“კანონში შესატანი ცვლილებების ოცნებისეულ ვარიანტს შეიძლება მხოლოდ ცინიკური ეწოდოს”

_ “დემოკრატიული მოძრაობის“ ყველა მოთხოვნა დამყარებულია ერთადერთ პრინციპზე – სამართლიანობაზე და საარჩევნო გარემოს რეალურ გაუმჯობესებაზე, რაც ყველა პოლიტიკურ ძალას ჩააყენებს თანაბარ სასტარტო პირობებში. სამწუხაროა რომ, კოალიცია “ქართული ოცნება“ რომელის საპარლამენტო არჩევნებში გამარჯვებაც, მნიშვნელოვანწილად უმთავრესმა დაპირებამ – ქვეყანაში სამართლიანობის აღდგენამ განაპირობა, ვერ ასრულებს ხალხისათვის მიცემულ ამ უმნიშვნელოვანეს დაპირებას და უფრო მეტიც, ის ხელისუფლებაში მოსვლის შემდეგ “ნაციონალური მოძრაობასთან“ კოჰაბიტაციითაა დაკავებული.

პოლიტიკური გაერთიანებების შესახებ კანონში შესატან ცვლილებებთან დაკავშირებული პერიპეტიები სამწუხაროდ მოწმობს იმას, რომ კოალიციაში შემავალი პარტიების დიდი უმრავლესობისათვის ხელსაყრელი აღმოჩნდა თავის დროზე „ნაციონალური ხელისუფლების“ მიერ საკუთარ თავზე მორგებული კანონები და ახლა მათ გადაწყვიტეს წინამორბედის მიერ უკიდურესად დამძიმებული საარჩევნო გარემო კიდევ უფრო მძიმე გახადონ.

კანონში შესატანი ცვლილებების ოცნებისეულ ვარიანტს შეიძლება მხოლოდ ცინიკური ეწოდოს, რომ აღარაფერი ვთქვათ უსამართლობის ხარისხზე. აღნიშნული ვარიანტით, საქართველოს მოსახლეობამ საკუთარი ჯიბიდან, ანუ ქვეყნის ბიუჯეტიდან დაფინანსება ოთხჯერ უნდა გაუზარდოს “ნაციონალური მოძრაობას“, პოლიტიკურ ძალას, რომელმაც ქვეყანაში ჩამოაყალიბა ძალადობრივი, ტერორისტული რეჟიმი და რომელთანაც თავდაუზოგავი ბრძოლის უმძიმესი შედეგები თითოეულმა ჩვენთაგანმა საკუთარ თავზე გადავიტანეთ, ხოლო რაც შეეხება თავად „ქართულ ოცნებას“ მას ამ ცვლილებების მეშვეობით საბაზო დაფინანსება ეზრდება 24-ჯერ.

როგორც აღმოჩნდა, რომ არა “დემოკრატიული მოძრაობის“ მკვეთრად უარყოფითი პოზიციის საჯარო დაფიქსირება, კოალიციის წევრები ინფორმაციულ ვაკუუმში ამყოფებდნენ საკუთარ ლიდერს – პრემიერმინისტრს და მის ზურგს უკან ცდილობდნენ ამ კანონპროექტის გატანას.

საბედნიეროდ აღნიშნული უსამართლობა უკვე აღკვეთილია, თუმცა შედეგად “ქართული ოცნება“ საკუთარი პოლიტიკური ამბიციების ჩიხში აღმოჩნდა, საიდანაც გამოსავლის ერთადერთი გზა ისევ და ისევ მხოლოდ სამართლიანობაზე გადის.

ბიძინა ივანიშვილის მიერ გაკეთებული განცხადებები მომავალ საპრეზიდენტო არჩევნების უპრეცედენტოდ დემოკრატიულად ჩატარების თაობაზე, ასევე მის მიერ, რამდენიმე დღის წინ, საკუთარი გუნდის წევრებთან დაფიქსირებული პოზიცია, იმედს გვაძლევს, რომ ახალი ხელისუფლების წარმომადგენელთა შემდგომი ნაბიჯი იქნება ყველა იმ სამართლიანი მოთხოვნის გათვალისწინება, რომელსაც მაისის თვიდან მოითხოვს „დემოკრატიული მოძრაობა“ ინტერფრაქციული ჯგუფის მუშაობის პროცესში.

გვინდა ხაზგასმით აღვნიშნოთ, რომ “დემოკრატიული მოძრაობის“ ყველა მოთხოვნა დამყარებულია ერთადერთ პრინციპზე – სამართლიანობაზე და საარჩევნო გარემოს რეალურ გაუმჯობესებაზე, რაც ყველა პოლიტიკურ ძალას ჩააყენებს თანაბარ სასტარტო პირობებში.

იმედს ვიტოვებთ, რომ ახალი ხელისუფლება დაუყოვნებლივ განაახლებს დიალოგს არასაპარლამენტო ოპოზიციასთან და მათი დამოკიდებულება აღნიშნული უმნიშვნელოვანესი საკითხისადმი ამჯერად მაინც იქნება სამართლიანი, დამყარებული პარტნიორულ თანამშრომლობაზე.

“დემოკრატიული მოძრაობა“ მოუწოდებს ქართული ოცნების წარმომადგენლებს, რომ ხელი აიღონ “ნაციონალური მოძრაობის“ მსგავს ფასადურ მოქმედებებზე, როდესაც იქმნებოდა დემოკრატიულობის ილუზია, ხოლო რეალური მიზანი მხოლოდ საკუთარი კეთილდღება და ხელისუფლების უზურპაცია გახლდათ, _ აცხადებს ჭყოიძე.