“ერთიანი ნაციონალური” მოძრაობა ქუთაისის მერის დიმიტრი კოპალიანის და საკრებულოს თავმჯდომარის თამაზ მარგველაშვილის იმპიჩმენტს ითხოვს. “ნაციონალური მოძრაობის” წევრის გია გოქაძის განცხადებით, კოპალიანის მოსვლის შემდეგ მერიაში ნეპოტიზმმა აქტიურად მოიკიდა ფეხი. “ნაციონალები” კონკრეტულ სახელებს და გვარებს ასახელებენ და აღნიშნავენ, რომ სამაშველო სამსახურების ხელმძღვანელები, სწორედ ნათესაური ნიშნით დაინიშნენ. მაგ: საკრებულოს ფრაქცია “ქართული ოცნების” თავმჯდომარის მამუკა მღვდელაძის და “საქარველოს პატრიოტთა ალიანსის” წევრის კახა ნემსიწვერიძის ძმებმა სამაშველო სამსახურის ხელმძღვანელი პოსტები ჩაიბარეს.
მერიის ადმინისტრაციის უფროსის მოვალეობის შემსრულებელი, ირინა სახელაშვილი ამ განცხადებას დღესვე გამოეხმაურა და აღნიშნა, რომ მერიაში ამ დროისთვის ყველა სამსახურის ხელმძღვანელი მოვალეობის შემსრულებელია და მათი ოფიციალურად დანიშვნა მათ მიერვე კონკურსის წარმატებით გავლის შემთხვევაში გახდება შესაძლებელი. თუმცა, ქუთაისის მერია, როგორ უკვე აღვნიშნეთ, ამ დრომდე კონკურის დანიშვნის ოფიციალურ თარიღსაც არ ასახელებს. ირინა სახელაშვილის განცხადებით, ახლობლების დანიშვნას კანონმდებლობა არ კრძალავს.
“ვინც ვართ დანიშნული, ყველა ვართ მოვალეობის შემსრულებლები. ეს იმით იყო განპირობებული, რომ მერიის სტრუქტურები არ ჩამოშლილიყო. ჩატარდება კონკურსი და ყველა კონკურსის წესით დაინიშნება. ცნობისთვის _ ახლობლების დანიშვნა არ ეწინააღმდეგება სამართლებრივი ნორმების დარღვევას”, _ განაცხადა მერიის ადმინისტრაციის უფროსის მოვალეობის შემსრულებელმა ირინა სახელაშვილმა.
“პატრიოტთა ალიანსის” წევრი კახა ნემსიწვერიძე ბრალდებას უარყოფს და აღნიშნავს, რომ მისი ძმა პაატა ნემსიწვერიძე სამაშველო სამსახურში, სახანძრო განყოფილების ხელმძღვანელად, დაახლოებით, 10 წელია მუშაობს, რაც არავის აძლევს იმ განცხადებების გაკეთების უფლებას, რომ თითქოს ეს ხალხი კოპალიანის მოსვლის შემდეგ დაინიშნენ.
რაც შეეხება ქალაქის მერის და საკრებულოს თავმჯდომარის იმპიჩმენტის საკითხს, ნემსიწვერიძე ამბობს, რომ საკრებულოს თავმჯდომარის თამაზ მარგველაშვილის იმპიჩმენტის საკითხი დღის წესრიგში არ დგას, ისევე. როგორც დიმიტრი კოპალიანის. თუმცა, რამდენიმე კვირის წინ სწორედ “საქართველოს პატრიოტთა ალიანსი” ალაპარაკდა მერის იმპიჩმენტის საკითხზე და აცხადებდნენ, რომ კოპალიანის მოსვლის შემდეგ მერიაში ყველა სამსახურის მუშაობა პარალიზებული იყო. კახა ნემსიწვერიძე აღნიშნულ ფაქტზე ამბობს, რომ “პატრიოტთა ალიანსმა” მერიას დრო მისცა სიტუაციის გამოსასწორებლად და ეს დრო კოპალიანმა ნაყოფიერად გამოიყენა, რის გამოც მისი იმპიჩმენტის საკითხი დღის წესრიგიდან ამოღებულია.
ქუთაისის მერის და პარტია “საქართველოს პატრიოტთა ალიანსის” პოლიტიკური დაპირისპირება ჯერ კიდევ ორი კვირის წინ მიმდინარეობდა, რომელიც ბრალდებათა კასკადში და საპასუხო ბრიფინგების სერიაში გადაიზარდა. ყოფილი “ნაციონალები”, ახლა უკვე “პატრიოტები”, ყოფილი ვიცე-გუბერნატორის გოჩა თევდორაძის თაოსნობით, კოპალიანის იმპიჩმენტის საკითხის დღის წესრიგში დაყენებას განიხილავდნენ. პასუხები არც ქუთაისის მერმა დააყოვნა და საკმაოდ ხმამაღალი განცხადებები გააკეთა. მაშინ კოპალიანი აღნიშნავდა, რომ ქუთაისში უზნეო პოლიტიკოსები დახვდნენ და მუშაობაში ხელს უშლიდნენ. ვინ იგულისხმა ქუთაისის მერმა ამ განცხადებაში, ირიბად ყველასთვის გასაგები იყო, თუმცა, მალევე მისი ფრაზა განაზოგადა და ქალაქის მერიას სამსახურების ახალი უფროსები წარუდგინა.
კოპალიანი ამ ეტაპზე სამუშაო ვიზიტით ამერიკაში იმყოფება, ქუთაისის მერიაში კი ძალაუფლების გადანაწილება პოლიტიკური ბრალდებების ფონზე მიმდინარეობს.
რაც შეეხება “ნაციონალური” მოძრაობის მოთხოვნას, რომ ქალაქის მერის და საკრებულოს თავმჯდომარის იმპიჩმენტის საკითხი დადგეს, მოთხოვნადვე დარჩება, ვინაიდან ყოფილი “ნაციონალური” უმრავლესობა, უცვლელი შემადგენლობით, “საქართველოს პატრიოტთა ალიანსის” სახელით განაგრძობს მუშაობას საკრებულოში და ძალაუფლებაც მათ ხელშია. ცხადია, ფრაქცია “საქართველოს პატრიოტთა ალიანსი” საკუთარ გუნდის წევრს, საკრებულოს თავმჯდომარეს თამაზ მარგველაშვილს ყოფილი უმრავლესობის მოთხოვნით არ გაწირავს. რაც შეეხება ქალაქის მერს, როგორც კახა ნემსიწვერიძე აღნიშნავს, მის მუშაობას კვლავ დააკვირდებიან.
