22 წლის ბორჯომელი ბიჭის რევაზ არუცევის შემზარავი მკვლელობა 2010 წელს მოხდა. მას 12 ტყვია ჰქონდა მოხვედრილი. როგორც მოკლულის ოჯახის წვერები აცხადებენ, არუცევს საკონტროლო ტყვია პირადად ხვედელიანმა დაახალა. მათი თქმით, ეს მთელმა ბორჯომმა იცის.
პირველად, ინფორმაცია ამ მკვლელობის შესახებ 2010 წელს “ობიექტივით” გავრცელდა, თუმცა მაშინ ამ ფაქტს, როგორც ირმა ინაშვილი ამბობს, არასამთავრობო და უფლებადამცველი ორგანიზაციებიდან დიდი გამოხმაურება არ მოჰყოლია.
“ჩემს შვილს ჯერ უკნიდან ესროლა ხვედელიანმა, ორი კილომეტრი ირბინა, სისხლისგან დაიცალა და დაეცა და როდესაც სისხლისგან იცლებოდა, ოთხი ტყვია დაახალა თავში ხვედელიანმა, გიორგი ინასარიძემ და სერგო სამსონიძემ. ჩემი შვილი ამ დროს სისხლისგან იყო დაცლილი მთლიანად. ასეთ ბავშვს ოთხი ტყვია სახეში დაახალეს. უიარაღოს და სისხლისგან დაცლილს”.
როგორც ამბობენ, არუცევი პოლიციას თვალში არ მოსდიოდა. მას ხშირად იბარებდნენ განყოფილებაში. თავად ბორჯომის პოლიციის სამორიგეოში ამას იმით ხსნიდნენ, რომ, თურმე, არუცევი ” მოძველბიჭო” იყო.
რევაზ არუცევის ოჯახი დღემდე ითხოვდა მკვლელობის გამოძიებას, მაგრამ უშედეგოდ. მკვლელობის საქმე თაროზე შემოდეს და ოჯახის წევრებს ეუბნებოდნენ, რომ მათი შვილი პოლიციასთან შეტაკების დროს მოკლეს და ამ ყველაფერში, დამნაშავე თვითონ იყო.
“16 წლის იყო ჩემი შვილი, როცა ფეოდალური მენტალიტეტის მქონე კახა ლეგაშვილთან მოუვიდა დაპირისპირება. ჩემი შვილი საპარიკმახეროში იყო მისული, მივიდა მასთან ლეგაშვილი და უთხრა, _ ჩემი ბიჭი, შენ ხვალ შეიჭრი თმასო. ჩემმა შვილმა უთხრა, ჩემი რიგია და დღეს შევიჭრიო. ამას მოყვა დაპირისპირება და 5 წლის განმავლობაში გვებრძოდნენ. რამდენჯერმე დაიჭირეს და გამოუშვეს. იმ წელსაც, როცა მომიკლეს, 40 დღე ჰყავდათ დაჭერილი. 40 დღის შემდეგ გამოუშვეს. ამის შემდეგ, ის გადაადგილდებოდა ბორჯომიდან სოფლის მიმართულებით, დაესხნენ თავს და დამიხვრიტეს შვილი. მანამდე კი ხვედელიანმა და მისმა ბანდამ ბორჯომელი ბიჭი გააუპატიურა, მაგრამ რად გინდა! აგერ მოსამართლე ჯეირანაშვილმა გაათავისუფლა. ვიდრე ჯეირანაშვილები და კუბლაშვილები იქნებიან, არაფერი არ გვეშველება! გამაგებინეთ, მკვლელებთან შეიძლება კოაბიტაცია?” _ აცხადებს მზია კურტანიძე.
