როგორც კომისიის თავმჯდომარემ, თინა ხიდაშელმა დღეს გამართულ სხდომაზე განაცხადა, კომისია მარეგულირებელი კომისიის იმ წევრების იმპეჩმენტის საკითხს დააყენებს, რომელთაც „მაუწყებლობის შესახებ“ კანონი დაარღვიეს და რომელთა სახელები ცალსახად გამოკვეთილია. თინა ხიდაშელმა ასეთებად კომისიის ორი წევრი – ირაკლი ჩიქოვანი და კარლო კვიტაიშვილი დაასახელა.
_ “ირაკლი ჩიქოვანის მფლობელობაში არსებული კომპანია შპს ,,მაგი სტილი მედია“ ამზადებს და სატელევიზიო მაუწყებლების ეთერში განათავსებს რეკლამებს. ამავე დროს, საქართველოს კანონმდებლობით კომისიას დაკისრებული აქვს ვალდებულება, რომ გამოავლინოს სატელევიზიო მაუწყებლების მიერ რეკლამის განთავსების ლიმიტის დარღვევის ფაქტები და მათზე შესაბამისი რეაგირება მოახდინოს. აღნიშნულ შემთხვევაში ,,მაუწყებლობის შესახებ“ კანონის თანახმად, კომისიის წევრს ინტერესთა კონფლიქტი აქვს, თუ იმავდროულად აქვს სხვა პირდაპირი ან არაპირდაპირი ეკონომიკური ინტერესი იმ პირის მიმართ, რომლის საქმიანობაც განეკუთვნება კომისიის რეგულირების სფეროს. იკვეთება ირაკლი ჩიქოვანის ინტერესთა კონფლიქტი, რაც ამავე კანონის მე-10 მუხლის მე-2 პუნქტის ა ქვეპუნქტის თანახმად იმპიჩმენტის საფუძველია“, _ განაცხადა თინა ხიდაშელმა.
მისივე თქმით, დღეისათვის ირაკლი ჩიქოვანი საქართველოს კომუნიკაციების ეროვნული კომისიის მოქმედი კომისიონერია, ის საქართველოს კომუნიკაციების ეროვნული კომისიის თავმჯდომარეობიდან 2013 წლის 15 აპრილს გადადგა, თუმცა 2012 წლის 06 ნოემბრიდან სამსახურში არ გამოცხადებულა, რაც იმპიჩმენტის საფუძველს იძლევა, დასძინა თინა ხიდაშელმა.
პარლამენტის პრესსამსახურის ინფორმაციით, ხიდაშელმა კარლო კვიტაიშვილის ინტერესთა კონფლიქტთან დაკავშირებით ისაუბრა.
_ “მნიშვნელოვანია კომისიის თავმჯდომარის კარლო კვიტაიშვილი პარტიული საქმიანობა. „ერთიანი ნაციონალური მოძრაობისა“ და საქართველოს ცენტრალური საარჩევნო კომისიის მიერ მოწოდებული ინფორმაციით, 2005 წლის 27 ივლისიდან 2013 წლის 24 აპრილამდე იგი ცესკო-ში იყო „ერთიანი ნაციონალური მოძრაობის“ წარმომადგენელი, რაც კანონით, ასევე აკრძალულია“, – განაცხადა თინა ხიდაშელმა.
მისივე თქმით, დროებითი საგამოძიებო კომისიის შესწავლის საგანს წარმოადგენს საქართველოს კომუნიკაციების ეროვნული კომისიის ერთ-ერთი წევრის სოფიო ბრიტანჩუკის ინტერესთა კონფლიქტი, მისი მეუღლის ნოდარ ჭარხალაშვილის მიერ შპს „ტელერადიოკომპანია ობიექტივის“ 51% წილის ფლობასთან დაკავშირებით.
კომისიის თავმჯდომარის ინფორმაციით, საგამოძიებო კომისიის მუშაობს ე.წ. “დაკონსერვებულ სიხშირეებზე“.
როგორც თინა ხიდაშელმა განმარტა, საგამოძიებო კომისიამ ყურადღება შეაჩერა 2008 წლის აგვისტოს ომის მოვლენების დროს ელექტრონული კომუნიკაციების სფეროში სახელმწიფო თავდაცვის, უშიშროებისა და მართლწესრიგის დაცვის მიზნით განხორციელებული ღონისძიებებზე. მისივე თქმით, დასკვნაში წარმოდგენილი იქნება საავტორო და მომიჯნავე უფლებების დაცვის საკითხებზე საქართველოს კომუნიკაციების ეროვნული კომისიის მიერ განხორციელებული აქტივობები.
თინა ხიდაშელის განმარტებით, საქართველოს კომუნიკაციების ეროვნული კომისია ე.წ. “შერჩევით სამართლის“ მეთოდით სჯიდა მაუწყებლებსა და ოპერატორებს, რომ წლების განმავლობაში მოწმდებოდნენ და სანქცირდებოდნენ მხოლოდ კონკრეტული სუბიექტები. ხოლო რიგი ოპერატორები და მაუწყებლები სარგებლობდნენ კომისიის მხარდაჭერით.
_ “ამ მიზნით საგამოძიებო კომისიის შესწავლის საგანს წარმოადგენს 2012 წლის 6 ოქტომბერს გავრცელებული ჩანაწერი, რომელშიც საქართველოს კომუნიკაციების ეროვნული კომისიის თავმჯდომარე ირაკლი ჩიქოვანი საუბრობს კანონის გვერდით ავლით საქმიანობის განხორციელებაზე“, – განაცხადა თინა ხიდაშელმა.
მისივე თქმით, დასკვნაში, საგამოძიებო კომისიის განსაკუთრებული ყურადღება სამაუწყებლო ლიცენზიების მოდიფიცირების პროცესში საქართველოს კომუნიკაციების ეროვნული კომისიის მოქმედებების შესწავლას და სააბონენენტო ნომრების პორტაბელობას ეთმობა.
