იგი ესაზღვრება ოზურგეთის მუნიციპალიტეტს. იქ 453 მუდმივად მცხოვრები კომლი ცხოვრობს. მამათის თემში შედის სოფლები _ მამათი, კონჭკათი, ქვედა მამათი, შათირი.
სოფელი მეწყერსაშიში ზონაში მდებარეობს და საკმაოდ ბევრი ოჯახი მეწყრისგან დაზარალებულია.
ერთ-ერთი დაზარალებული მარტოხელა დავით ლომაძეა. ის ქვედა მამათში ცხოვრობს. როგორც თავად ამბობს, მეწყერი მის ეზოში ჯერ კიდევ 1985 წელს ჩამოწვა და მას შემდეგ ყოველ გაწვიმებაზე მიწის ნაკვეთი მთიდან ჩამოსულ მეწყერს მიაქვს, გაბზარულია სახლის კედლები.
დავით ლომაძეს ახალი მთავრობის იმედი აქვს: “იქნებ, დამეხმარონ და შემაძლებინონ, მიწის პატარა ნაკვეთი და პატარა სახლი მაინც შევიძინო, თუნდაც უპროცენტო სესხით.”
მამათი საკმაოდ დიდი სოფელია, მაგრამ მოსახლეობა ერთმანეთისგან შორს ცხოვრობს. დავით ლომაძის სახლი საკმაოდ მივარდნილ ადგილზეა, ეზოს მარჯვნიდან და მარცხნიდან ღელე ჩამოუდის, რაც წვიმაში დიდ საფრთხეს ქმნის: “მარტო ვცხოვრობ. 27 წელი ვიმუშავე აჭარაში. მერე გადმოვედი აქეთ საცხოვრებლად ჩემი ოჯახის წევრები აქ არიან დაკრძალულები, ამის გამო ვერ მივატოვე აქაურობა. სახლს ორი ღელე ჩამოუდის მარჯვნიდან და მარცხნიდან, რომელიც დიდდება წვიმის დროს და მიწა მიაქვს. ნაკვეთი თანდათან მცირდება. ზემოდან წამოსული მდინარე, სახლი სადაც დგას, იქაც გადმოდის. მაქვს ინფრასტრუქტურის სამსახურის დასკვნა, სადაც წერია, რომ სახლი საცხოვრებლად საშიშია. მივმართე გამგეობას, დეპუტატს, ყველა საქმის კურსშია. მოსული იყო ადგილზე ინფრასტრუქტურის სამსახური თენგიზ ხელაძის ხელმძღვანელობით. დიდი ყურადღებით დაათვალიერეს ყველაფერი. მითხრეს, რომ გაგზავნილია საბუთები და დაგველოდე, ბიუჯეტში არ არის ჯერ თანხა და გამოჩნდება რამეო. სოციალური დახმარებაც არ მაქვს _ იყო აგენტი მოსული წინა ხელისუფლების დროს, მაგრამ მე”ქართული ოცნების” კოორდინატორი ვიყავი. ეს კარგად იცოდნენ და ამის გამო მაღალი ქულა მომივიდა. განცხადება ახლაც შევიტანე, მაგრამ 70 000 ქულა მომივიდა _ იგივე”ნაციონალები” არიან ლანჩხუთში, როგორ ჩანს. ყველა ეზოსთან გააკეთეს ღამის განათება, მარტო მე არ მაქვს და ხიდიდან რამდენჯერმე კინაღამ გადავარდნენ მოხუცები. ბევრჯერ მივმართე ძველ გამგებელს და მის მოადგილეს, მაგრამ არაფერი შეცვლილა. ველი დახმარებას და მხოლოდ პენსიის ამარა ვარ,” _ ამბობს დავით ლომაძე.
