როგორც სტუდენტები აცხადებენ, მათ მხოლოდ აბრისთვის სურათის გადაღება და ფეისბუქზე გავრცელება სურდათ, თუმცა, პოლიციამ ისინი მაშინვე დააკავა, სასამართლომ კი სტუდენტური გაერთიანების “ანტიპოდების“ ლიდერებს _ ნიკოლოზ ჩომახაშვილს და თორნიკე ჩიქოვანს 1 000-1 000-ლარიანი ჯარიმა დააკისრა.
“სტუდენტური დასაქმების პროგრამა გაუქმებულია ახალი მთავრობის მიერ, სამუშაო ადგილები კი მოგეხსენებათ, რომ უფროსებსაც კი არ აქვთ დღეს საქართველოში და სტუდენტებს ხომ მით უმეტეს! რატომ არ დაფიქრდა მოსამართლე იმაზე, რომ ჩვენ ამ ჯარიმის გადახდის საშუალება არ გვაქვს?“ _ აცხადებენ დაჯარიმებულები.
ამ ფაქტს სხვა სტუდენტები გამოეხმაურნენ, უკანონო უწოდეს სასამართლოს გადაწყვეტილებას და დაიწყეს კამპანია დაჯარიმებულების დასახმარებლად.
პირველი დასახმარებელი და ამავე დროს საპროტესტო აქცია 9 ივლისს, ჭავჭავაძის გამზირზე გაიმართა. ილიაუნის შესასვლელთან აქცია-კონცერტი მოეწყო. გაკრული იყო დიდი ლოზუნგი: “ნუ მიიღებ კანონს ჩვენზე უჩვენოდ!“ ღონისძიებაში მონაწილეობდნენ ილიაუნის სტუდენტები, რომლებიც სოლიდარობას უცხადებდნენ საპროტესტო ბანერის გაკვრისთვის დაკავებულ ახალგაზრდებს და თავიანთ სათქმელს ტრანსპარანტებით გამოხატავდნენ.
კონცერტის დაწყებისას აქციის მონაწილეებმა შეახსენეს დამსწრეებს, თუ რა მიზანს ისახავდა დღევანდელი შეკრება, შემდეგ კი დაიწყო აქციის მუსიკალური ნაწილი. მთელი კონცერტის მსვლელობისას მონაწილეები და დამსწრეები აღნიშნავდნენ, რომ დაჯარიმებულები იცავდნენ უნივერსიტეტის ავტონომიას და გამოხატავდნენ თავიანთ აზრს, ამის გამო კი ასეთი სანქციის გატარება მათ მიმართ უკანონო იყო.
კონცერტის მსვლელობისას სიმბოლურად 5-თეთრიანებით გროვდებოდა თანხა, რომელიც ჯარიმის სახით დაეკისრათ ახალგაზრდებს.
“ჩვენ ამ აქცია-კონცერტით კიდევ ერთხელ გამოვთქვამთ პროტესტს. არ არის სწორი, როდესაც სახელმწიფო უხეშად ერევა უნივერსიტეტის საქმიანობაში. ჩვენ სტუდენტებს გვაქვს იმის უფლება, რომ ვიყოთ საქმის კურსში და ჩვენც გვეთქმოდეს ჩვენი სიტყვა. დღეს სიმბოლურად ვაგროვებთ თანხას, რომ გადავიხადოთ ის სრულიად უსამართლოდ დაკისრებული ჯარიმა. მადლობა ყველას, ვინც დღეს აქ იმყოფება და გვერდში გვიდგას,” _ აცხადებდნენ აქცია-კონცერტის ორგანიზატორები.
როგორც დაჯარიმებულმა თორნიკე ჩიქოვანმა გვითხრა, 10 ივლისს ისინი სასამართლოს გადაწყვეტილებას სააპელაციო სასამართლოში გაასაჩივრებენ.
