2013 წლის 9 ივლისს ეს საქმე, შემდგომი გამოძიების ჩატარების მიზნით, მთავარი პროკურორის მოადგილის დადგენილებით გადაეცა საქართველოს შს სამინისტროს გენერალურ ინსპექციას.
გენინსპექციამ კი დაადგინა, რომ მიქაუტაძეზე არც ფსიქოლოგიური და არც ფიზიკური ზეწოლა არ გახორციელებულა. ამის დასტურად, აღნიშნულმა ორგანომ მოწმეების ჩვენებები და სამხარაულის ექსპერტიზის ეროვნული ბიუროს დასკვნაც გამოაქვეყნა.
“საქმეზე მიღებული იქნა მამუკა მიქაუტაძის გვამის სასამართლო-სამედიცინო ექსპერტიზის დასკვნა N002898413, რომლის თანახმად, მამუკა მიქაუტაძის სიკვდილის მიზეზია მექანიკური ასფიქსია, განვითარებული კისრის ორგანოებზე მარყუჟის ჩაჭერის შედეგად. გვამის გამოკვლევის დროს ნანახი სიკვდილის შემდგომი გვამური მოვლენების მხედველობაში მიღებით მოქ. მამუკა მიქაუტაძის სიკვდილიდან გვამის გამოკვლევამდე გასული უნდა იყოს დაახლოებით 6 სააათი. მოქ. მამუკა მიქაუტაძის გვამს კისრის ზედა მესამედში, ფარისებრი ხრტილის ზემოთ აღენიშნებოდა სიცოცხლის დროინდელი სტრანგულაციური ღარი და კისრის მარჯვენა გვერდით ზედაპირზე ნაჭდევი. რაც განვითარებულია სამარყუჟე მასალის ჩაჭერის შედეგად. სიცოცხლის დროს, სიკვდილის დადგომამდე უახლოეს პერიოდში და უშუალო მიზეზობრივ კავშირში იმყოფება დამდგარ შედეგთან. ქიმიურ-ტოქსიკოლოგიურ ექსპერტიზაზე წარმოდგენილ მამუკა მიქაუტაძის გვამიდან აღებულ სისხლში აღმოჩნდა 0,79 % ეთილის სპირტი. სისხლში არ აღმოჩნდა ნარკოტიკული საშუალება. გარდა თავის ჩამოხრჩობით მიღებული დაზიანებისა, გვამს გარეგნულად მექანიკური დაზიანების სხვა რაიმე ობიექტური ნიშნები არ აღენიშნება“, _ წერია გენინსპექციის მიერ გამოქვეყნებულ პირველად დასკვნაში.
ამ დასკვნაში ეჭვი შეაქვთ არასამთავრობო ორგანიზაციის წარმომადგენლებს. ახალგაზრდა იურისტთა ასოციაციის თავმჯდომარე კახა კოჟორიძე ამბობს, რომ გარდაცვლილ მამუკა მიქაუტაძის გვამს დაზიანებები აღენიშნებოდა.
_ ის, რომ სამხარაულის საექსპერტო ბიუროს დასკვნა სწორი არ არის, ეს უკვე დადასტურებულია ალტერნატიული ექსპერტიზის მიერ, სადაც აღნიშნულია, რომ მიქაუტაძეს სხეულზე აქვს დაზიანება, რომელიც, სავარაუდოდ, იმ დროს უკავშირდება, როდესაც ის პოლიციის განყოფილებაში იმყოფებოდა. სამხარაულის საექსპერტო ბიუროს დასკვნაში თუნდაც იმის გამო შეიძლება ეჭვის შეტანა, რომ მან ეს ერთეული დაზიანებაც კი არ დააფიქსირა და აქედან გამომდინარე, რატომ უნდა ვენდოთ ამ დასკვნას? გარდა ამისა, ფიზიკური დაზიანება არ არის მხოლოდ ერთი უკანონო ქმედება, რაც შეიძლება ადამიანს მიადგეს საგამოძიებო მოქმედების დროს _ ფსიქოლოგიური ზემოქმედებაც ასევე არასწორი ქმედებაა, თუმცა, კიდევ ერთხელ ვამბობ, რომ ჩვენ იმიტომ არ ჩავატარეთ გვამის შინაგანი გამოკვლევა, რომ გარეგანი დათვალიერებითაც დასტურდებოდა ფიზიკური ზეწოლის კვალი, _ განაცხადა კოჟორიძემ “გურია ნიუსთან” საუბრისას.
