ამაზე პასუხის გაცემა კონკურსამდე რთულია. თუმცა, როგორც ქუთაისის მერიის ადმინისტრაციულ სამსახურში აცხადებენ, საატესტაციო გამოცდები იგეგმება, რომლის თანახმად ყველა, ვინც თანამდებობებზე ახალი დანიშნულია და ვერ დააკმაყოფილებს პირობებს, მათი თანამდებობები ისევ ვაკანტური გახდება.
მიუხედავად უკვე ორკვირიანი მოლოდინისა და პროგნოზებისა, რომ ქუთაისის მერია ამჯერად მაინც შეძლებს კონკურსის გამოცხადებას და თანამშრომლების შედეგების მიხედვით აყვანას, ისევ პროგნოზად და სამომავლო პერსპექტივად რჩება.
ამის პარალელურად თითქმის ყველა სამსახურს ახალი უფროსი ჰყავს, რომლებიც თანამდებობებზე, ამ დრომდე გაურკვეველი კრიტერიუმების გარეშე ინიშნებიან. მერიის ადმინისტრაციული სამსახურის უფროსის ვახტანგ წოწონავას განცხადებით, კონკურსი აუცილებლად იქნება, თუმცა, როდის, ამის თქმა ძალიან უჭირს.
“რეორგანიზაციის შემდგომი ეტაპი არის ატესტაცია, რომელიც ჩატარდება მოქმედ თანამშრომლებს შორის. შემდეგ გამოვლინდება ვაკანტური ადგილები. ყველა, ვინც არის ახლა უფროსი, უფროსის მოადგილე, ყველა არიან მოვალეობის შემსრულებლები. გამოცხადდება კონკურსი და ყველას ექნება საშუალება შეიტანოს განაცხადი და მიიღოს მონაწილეობა. ამისთვის უკვე შექმნილია საკონკურსო კომისია. მე ძალიან მიჭირს იმ კონკრეტული თარიღის დასახელება, თუ როდის გამოცხადდება კონკურსი,” _ განაცხადა “გურია ნიუსთან” საუბრისას ქუთაისის მერიის ადმინისტრაციული სამსახურის უფროსმა ვახტანგ წოწონავამ.
ქუთაისის მერიაში რეორგანიზაციის შედეგად, თანამშრომელთა 13% გაათავისუფლეს. თითქმის ყველა სამსახურს ახალი უფროსი ჰყავს. რეორგანიზაციის ფარგლებში, 1 ივლისს, ქუთაისის მერია თანამშრომლებისთვის კონკურსის გამოცხადებას გეგმავდა, თუმცა, ამ გზით მათი შერჩევა ამ დრომდე არ დაწყებულა. ქუთაისის ვიცე-მერი თენგო თოფურიძე ორი კვირის უკან აცხადებდა, რომ კონკურსი უახლოეს დღეებში გამოცხადდებოდა.
