ომის ვეტერანი, 60 წლის მურთაზ აბაშიძე მიიჩნევს, რომ მის მიმართ გახორციელებული უკანონო ქმედებების მსხვერპლია, რამაც დევნის სახე მიიღო.
რამდენიმე წლის შემდეგ, გურიის საგადასახადო ინსპექციას გაახსენდა, რომ აბაშიძეს მათი ვალი ჰქონდა. რატომ მიიღო ოზურგეთის როგორც რაიონულმა, ისე სააპელაციო სასამართლომ ამ საქმეში მთავარი დოკუმენტის, საგადასახადო დავალების გარეშე გადაწყვეტილება და გაუყიდიან თუ არა ომის ვეტერანს დაყადაღებულ ერთადერთ სახლს?! აბაშიძე საგადასახადო ინსპექციის წინააღმდეგ და პირიქით; სამი სასამართლო დავა _ სისხლის სამართალი, ადმინისტრაციული და დაყადაღებული ქონების ღია აუქციონის წესით რეალიზაცია.
მურთაზ აბაშიძემ ადმინისტრაციული დავა უზენაეს სასამართლოში გააგრძელა, გაზეთ “გურია ნიუსში” კი ამ თემაზე ვრცელი ჟურნალისტური გამოძიება დაიბეჭდა.
მკითხველს შევახსენებთ, რომ ომის ვეტერანი მურთაზ აბაშიძე 1991 წელს, ცხინვალის მისადგომებთან პირველ ხაზზე იბრძოდა, 1992 წლის აგვისტოდან _ აფხაზეთის ომში, 2008 წლის აგვისტოს ომის დროს ჩავიდა გორში. რატომ გაუჩნდა პროტესტი ვეტერან მეომარს და დაისაჯა თუ არა იმიტომ, რომ 2009 წლის 9 აპრილს “ეროვნული ფორუმის” სახელით თითქმის ერთი თვე დაჰყო რუსთაველის გამზირზე დადგმულ კარვებში?
ამ კითხვაზე პასუხი როგორც მმართველმა გუნდმა, ისე ოპოზიციამ უნდა გაგვცეს. ამ უკანასკნელის გაუაზრებელი ქმედებების გამო, რეგიონებში დაბრუნებულ “პროტესტანტებს” ბევრი თავსატეხი გაუჩნდათ. მურთაზ აბაშიძე აცხადებს, რომ არასდროს არც ერთი პოლიტიკური პარტიის მხარდამჭერი არ ყოფილა, მისი პრობლემები კი “კარვების ქალაქიდან” დაიწყო.
უზენაეს სასამართლოში გამართულ პროცესზე, მოსამართლე მაია ვაჩაძესთან მოსარჩელეს პოლიტიკურ ორიენტაციაზე არ უსაუბრია _ უფრო საინტერესო იყო იმ გამომძიებლის ვინაობის დასახელება, რომელმაც მურთაზს უსაყვედურა, რა გინდოდა აფხაზეთის ომშიო?! მოსამართლემ დაჟინებით მოითხოვა ამ ადამიანის დასახელება, იმ მოტივით, რომ ელდარ ქირიას სახელი და გვარი უზენაესი სასამართლოს ისტორიაში დარჩეს. ჟურნალისტის პროცესზე დასწრებაც სასიხარულო იყო მოსამართლისთვის, რომელიც გაზეთ “გურია ნიუსის” მკითხველი ყოფილა და წარმატებებიც გვისურვა, თუმცა, ეს საუბრის სხვა თემაა.
მურთაზ აბაშიძეს უკვე სამი თვეა, შეუჩერეს ვეტერანებისთვის გამოყოფილი 22-ლარიანი დახმარება. ადვოკატმა კახა ჩავლეიშვილმა მოსამართლეს განუმარტა, რომ მოსარჩელეს უსაფუძვლოდ დაეკისრა საგადასახადო სანქცია _ 1547 ლარი, რომლის საურავიც იზრდება. გარდა ამისა, აბაშიძეს ერთადერთი სახლიც დაუყადაღეს. უზენაეს სასამართლოში საგადასახადო შესაგებელი საგადასახადო ორგანოს არ წარუდგენია, რომლის წარმომადგენელს მოსამართლემ ჰკითხა, თუ რატომ აკისრებს საგადასახადო სამსახური მეწარმეს სასამართლოში მტკიცების ტვირთის წარდგენას, მოთხოვა, მაგრამ არგუმენტირებული პასუხის ვერ მიიღო.
სასამართლო გადაწყვეტილება 24 მაისს გახდება ცნობილი; ამ გადაწყვეტილებაზეა დამოკიდებული, გაგრძელდება თუ არა დავა სტრასბურგის ევროპულ სასამართლოში. მიუხედავად იმისა, რომ ოზურგეთის საგადასახადო სამსახურის თანამშრომელმა კახა კვაჭანტირაძემ მურთაზ აბაშიძეს ურჩია, არ იჩივლოო, ვეტერანისთვის სამართლიანობის განცდა უფრო მაღლა დგას, ვიდრე პოლიტიკური კუთვნილება. მით უმეტეს, რომ დაზარალებულს ვერც პრეზიდენტის ამნისტია ვერ იცავს და არც სოლიდური ბიზნესი არ ჰქონდა, მილიონები რომ დაეგროვებინა. მცირე მოვაჭრე საკუთარი უფლებების დასაცავად ბოლომდე ბრძოლას აპირებს.