“გურია ნიუსი” შპს “ვექტორის” დამოუკიდებელ ექსპერტს ალექსანდრე გეჯაძესაც დაუკავშირდა, რომელმაც საია-ს მოწვევით მამუკა მიქაუტაძის გვამის გარეგანი დათვალიერება მოახდინა.
ექსპერტი ჩვენს ჟურნალისტთან საუბარში ამბობს, რომ სამხარაულის საექსპერტო ბიუროდან სხვა შედეგს არც ელოდა: “ეგენი ახალს არაფერს არ აკეთებენ. დაზიანება, რაც მიქაუტაძის გვამზე ფიქსირდებოდა, ჩემს დასკვნაში დავაფიქსირე. სხვა შედეგს სამხარაულის ბიუროდან არც ველოდი”.
არასამთავრობო ორგანიზაცია “საქართველოს დემოკრატიული ინიციატივის” ხელმძღვანელი გიორგი მშვენიერაძე მიიჩნევს, რომ ეს საქმე შინაგან საქმეთა სამინისტრომ არ უნდა გამოიძიოს:
_ შს სამინისტროს მიერ შიდა მოკვლევის თუ გამოძიების ჩატარება ეწინააღმდეგება საერთაშორისო სტანდარტებს, კერძოდ, დაუშვებლად არის მიჩნეული შინაგან საქმეთა სამინისტრო იძიებდეს საკუთარ უწყებაში ჩადენილ შესაძლო დანაშაულს, რაც, სავარაუდოდ, ამ უწყების მოხელეთა მიერ არის ჩადენილი. გირგვლიანის საქმეში ევროპის ადამიანის უფლებათა სასამართლომ დარღვევად მიიჩნია ის გარემოება, რომ საქმეს, გარკვეული პერიოდის განმავლობაში, იძიებდა ის უწყება, რომლის მოხელეთა მიერ იყო დანაშაული ჩადენილი. აქედან გამომდინარე, ჩვენ კიდევ ერთხელ მივმართავთ მთავარ პროკურორს, რომელმაც იუსტიციის მინისტრის ბრძანების საწინააღმდეგოდ საქმე გამოსაძიებლად გადასცა შინაგან საქმეთა სამინისტროს, დაიბრუნოს ეს საქმე და ყველა შეკითხვას გასცეს ამომწურავი პასუხი, _ აღნიშნავს მშვენიერაძე.
შსს-ს დასკვნას ენდობა მიქაუტაძის ქვრივი. თუმცა, გარდაცვლილის დედა, გუგული მიქაუტაძე “გურია ნიუსის” ჟურნალისტთან ეკა ალფაიძესთან საუბრისას ამ საქმის გარკვევას ითხოვს:
_ ეს საქმე რომ გავარკვიოთ, არ შეიძლება? ჩამოვალ, დედა, თბილისში, რაცხა, მიშველეთ, დედა, დამიდექით გვერდში, გამარკვევინეთ სიმართლე! რძლისგან ვიცი, რომ იმ დღეს ნაცემი მოსულა სახლში, სხვა არაფერი ვიცი, შვილო. თბილისში უნდა ჩამევიდე და გავარკვიო, რას ერჩოდნენ ჩემს შვილს, რატომ მოაკვლევინეს თავი! _ გუგული უგულავა.
ამ საქმეში აღსანიშნავია კიდევ ერთი მნიშვნელოვანი დეტალი _ შინაგან საქმეთა სამინისტროს ერთ-ერთ მთავარ მოწმედ 13 წლის არასრულწლოვანი ჰყავს.