მზია კურტანიძის განცხადებით, 2010 წლიდან მოყოლებული ცდილობდნენ საქმე სასამართლომდე მისულიყო, მაგრამ უშედეგოდ:
” ჩემი შვილი კრიმინალად გამოაცხადეს და საქმე თაროზე შემოდეს, შენი შვილი კრიმინალი იყო და შეწყდა ძიებაო. რა გვექნა, ვისთან მივსულიყავით? მერაბიშვილთან, ხვედელიანთან თუ ადეიშვილთან? იმ ხალხთან, რომლებმაც ჩემი შვილის დახვრეტის ბრძანება გასცეს? ვერანაირ სამართალს მე ვერ მივაღწიე. ახლა განცხადება შეტანილი მაქვს არჩილ კბილაშვილის სახელზე და დაწყებულია გამოძიება. დიდი იმედი მაქვს არჩილ კბილაშვილის” _ აცხადებს მოკლულის დედა.
როგორც პროკურატურაში გაგვიცხადეს, საქმეზე გამოძიება უკვე დაწყებულია.
“გურია ნიუსი” დაუკავშირდა მამუკა ხვედელიანის ადვოკატს, ზაზა მარიდაშვილს, რომელმაც გაგვიცხადა, რომ ამ საქმეზე მამუკა ხვედელიანი მოწმის სტატუსით დაიკითხა და ამიტომ მა არ მიეცა საშუალება, საქმის მასალებს თავიდან ბოლომდე გაცნობოდა.
“ერთი იმის თქმა შემიძლია, რომ არანაირი მტკიცებულებები არ გააჩნიათ იმისა, რომ დანაშაული ჩადენილია განზრახ. ამ საქმეზე რომ მტკიცებულებები გააჩნდეთ, თქვენც ხომ კარგად იცით, რომ ხვედელიანს ბრალს დაუმძიმებდნენ?” _ აცხადებს ადვოკატი.
_ რამდენი ხანია, რაც ამ საქმეზე გამოძიება მიმდინარეობს?
_ დაახლოებით 2-3 თვეა და დაკითხეს ყველა ის პოლიციელი, რომელიც იმ ოპერაციაში მონაწილეობდა.
_ მოკლულის დედა ასახელებს ვინმე კახა ლეგაშვილს, ხომ არ იცით, რა როლი ჰქონდა ამ საქმეში და ვინ არის?
_ არ ვიცი, ნამდვილად არ ვიცი…
_ თქვენ ამბობთ, რომ არანაირი მტკიცებულება არ აქვთ, მაგრამ მკვლელობა მოხდა, რომელიც არ გამოიძიეს.
_ მე ის ვიცი, რომ რამდენიმე თვეა ის პროკურატურა, რომელმაც ხვედელიანს სხვა საქმეებზე წაუყენა ბრალი, ამ საქმესაც იძიებს. თუ ადრე არ იყო გამოძიებული, ახლა რატომ არ იძიებენ? იმიტომ, რომ არ აქვთ მტკიცებულებები. იქ რამდენიმე პოლიციელი მონაწილეობდა, მარტო ხვედელიანზე არ არის საქმე.
_ ხვედელიანიც ხომ მონაწილეობდა ამ საქმეში?
_ რა თქმა უნდა, მაშინ ის პოლიციის უფროსი იყო. როგორც მე ინფორმაცია მაქვს, იმ ბიჭზე ატარებდნენ სპეცოპერაციას.
_ ხვედელიანი უარყოფს, რომ ესროლა რევაზ არუცევს? თუ ამ ყველაფერს სპეცოპერაციით ხსნიან?
_ რა თქმა უნდა, რა თქმა უნდა! იქ დადგენილი არ არის ვისი ნასროლი ტყვია მოხდა. ახლოდან ნასროლი არ არის, როგორც ხვედელიანი ამბობს. თუ არ ვცდები, ნასროლია სადღაც 150 მეტრიდან და იქედანაც ისროდნენ, მაგრამ ვისი ტყვია მოხვდა, არ არის დადგენილი.
_ ეს არ არის კიდევ ერთი მტკიცებულება იმისა, რომ მაშინ ამ საქმეზე გამოძიება არც კი ჩატარებულა?
_ მაშინ რა იყო, მაგას ნამდვილად ვერ გეტყვით… მაგრამ რაც შემიძლია გითხრათ, დადგენილი არ არის, რომ აღნიშნული პიროვნება გარდაიცვალა ვიღაცის განზრახ ნასროლი ტყვიით.
(ფოტო “სამხრეთის კარიბჭე”)
