ყარაულის ცვლის უფროსის მოადგილე _ ასეთი იყო შმაგი ტრაპაიძის პოზიცია სასჯელაღსრულების დეპარტამენტში, რომელიც 2012 წლის 21 დეკემბერს სამსახურიდან გაათავისუფლეს. ბრძანებაში დათხოვნის საფუძვლად მითითებული იყო “პირადი პატაკი”.
თუმცა, არაერთგზის მოთხოვნისა და ოფიციალური მიმართვის მიუხედავად, სასჯელაღსრულების სამინისტრო ტრაპაიძის მიერ დაწერილ პატაკებს და მის პირად საქმეს არ იძლევა. ადვოკატები მტკიცებულებების გამოთხოვას სასამართლოსგან ითხოვენ.
თამარ ხურციძე, ადვოკატი: “ჩვენ არაერთხელ გამოვითხოვეთ აღნიშნული ინფორმაცია, რაც დასტურდება იმ განცხადებით, რომელიც თან ერთვის სარჩელს. განცხადებებზე პასუხი არ მიგვიღია და დღემდე არ ჩაგვბარებია. ამ მტკიცებულებების გამოთხოვით მოხდება იმის დადასტურება, რომ პატაკების ამგვარი სახით დაწერას დადგენილი პრაქტიკის სახე ქონდა და ხორციელდებოდა არა პირადი სურვილით არამედ თანამშრომლების მოტყუებით.
მოწმეებიც დაადასტურებენ იმ ფაქტს, რომ პატაკების ამგვარი ფორმით დაწერა წარმოადგენდა დადგენილ პრაქტიკას და ეს არაერთხელ მომხდარა, ასევე დაადასტურებენ, რომ პატაკები დაწერა მთელმა სამსახურმა და სხვებიც გაათავისუფლეს. დაადასტურებენ, რომ ამ სახით დაითხოვეს თითქმის მთელი სამსახური ერთ დღეში, ხოლო პატაკების დაწერის საფუძვლად კი სამსახურმა რეორგანიზაცია დაასახელა.
რეალურად, შმაგი ტრაპაიძეც და სხვებიც შეცდომაში შეიყვანეს. მოგეხსენებათ, რეორგანიზაცია არ წარმოადგენს გათავისუფლების წინაპირობას, თუკი არ არსებობს კანონმდებლობის შესაბამისი წინაპირობები, რაც მათ შემთხვევაში არ არსებობდა. თანაც, ასეთი რამ უკვე დადგენილ პრაქტიკას წარმოადგენდა დეპარტამენტში და არ არსებობდა არანაირი სამართლებრივი საფუძველი მისი დათხოვნის”.
შმაგი ტრაპაიძეს ჰყავს მეუღლე და მცირეწლოვანი შვილი, ის ოჯახის ერთადერთი მარჩენალია და ფაქტია, არანაირი მიზეზი არ ჰქონდა, დაეწერა პატაკი განთავისუფლების შესახებ. საინტერესოა კიდევ ერთი ფაქტორიც, ტრაპაიძეს რომ ნდომებოდა გათავისუფლება, რატომ დაწერდა იმავე დღეს პატაკს დანიშვნის შესახებ?!
მაგრამ სასჯელაღსრულების სამინისტროს მაღალჩინოსნები ამის მიზეზს, თურმე “100 წელი არ იტყვიან”…
“ 2012 წლის 20 დეკემბერს, ჩემი მორიგეობის დროს, 22:00 საათზე ჩემი განყოფილების უფროსის მოადგილეს მაიორ ამირან ფანჩულიძეს დაურეკა ახლად დანიშნულმა სამმართვლოს უფროსმა, ვიცე პოლკოვნიკმა დავით კუკულაძემ და უთხრა _ “ეს ბრძანებაა! შმაგი ტრაპაიძემ დღეს ჩაამთავროს მორიგეობა, ხვალ დაიხუროს ქუდი და წავიდეს აქედანო“.
21 დეკემბერს, დაახლოებით 14 :00 სთ-ზე მის კაბინეტში შევხვდი ახლად დანიშნულ თავმჯდომარის მოადგილეს დაცვის დარგში, თენგიზ კაველიძეს. ავუხსენი მას, რომ მე არავითარი დარღვევა სამსახურის პერიოდში არ მქონია და ჩემი განთავისუფლება იმის გამო,რომ ვიყავი “ქართული ოცნების“ მხარდამჭერი, არის უკანონობა. ამ დროს შემოვიდა სამმართველოს უფროსი დავით კუკულაძე, რომელსაც შეეკითხა კაველიძე, “რატომ გაათავისუფლეთ ეს პიროვნებაო?“ კუკულაძემ უპასუხა:“მე ამის თანდასწრებით ვერ გეტყვი, რომელი წყაროდან და რა ინფორმაცია მაქვს ამ პიროვნებაზეო.”
მე გავყევი კუკულაძეს კაბინეტში, სადაც მან მითხრა _”შენ განთავისუფლდი შენი პატაკით!“ მე ვუთხარი, რომ მეორე პატაკიც მქონდა დაწერილი ამ თანამდებობაზე დანიშვნის შესახებ, რაზეც მიპასუხა _ “გათავისუფლებაზე დავაკმაყოფილე, დანიშვნაზე _ არაო, რაც შეეხება მიზეზს 100 წელი არ გეტყვი, გათავისუფლების მიზეზსო.“ _ აცხადებს შმაგი ტრაპაიძე “გურია ნიუსთან”.
