ისინი სენაკში არსებული ამჟამინდელი სიტუაციის ფართო მკითხველამდე მიტანას გვთხოვენ.
“ქალთა კავშირმა” რედაქციაში მოიტანა მიმართვა, რომელსაც პრემიერ-მინისტრს, ბიძინა ივანიშვილს უგზავნიან. როგორც არასამთავრობო ორგანიზაციის წარმომადგენლები ამბობენ, ამ მიმართვას ყველა მედიასაშუალებას გადასცემენ და პრემიერის პასუხს დაელოდებიან.
მიმართვას უცვლელად გთავაზობთ:
“ბატონო ბიძინა, გვინდა სიმართლე როგორმე თქვენს ყურამდე მოვიდეს. ვერ წარმოგვედგინა, თუ 1-ლი ოქტომბრის არჩევნების შემდეგ სენაკში სახეშეცვლილ “ნაცმოძრაობას” ვიხილავდით “ოცნების” რიგებში. რა გაუჭირდა ისეთი “ქართულ ოცნებას” ყოფილი მედროვე ნაცების დახმარება რომ გადაწყვიტა? “ოცნების” რიგებში იყვნენ და არიან ღირსეული ადამიანები, რომლებმაც სიცოცხლის ფასად სასწორზე დადეს საკუთარი ოჯახები. მაინც ვერ გავიგეთ, რისთვისაა საჭირო ეს გამყალბებელი მედროვე ნაცები, რა ფუნქცია აკისრიათ ყველაფრის შემდეგ მათ ქვეყნის ხვალინდელი დღის შექმნაში? არ გვინდა ვიფიქროთ, რომ ისინი მიზნის მისაღწევად და არჩევნების მოსაგებად არიან საჭირონი! თუ ეს ასეა, გამოდის, რომ ბინძური გამყალბებლებით ისევ და ისევ სიბინძურეები უნდა ვაკეთოთ. ეს ქვეყანას კარგს არაფერს მოუტანს.
ერთადერთი, ვისიც გვჯერა, ეს თქვენ ხართ, ბატონო ბიძინა. ამიტომ გვინდა თქვენს ყურამდე მოვიტანოთ ის სიმართლე, რაც დღეს უამრავ ადამიანს ოცნებებს უსამარებს და რწმენას უკარგავს.
სენსაციური ამბები ვითარდება სენაკში _ გვაქვს ინფორმაცია, რომ სენაკის “მრეწველობა გადაარჩენს საქართველოს” პარტიის თავმჯდომარე იქნება სენაკის საკრებულოს საფინანსო-საბიუჯეტო სამსახურის თავმჯდომარე ნატო ხუბუა, რომელიც 9 წელი ემსახურებოდა დანაშაულებრივი ხელისუფლების რეჟიმს, მისაბიშვილის შვილობილი 1-ლი ოქტომბრის არჩევნებში “ოცნების” წინააღმდეგ იბრძოდა, რისი თვითმხილველებიც თავად ვართ. ეს არის სენაკის მოსახლეობისთვის სულში ჩაფურთხება. “კონსერვატიული პარტიის” თავმჯდომარედ მოიაზრება საკრებულოს ინფრასტრუქტურის კომისიის თავმჯდომარე სოსო მიქავა, რომელიც ასევე უბადლო გამყალბებელი იყო, მისი მეუღლე სენაკის გამგებლის აპარატის უფროსია. “ქართულ ოცნებას” ნამდვილად უჭირს, ასე გამოდის _ ჩვენ მივიღებთ მედროვე ნაცების მისაბიშვილისა და მისი ხროვის მიერ ჩატარებულ გაყალბებულ არჩევნებს. სამარცხვინოა, სენაკის მოსახლეობას რას ეუბნებით ოცნების ლიდერებო? სკამებზე იმიტომ დაგსვით რომ პოლიტიკური ნაგვები დაგესვათ გვერდით?! მათ რომ მოეგოთ ჩვენი პატრონი არავინ იქნებოდა.
მინდა მივმართო უმრავლესობას _ ნუ გაამწარებთ ხალხს ისე, რომ შურისძიებით იქნეს სამართლიანობა მიღწეული, ნუ გაამწარებთ თქვენთვის ნაბრძოლ ხალხს!