მამათის თემის გამგეობის მთავარი სპეციალისტის ლადო კილაძის თქმით, დავით ლომაძემ მართლაც მიმართა ხელისუფლებას დახმარებისთვის: “მეწყერი ანგრევს მის სახლს. გამგებელი დაგვპირდა დახმარებას და ჩვენც დიდი იმედი გვაქვს. ბიუჯეტში, მართალია, არ არის თანხა, მაგრამ, ალბათ, რაღაც სახსრებს გამონახავს ადგილობრივი ხელისუფლება. ამ მდგომარეობაში ბევრია მამათში, მაგრამ ასეთ კრიტიკულ მდგომარეობაში, ალბათ, კიდევ ხუთი ოჯახი იქნება _ მათ სახლში ღამის გათევა საშიშია, განსაკუთრებით ზამთარში. ვცდილობთ, დავეხმაროთ მათ,” _ გვითხრა ლადო კილაძემ.
ლანჩხუთის მუნიციპალიტეტის სოფლებში რამდენიმე მეწყერსაშიში ზონაა და დიდია სტიქიური უბედურებების შედეგად დაზარალებული ოჯახების რიცხვი. რადგან, როგორც ადგილობრივ ხელისუფლებაში ამბობენ, ბიუჯეტში სტიქიით დაზარალებულთათვის თანხა არ მოიპოვება, ხშირ შემთხვევაში, დაზარალებული ოჯახების მიმართ ადგილობრივი მუნიციპალიტეტი ერთჯერადი დახმარებებით შემოიფარგლება, რაც ძალიან მცირეა და მოსახლეობის უკმაყოფილებას იწვევს.
აღნიშნულ პრობლემაზე მუნიციპალიტეტის გამგებლის მოვალეობის შემსრულებელს, ზაზა ურუშაძეს ვესაუბრეთ:
_ პირადად ჩემთან იყო ეს პიროვნება მოსული. ინფრასტრუქტურის სამსახურის თანამშრომლები იყვნენ მასთან. სამწუხაროდ, მარტო დავით ლომაძე არ არის ამ მდგომარეობაში _ დაახლოებით 15 ოჯახია აღრიცხული, შეძლებისდაგვარად დავეხმარებით. ვერ ვიტყვი, რომ ჩვენი ბიუჯეტის შემხედვარე ამ ოჯახების სხვა ტერიტორიაზე გადაყვანას უზრუნველვყოფთ, მაგრამ ვეცდებით რაღაც პირობები შევუქმნათ. რამდენიმე ოჯახს ვუქირავეთ ბინა, მე, როგორც ინფორმაცია მაქვს, მეწყერსაშიშ ზონებთან დაკავშირებით ხელისუფლება გამოყოფს თანხებს, ან ნაწილობრივი ზარალის ანაზღაურება შეიძლება მოხდეს. სამწუხაროდ, ბიუჯეტში ისეთი მდგომარეობა არ გვაქვს, რომ 100 პროცენტით დავეხმაროთ. 1 146 000 ლარია რაიონის ბიუჯეტი, აქედან გამომდინარე, ჩვენ ბევრს ვერაფერს შევძლებთ. ძირითადად ტრანსფერებზე ვართ დამოკიდებული. მე თვითონაც ვაპირებ მამათში ასვლას და დავით ლომაძის ნახვას.
_ თუ სტიქიით დაზარალებულთათვის ბიუჯეტში თანხა არ არის გამოყოფილი, რა სახის დახმარება შეგიძლიათ გაუწიოთ მგავს მდგომარეობაში მყოფ ადამიანებს?
_ ამ ეტაპზე შევთავაზებთ ერთჯერად დახმარებას. მეორე ვარიანტი არის ის, რომ თუ სახლში არ იცხოვრება, ვუქირავებთ ბინას. ეს მოხდება ხანგრძლივი ვადით, სანამ არ შევძლებთ მისთვის სხვა სახის დახმარების აღმოჩენას. ნიგოითშიც მსგავსი მდგომარეობაა. მე თვითონ ვიყავი მისული მათთან _ სახლის ქვეშ წყალი გადის. გეოლოგების გამოძახებას ვაპირებთ და დავდებთ დასკვნას, რა მდგომარეობაა, შეიძლება თუ არა იმ ადგილზე ახალი სახლის აშენება და საერთოდ, ცხოვრება, _ გვითხრა ზაზა ურუშაძემ.
სტატია მომზადებულია ფონდის”ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
