2012 წლის საპარლამენტო არჩევნებში გამარჯვება ოპოზიციურმა კოალიციამ “ქართულმა ოცნებამ” მოიპოვა. ოქტომბრის მოვლენების შემდეგ სიტუაცია შეიცვალა ადგილობრივ დონეზეც, მათ შორის, მუნიციპალიტეტის საკრებულოში. “ერთიანი ნაციონალური მოძრაობის” რიგების დატოვება ახლა აღარავის უკვირს. ოზურგეთის საკრებულოში შეიქმნა კოალიცია “ქართული ოცნება”, “ერთობა”. ამ დღეებში ცნობილი გახდა, რომ კიდევ ერთი ფრაქცია შეიქმნა, რომელსაც “ოზურგეთი” დაარქვეს. ფრაქციის თავმჯდომარე, 2012 წლის არჩევნების შემდეგ ფრაქცია “ნაცმოძრაობის”თავმჯდომარე (ახლა უკვე ყოფილი) , შალვა თავდიშვილი გახდა. მის ფრაქციაში სამი ადამიანი იყო გაწევრიანებული და რადგან ერთმა დატოვა, ამის გამო გაუქმდა. შალვა თავდიშვილი ამის შემდეგ, ახალ ფრაქციას ჩაუდგა სათავეში. მისი თქმით, მას და მის მეგობრებს გურამ მიქელაძეს და შოთა მარგალიტაძეს (ახალშექმნილი ფრაქციის წევრები) სურთ, რომ ოზურგეთელებისთვის კარგი საქმე აკეთონ.
_ პირდაპირ გიფიქსირებ, ვერ გეტყვით, რომ ახალშექმნილი ფრაქცია ნაცმოძრაობისაა. ნაციონალების ფრაქცია არის “ნაციონალური მოძრაობა – ძლიერი თვითმმართველობა”, რომლის თავმჯდომარე არის მიხეილ გოგოტიშვილი, წევრები კი მე, ირინა საჯაია და ავთანდილ ნემსაძე ვართ, – გვითხრა ოზურგეთის მუნიციპალიტეტის საკრებულოს წევრმა, ირინა საჯაიამ.
_ ფრაქცია “ერთიანი ნაციონალური მოძრაობის” რომ ყოფილიყო, მაშინ “ნაცმოძრაობას” დავარქმევდით. შევიკრიბეთ ის ადამიანები, რომლებსაც გვინდა, რომ ოზურგეთისთვის რაღაც გავაკეთოთ და შევხედავთ ყველაფერს,_ ამბობს “გურია ნიუსთან” საუბრის დროს ფრაქცია „ოზურგეთის“ თავმჯდომარე შალვა თავდიშვილი.
_ ბატონო შალვა, რა იყო მიზეზი, რომ ფრაქცია „ერთიანი ნაციონალური მოძრაობა“ დაიშალა და უცებ ახალი ფრაქცია შექმენით?
_ ფრაქცია იმის გამო დაიშალა, რომ სამი ადამიანი ვიყავით და ერთი წავიდა. რაც შეეხება ჩვენს მიერ ახალი ფრაქციის შექმნას, იმიტომ გადავწყვიტეთ, რომ ჩვენ მხარს ვუჭერთ ოზურგეთის წინსვლას.
_ მე ფრაქციის დაშლის მთავარ მიზეზზე შეგეკითხეთ.
_ არ ვიცი, ადამიანმა დატოვა ფრაქცია და მას უნდა ჰკითხოთ.
_ კონკრეტული გეგმა გაქვს ოზურგეთის განვითარებისთვის?
_ კი ბატონო, გვაქვს.
_ შეგიძლიათ გააცნოთ ჩვენს მკითხველს.
_ გვინდა, რომ სოციალური კუთხით დავძლიოთ პრობლემა.
_ კონკრეტულად როგორ აპირებთ ამ პრობლემის მოგვარებას?
_ ვმუშაობთ ამ საკითხთან დაკავშირებით. მომავალ სხდომაზე ჩვენს ხედვას და პროგრამას აუცილებლად წარმოვადგენთ. _ განაცხადა სატელეფონო საუბრის დროს შალვა თავდიშვილმა.