საინტერესოა კიდევ ერთი დეტალიც, შმაგი ტრაპაიძე გათავისუფლდა სასჯელაღსრულების დეპარტამენტის ყოფილი თავმჯდომარის, მაია ხასიას ბრძანებით. იმ განყოფილების დაცვის უფროსად კი, სადაც შმაგი ტრაპაიძე ყარაულის ცვლის უფროსის მოადგილე იყო, მაია ხასიას ძმა, გია ხასია დაინიშნა.
ამ ინფორმაციას “გურია ნიუსთან” სასჯელაღსრულების სამინისტროც ადასტურებს.
“იუსტიციის კაპიტნის გიორგი შალვას ძე ხასიას სასჯელაღსრულების დეპარტამენტის გარე დაცვის სამმართველოს N12 განყოფილების უფროსის თანამდებობაზე დანიშვნის ფაქტს გიდასტურებთ და აღვნიშნავთ, რომ გ. ხასია სასჯელაღსრულების სისტემაში მუშაობს 1997 წლიდან და ზემოთ აღნიშნულ თანამდებობაზე გადაყვანილ იქნა“ _ ვკითხულობთ გამოგზავნილ წერილში.
ამავე წერილით გვატყობინებენ იმასაც, რომ “შმაგი ტრაპაიძის უშუალო ხელმძღვანელობის განმარტებით, ტრაპაიძე სამსახურებრივ მოვალეობებს ასრულებდა საშუალოზე დაბალ დონეზე, რის გამოც უარი ეთქვა სასჯელაღსრულების დეპარტამენტში ხელახლა მიღებაზე...”
ადვოკატის განცხადებით, აღნიშნული ინფორმაცია სიმართლეს არ შეესაბამება, რადგან შმაგი ტრაპაიძე იყო სამაგალითო თანამშრომელი, და მას მადლობაც აქვს გამოცხადებული, რაც მისი პირადი საქმიდანაც ჩანს.
თამარ ხურციძე: “გათავისუფლების შესახებ ბრძანება გავასაჩივრეთ საქართველოს სასჯელაღსრულების, პრობაციისა და იურიდიული დახმარების საკითხთა სამინისტროში ადმინისტრაციული საჩივრით, რომელიც არ დაკმაყოფილდა.
პირველ რიგში აღსანიშნავია ის ფაქტორი, რომ ჩვენ ბრძანება გავასაჩივრეთ ზემდგომ ორგანოში – სამინისტროში, ხოლო პასუხი კვლავ დეპარტამენტმა გაგვცა. ამის შემდეგ, სამინისტროს მოვთხოვეთ პასუხი თავად გაეცა ვინაიდან იგი იყო უფლებამოსილი, რის შემდეგაც მივიღეთ ჯერ წერილი სადაც გვატყობინებდნენ რომ მათ გამოითხოვეს მასალები დეპარტამენტიდან, ხოლო შემდეგ კი ჩაგვბარდა გადაწყვეტილება.
პირველ რიგში, მათ არ შეისწავლეს საკითხი, რაც დასტურდება იმით, რომ სამინისტრომ ვერც კი გაარკვია რის საფუძველზე იქნა დათხოვნილი შმაგი ტრაპაიძე. მან არ შეისწავლა არც ის საკითხი, მიმდინარეობდა თუ არა რეორგანიზაცია. იმის გამო, რომ საჩივარს არ ახლდა ზეწოლის დამადასტურებელი ფაქტები, უარი გვითხრა საჩივრის დაკმაყოფილებაზე. ეს მაშინ, როცა ზეწოლის ფაქტი კი არ იყო მნიშვნელოვანი, არამედ სულ სხვა ფაქტები, კერძოდ ვისი მოთხოვნით დაიწერა პატაკები იმ დღეს მასობრივად დეპარტამენტში, ასევე მართლა მიმდინარეობდა თუ არა რეორგანიზაცია, თუკი მიმდინარეობდა შემცირდა თუ არა საშტატო ნუსხა.
ასევე განვმარტავ რომ არ მომხდარა შტატების შემცირება, რაც პირად საუბარში დაგვიდასტურა ადამიანური რესურსების მართვის სამმართველოს უფროსმა გიორგი სვანაძემ, როდესაც ვითხოვდით საშტატო განრიგს, და რომელიც დღესაც არ ჩაგვბარებია.“ _ აცხადებს ადვოკატი.
მისი თქმით, დათხოვნის საფუძვლად რეორგანიზაცია ვერანაირად ვერ ჩაითვლება ვინაიდან საქართველოს პრეზიდენტის 2010 წლის 15 ოქტომბრის N832 ბრძანებულების 32-ე მუხლი, რომელიც ეხება სისტემის ორგანოდან დათხოვნას, არ ითვალისწინებს რეორგანიზაციის საფუძველზე პიროვნების დათხოვნას. ხოლო როგორც უკვე ზემოთ მოგახსენეთ, შმაგი ტრაპაიძეს პატაკი დააწერინეს სწორედ ამ საფუძვლით.
რამდენად არსებობდა შმაგი ტრაპაიძის სამსახურიდან დათხოვნის სამართლებრივი საფუძველი ამაზე უახლოეს მომავალში საქალაქო სასამართლო იმსჯელებს…
