“მიმდინარე წლის 10 ივლისს, “საქართველოს კოოპერატიული ბინათმშენებლობის წევრთა უფლებების დაცვის ასოციაცია” საკუთარ ვებგვერდზე აქვეყნებს წერილს, სადაც იგი ემიჯნება ცენტრ “ერთობას” და მოუწოდებს ყველა დაზარალებულს, რომ უნდობლობა გამოუცხადონ ამ ორგანიზაციას. მიზეზად ასახელებს “ერთობის” ალიანსს ოპოზიციურ პარტიებთან ახალი ხელისუფლების წინააღმდეგ(?!).
ამ ზღვარგადასულმა და უსაფუძვლო ცილისწამებამ გვაიძულა მოგმართოთ თქვენ, რომ “ერთობისა” და მასში გაერთიანებული კოოპერატიული ბინათმშენებლობის წევრების ერთადერთი მიზანი 25 წლის მანძილზე ვერ მიღწეული სამართლიანობის აღდგენაა და არამცდაარამც პოლიტიკურ ჭრილში მისი გადატანა. ვითხოვთ მხოლოდ ბატონი ბიძინა ივანიშვილისა და კოალიცია “ქართული ოცნების” მიერ გაცემულ წინასაარჩევნო დაპირების შესრულებას.
ამასთანავე, გვინდა გაუწყოთ იმ ცრუ დაპირების თაობაზე, რასაც ავრცელებს “ასოციაცია”, რომ: 2014 წლიდან დაიწყება კოოპერატიული ბინათმშენებლობის წევრებზე სახელმწიფო საშინაო ვალის გასტუმრება (იხ. მისი ვებგვერდი), ეს სრული სიცრუეა, რაც დაგვიდასტურა 10 ივლისის შეხვედრაზე ფინანსთა მინისტრის მოადგილემ, ბატონმა გიორგი ჯავახიშვილმა. ასევე, 10 ივლისის მონაცემებით სინამდვილეს არ შეესაბამება “ასოციაციის” მიერ გავრცელებული ინფორმაცია “სახელმწიფო საშინაო ვალის პრობლემათა შემსწავლელი სახელმწიფო კომისიის” მიერ შექმნილი სამუშაო ჯგუფის ახალი ხელმძღვანელის დანიშვნის თაობაზე. მათ შორის ყველაზე საგანგაშო: თითქოს ჩვენ, კოოპერატივის წევრები, თანახმა ვართ ვალის მიზერულ ანაზღაურებაზე, რის შესახებაც “ასოციაციის” ხელმძღვანელმა, ოსიყმიშვილმა, განაცხადა ტელეკომპანია “კავკასიის” ეთერში. ამ უპასუხისმგებლო განაცხადით “ასოციაცია”, როგორც ყოველთვის, ახლაც ცდილობს სახელისუფლებო ნავში ჩახტომას.…
განგიმარტავთ, რომ “ასოციაციის” მიერ ტყუილების გავრცელების მიზანი უკავშირდება მის მიერ კოოპერატივის წევრთა მიმართ აღებულ ყალბ დაპირებებს და “ვალდებულებებს”, რაც დროის გაყვანის პოლიტიკაა.
ცენტრი “ერთობა” სრული პასუხისმგებლობით აცხადებს, რომ მისი ყველა ქმედება გამიზნულია კოოპერატივის წევრთა მიმართ არსებული პრობლემების მოსაგვარებლად, რაც ცენტრ “ერთობის” მიერ ძირეულად შესწავლილი და გაანალიზებულია და სისტემატურად მოგეწოდებათ “ერთობის” ვებგვერდზე.
ამ საგანგებო მიმართვის მიზანია, თითოეულმა რეალურად შეაფასოთ ასოციაციის ქმედება, ფინანსთა სამინისტროს მიერ დროის გაყვანის პოლიტიკა და ჩვენი პრობლემის უგულებელყოფა, რისი დაშვებაც ყოვლად მიუღებელია.
კიდევ ერთხელ მოგმართავთ: თვალი გაუსწორეთ სიმართლეს!, _ აღნიშნულია მიმართვაში, რომელსაც ხელს ლაშა გეგჭკორი და დალი გაბეშია აწერენ.
