჯერჯერობით უცნობია. თუმცა, აშკარაა, რომ მოქალაქეების ინტერესები, გასულ წლებთან შედარებით, გაცილებით შესუსტდა _ ქუთაისელები ამ დრომდე ელოდებიან რადიკალურ ცვლილებებს, რომელიც დიმიტრი კოპალიანმა მისი მოსვლის დღიდან დაანონსა, თუმცა, ეს ცვლილებები დღემდე მხოლოდ პოლიტიკურ ანონსად რჩება.