“საქმეზე მიმდინარე გამოძიების პროცესში ასევე მოწმის სახით დაიკითხა, 03.03.2001 წელს დაბადებული გ.ჩ. გ.ჩ.-მ მშობლის თანდასწრებით აჩვენა შემდეგი, რომ 2013 წლის 06 ივლისს დილის საათებში, ზუსტი დრო არ ახსოვს, მარტო წავიდა თბილისის ზღვაზე საბანაოდ. როდესაც მორჩა ბანაობას და წამოვიდა სახლისკენ, დაინახა, რომ მისი საცხოვრებელი კორპუსის ჩასახვევთან ჩადიოდა მოცისფერო ავტომანქანა „მერსედეს-ბენცი“, რომელიც ზღვის პირას მდგარ ხესთან გაჩერდა და გამოვიდა მისთვის უცხო მამაკაცი. როგორც იხსენებს, ამ კაცს ეცვა მუქი ფერის მაისური და ჯინსის შარვალი, ფერი არ ახსოვს. ხსენებულმა პიროვნებამ ავტომანქანიდან გადმოსვლის შემდგომ გაიხადა ტანზე და საცვლიანი ჩავიდა წყალში. გ.ჩ.-ს განმარტებით, ამ დროს მამაკაცს ხელში არაფერი არ ეჭირა. რის შემდეგაც იგი უკვე იყო ზღვიდან მოშორებით და არ დაუნახავს ჩაყვინთა თუ არა მამაკაცმა ზღვაში, რადგან ეფარებოდა ხეები და ვეღარ ხედავდა და განაგრძო გზა სახლისაკენ. ამის შემდეგ არ ახსოვს ზუსტად როდის, მაგრამ ტელევიზორში გამოაცხადეს, რომ ვიღაც კაცმა თავი ჩამოიხრჩო თბილისის ზღვაზე და აჩვენეს ის ადგილი. ტელევიზორში გამოჩნდა ის მოცისფერო მერსედესი, რომელიც გ.ჩ.-ს განმარტებით, მან ნახა თბილისის ზღვაზე. გ.ჩ. განმარტავს, რომ იგი ხსენებულ მამაკაცთან ახლოს არ მისულა და არ დალაპარაკებია, მას არ იცნობდა და მითითებულ დროს ნახა პირველად. ასევე განმარტავს, რომ ხსენებულ მამაკაცს სხვა პიროვნება არ ახლდა და იგი იყო მარტო” _ წერია გენინსპექციის გამოქვეყნებულ დასკვნაში.
სამართალმცოდნე ლევან ალაფიშვილი მიიჩნევს, რომ გამოძიებამ დამატებითი მტკიცებულებების მოსაპოვებლად ყველაფერი უნდა გააკეთოს:
_ ბატონო ლევან, შსს-ს მუქაუტაძის საქმეში ერთ-ერთ მთავარ მოწმედ ჰყავს არასრულწლოვანი. როგორ ფიქრობთ, ეს ეჭვებს იწვევს?
_ გამოძიების დანიშნულება ეჭვებისა და ვარაუდების გამორიცხვა, მაქიმალურად შემცირებაა. ამ მიზანს გამოძიებამ უნდა მიაღწიოს შეთანხმებული და ეჭვის გამომრიცხავი, საკმარისი მტკიცებულებების შეკრებით. ეს, რა თქმა უნდა, არ ნიშნავს, რომ არასრულწლოვანი მოწმის ჩვენება არ შეიძლება მტკიცებულებად გამოიყენოს გამოძიებამ, მაგრამ ყველა საშუალება უნდა სცადოს და ამოწუროს სხვა, დამატებითი მტკიცებულებების მოსაპოვებლად – ეს მცდელობები უნდა ჩანდეს/დასტურდებოდეს საქმის მასალებითც და მოქმედებებითაც. თუკი ეს ყველაფერი სახეზე არ არის, მაშინ არათუ ეჭვი ჩნდება ან ეს ეჭვი საფუძვლიანია, არამედ გამოძიებაა არაობიექტური, _ გვითხრა ალაფიშვილმა.
შინაგან საქმეთა სამინისტროს პრესსამხურის ხელმძღვანელის, ნინო გიორგობიანის ინფორმაციით, ამ საქმეზე ჯერჯერობით სიახლე არაფერია:
_ რაც გვქონდა, ყველაფერი გამოვაქვეყნეთ. როცა ახალი დეტალი გაირკვევა, საზოგადოებას მივაწვდით ინფორმაციას.
– ქალბატონო ნინო, გამოძიებას არასრულწლოვანი მოწმის გარდა, ჰყავს თუ არა სხვა თვითმხილველი, სხვა მოწმე, რომელმაც მიქაუტაძე თბილისის ზღვაზე მარტო მყოფი დაინახა?
_ რა შუაშია არასრულწლოვანი მოწმე?! ყველა იმ პირის ვინაობა გამოქვენდა, რომელიც ამ საქმეზე დაიკითხა გამოძიების პროცესში, _ გვითხრა ნინო გიორგობიანმა.
ფოტო: www.amerikiskhma.com
