“განაჩენის გამოტანამდე რამდენიმე თვით ადრე, მოსამართლე გოჩა ჯეირანაშვილი მისი ინიციატივით არაოფიციალურ გარემოში შეხვდა სამცხე-ჯავახეთის პროკურორ პაპუაშვილს და ურჩია, რომ ბრალდებულებთან გაეფორმებინათ საპროცესო შეთანხმება მათი გათავისუფლების პირობით, მოსამართლის სიტყვებით ეს ყველასათვის კარგი გამოსავალი იქნებოდა. პროკურორმა ამაზე უარი განაცხადა.”
განცხადება პროკურატურამ გუშინდელი გამამართლებელი განაჩენის პასუხად გააკეთა. მოსამართლე ჯეირანაშვილმა გაუპატიურებასა და წამებაში ბრალდებული პოლიციის მაღალჩინოსნები გაამართლა და დარბაზიდან გაუშვა.
გუშინვე, უზენაესმა სასამართლომ განაჩენთან დაკავშირებით განმარტება გააკეთა. სასამართლო ამტკიცებს, რომ პროკურატურამ სასამართლოში არასრულყოფილად გამოძიებული საქმე მიიტანა, რაც მტკიცებულებებით გამყარებული არ იყო.
“ბრალდების მხარის მიერ წარმოდგენილი მტკიცებულებები, რომლებიც გამოკვლეული იქნა სასამართლო სხდომაზე, არა თუ არ შეესაბამებოდნენ ერთმანეთს და დაზარალებულთა ჩვენებებს, არამედ ხშირ შემთხვევაში გამორიცხავდნენ დაზარალებულთა მიერ მითითებულ ფაქტებს. ამასთან, ჩატარებული საგამოძიებო მოქმედებების (პირის ამოცნობის) ოქმები, რომლებიც მნიშვნელოვანი მტკიცებულება შეიძლება გამხდარიყო ბრალდების ნაწილში შეუსაბამობაში მოდიოდა საგამოძიებო მოქმედების ამსახველ ვიდეო ჩანაწერთან, რამაც მტკიცებულებები ეჭვქვეშ დააყენა.
სასამართლომ მიუთითა, რომ საქართველოს სისხლის სამართლის 82-ე მუხლის მე-3 ნაწილის თანახმად, პირის დამნაშავედ ცნობისათვის საჭიროა გონივრულ ეჭვს მიღმა არსებულ შეთანხმებულ მტკიცებულებათა ერთობლიობა. სასამართლოზე წარმოდგენილი მტკიცებულებების ერთობლიობა არ იძლეოდა სისხლის სამართლის საპროცესო კოდექსით გამამტყუნებელი განაჩენის დადგენის სტანდარტს, შესაბამისად, სასამართლომ ყველა ბრალდებული უდანაშაულოდ ცნო წარდგენილ ბრალდებებში და გაათავისუფლა სასამართლო სხდომის დარბაზიდან.”
პროკურატურა ამტკიცებს, რომ ბრალდებები ექსპერტიზის დასკვნებითა და დაზარალებულთა ჩვენებებით იყო გამყარებული და შესაბამისად, გამამართლებელი განაჩენი პროკურატურის არაკომპეტენტური მუშაობის შედეგი არ არის.
საქმის მასალების მიხედვით, ბორჯომის პოლიციის უფროსს მამუკა ხვედელიანს ბრალად ედებოდა, რომ მან გიორგი ბლიაძესთან, ალექსანდრე ბლიაძესთან, სერგო სამსონიძესთან და გამოძიებით დაუდგენელ პირებთან ერთად ჩაიდინა მოქალაქის დამცირება და იძულება, ასევე, ღირსებისა და პატივის შემლახავ მდგომარეობაში ჩაყენება, რამაც მას ძლიერი ფიზიკური, ფსიქიკური და მორალური ტანჯვა მიაყენა, ჩადენილი მოხელის მიერ სამსახურეობრივი მდგომარეობის გამოყენებით და ჯგუფურად, მასვე ბრალი ედებოდა რამდენიმე პირის თავისუფლების უკანონო აღკვეთაში წინასწარი შეთანხმებით ჯგუფის მიერ და მოხელის მიერ სამსახურებრივი უფლებამოსილების გადამეტებაში, რამაც ფიზიკური პირის კანონიერი ინტერესების არსებითი დარღვევა გამოიწვია, ჩადენილი ძალადობით და დაზარალებულის პირადი ღირსების შეურაცხყოფით. აღსანიშნავია, რომ არც ერთმა ბრალდებულმა თავი დამნაშავედ არ სცნო.
საინტერესოა, ვინ არის გამამართლებელი განაჩენის ავტორი მოსამართლე ჯეირანაშვილი.როგორც მოსამართლის ბიოგრაფიიდან ჩანს, იმ პერიოდში, როდესაც მამუკა ხვედელიანი პოლიციაში მუშაობდა, ჯეირანაშვილს სხვადასხვა თანამდებობები ეკავა სამცხე-ჯავახეთის სამმმართველში და პროკურატურაში მუშაობდა.
2009 წლის იანვარში, როდესაც ბორჯომის პოლიციაში დაკავებულის ცემა-გაუპატიურება ხდებოდა, ჯეირანაშვილი სამცხე-ჯავახეთის საოლქო პროკურატურის საგამოძიებო ნაწილის უფროს გამომძიებლად მუშაობდა. სამოსამართლო საქმიანობას ის მხოლოდ აპრილის თვიდან შეუდგა.
დადგება თუ არა მოსამართლის დისციპლინური პასუხისმგებლობის საკითხი, ჯერჯერობით უცნობია. მომხდარზე უზენაესი სასამართლო განცხადებას მოგვიანებით გააკეთებს.