სახეშეცვლილი ზონდერები ბრუნდებიან სენაკში. კიდევ ერთხელ დარჩა ხალხი მოტყუებული. რაც ვთქვით ყველაფერი ახდა, თუნდაც საკრებულოს თავმჯდომარის და სენაკის გამგებლის მაგალითი აჩვენებს ამას. მისაბიშვილის “გაოცნებებით” სენაკში დაიწყო ოცნების დასამარება. სენაკის საკრებულოზე იყო შეტანილი განცხადება პროკურატურაში, რომელიც 4-თვის მერე გადაეგზავნა საფინანსო პოლიციას, საიდანაც ჯერ პასუხიც არ მიგვიღია. დანაშაულებრივი ხელისუფლების შემსრულებლებს დღევანდელი ხელისუფლებაც ხელს აფარებს. ახდა მისაბიშვილის სიტყვები _ “ოცნების” შტაბის უფროსად მოვალო, ის დაავიწყდა ყველას, როცა ერთი მიკროავტობუსი ხალხი დაახვედრა ივანიშვილს ზუგდიდში იუსტიციის სახლთან?
სად ხარ ბატონო ბიძინა? ესაა სამართლიანობის აღდგენა? თქვენ მწარედ გატყუებენ. პირადად გაეცანით რაიონებში არსებულ ვითარებას, სენაკის მსგავს ამბებს სხვაგანაც ნახავთ. ზემოთ ხსენებულ ხალხზე მალე ვიდეომასალასაც დავდებთ, თუ როგორ იქცეოდნენ არჩევნების პერიოდში და როგორ აგრძელებენ თავიანთ შავ-ბნელ საქმეებს ახლაც”.
რედაქციისთვის გამოგზავნილ წერილში “ქალთა კავშირი” სენაკის №64 საარჩევნო ოლქის კომისიის წევრთა 13-კაციან სიაზე საუბრობს.
ჩვენ სოსო მიქავას დავუკავშირდით:
_ ბატონო სოსო, რედაქციაში შემოვიდა არასამთავრობო ორგანიზაციის “ქალთა კავშირის” მიმართვა, სადაც ნათქვამია, რომ თქვენ მოიაზრებით “კონსერვატიული პარტიის” თავმჯდომარედ.
_ ჯერჯერობით, არაფერი არ არის ცნობილი ამის შესახებ და საიდან მოიტანეს, ან როგორ გავრცელდა ეს ინფორმაცია, ვერაფერს გეტყვით.
_ “კონსერვატიული პარტიის” წევრი ბრძანდებით?
_ ამ პარტიის წევრი არ ვბრძანდები, მაგრამ ეს იმას არ ნიშნავს, რომ, დავუშვათ, სიტყვაზე ვამბობ, სადაც ჩემი საქმე იქნება და სადაც ხელი მიგვიწვდება, რომ ქვეყნისთვის კეთილი საქმე ვაკეთოთ, იქ არ დადგე და არ ჩავება იმ ფერხულში, სადაც ჩვენს ხალხს და ჩვენს საქართველოს ვემსახუროთ.
ამის შემდეგ ნატალია ხუბუას ვესაუბრეთ:
_ ქალბატონო ნატალია, “გურია ნიუსის” რედაქციაში შემოვიდა არასამთავრობო ორგანიზაციის “ქალთა კავშირის” მიმართვა და მე გავაკეთებ ციტირებას იმ ადგილისას, სადაც თქვენ ხართ მოხსენებული: “გვაქვს ინფორმაცია, რომ სენაკის “მრეწველობა გადაარჩენს საქართველოს” პარტიის თავმჯდომარე იქნება სენაკის საკრებულოს საფინანსო-საბიუჯეტო სამსახურის თავმჯდომარე ნატო ხუბუა”. რა კომენტარს გააკეთებდით?
_ ჯერ ერთი, პირველ რიგში, ნატო არ ვარ, მე ვარ ნატალია და უკვე აქ ეშლება იმ ვიღაცას, ვინც ეს მიმართვა დაწერა. რაც შეეხება იმ საკითხს, რომლითაც დაინტერესდით, ჯერჯერობით ოფიციალურად გადაწყვეტილი არაფერი არ არის, ამიტომ ამ ეტაპზე კომენტარის გაკეთება საკმაოდ ნაადრევად მიმაჩნია.
_ ე. ი. ამ საკითხის შესახებ არაფერი არსად არ თქმულა?
_ გადაწყვეტილი არაფერი არ არის, არის რაღაც მონახაზი, მაგრამ არ ვფიქრობ, რომ სენაკში ჩემი ავტორიტეტი და პროფესიული საქმიანობა ვინმესთვის პრობლემას წარმოადგენდეს.
