აუდიტის დასკვნის შედეგად ერთ-ერთი ა(ა)იპ-ის _ “სპორტული ცენტრის” საქმე უკვე პროკურატურას გადაეცა.
როგორც აუდიტის სამსახურის ხელმძღვანელმა გიორგი ფაცურიამ გვითხრა, “სპორტულ ცენტრში” საკმაოდ მრავლად აღმოჩნდა დარღვევები: “სპორტულ ცენტრში” ძირითადი რის შესასწავლადაც შევედით, ეს იყო გაბერილი შტატები და თანხის არამიზნობრივი ხარჯვა. გამოვლინდა, რომ არ ფუნქციონირებს საცურაო აუზი და თანხა კი იცემოდა. გამოვლინდა ისიც, რომ ერთსა და იმავე ადგილზე დასაქმებულია ორი პიროვნება. პრობლემები გვქონდა შეთავსებებთანაც. აღმოჩნდა არამიზნობრივი ხარჯვის შემთხვევებიც. როდესაც გავაკეთეთ მოხსენებითი ბარათი, დავწერეთ, რომ სრული პასუხისმგებლობა ეკისრება დირექტორს. ჩვენ საბოლოო გადაწყვეტილებას, სამწუხაროდ, ვერ ვიღებთ და დამოკიდებული ვართ იმაზე, თუ რას გადაწყვეტს საკრებულო. ერთ თვეზე მეტი იქნება გასული დასკვნის დადებიდან, საკრებულოს მხრიდან კი ჯერ-ჯერობით რეაგირება არ არის,” _ უთხრა “გურია ნიუსს” გიორგი ფაცურიამ.
იმის შესახებ, თუ რა სახის დარღვევებია “სპორტულ ცენტრში”, აუდიტის სამსახურის ანგარიშში წერია: “ერთ-ერთი მოქალაქის მიერ განცხადებაში იყო მოყვანილი ფაქტები, რომელიც წარედგინა განსახილველად გამგეობის შიდა აუდიტის სამსახურს, რომლის მიერაც დადასტურდა საბიუჯეტო თანხების არაკანონიერი და არამიზნობრივი ხარჯვა.
“სპორტულ ცენტრში” 2013 წლის ხარჯთაღრიცხვით 256 500 ლარის ხარჯი იყო გათვალისწინებული, მათ შორის, შტატიან 5 მუშაკზე ხელფასი _ 24 600 ლარი; შტატგარეშე 60 მოსამსახურეზე _ 171 360 ლარი; მივლინებებზე _ 22 300 ლარი; ოფისის ხარჯზე _ 13 560 ლარი; ტრანსპორტირებაზე _ 3 000 ლარი; სხვა მომსახურებაზე _ 17 770 ლარი; ინვენტარის შეძენაზე _ 3 060 ლარი. 2012 წელს კი ხარჯთაღრიცხვით 271 305 ლარის ხარჯი იყო გათვალისწინებული. ე.ი. 2013 წელთან შედარებით 14 805 ლარით მეტი.
2011 წლის ადგილობრივმა შემოსავალმა საცურაო აუზიდან 2 562 ლარი შეადგინა, ხოლო 2012 წელს _ 2 647 ლარი, მიმდინარე წელს კი ადგილობრივი შემოსავალი საცურაო აუზის არ ფუნქციონირების გამო არ ფიქსირდება.
შემოწმებით გამოვლინდა საბიუჯეტო თანხის ხარჯვის ხარვეზები. კერძოდ: 2011 წლის 1 მაისაიდან 2013 წლის 1 მაისამდე ცურვის მწვრთნელზე, წყლის დაქლორვის სპეციალისტზე რომლებიც ხელშეკრულებით იყვნენ აყვანილნი, მაშინ როცა საცურაო აუზი არ ფუნქციონირებდა, გაცემულია 6 480 ლარი ხელფასის სახით. სპორტული ცენტრის ადგილობრივი შემოსავალი განისაზღვრება ცურვიდან შემოსული თანხებით. ხელშეკრულებით აყვანილია ადგილობრივი შემოსავლების მოლარე, რომელზეც ხელშეკრულების მოქმედება არ შეჩერებულა საცურაო აუზის არფუნქციონირების დროსაც და გაცემულია ხელფასის სახით 1 360 ლარი. აღსანიშნავია ის ფაქტიც, რომ 2011 წლის 4 თვე და წლის 2012 წლის 1 იანვრიდან 1 მაისამდე არ ჰქონდათ გაზის ხარჯი, მაგრამ მის ოპერატორზე არ არის ხელშეკრულება შეჩერებული და გაცემულია 8 თვეში ხელფასის სახით 4 640 ლარი. ამდენად, აუდიტის სამსახურს მიაჩნია, რომ კანონდარღვევით, შრომის ანაზღაურების სახით გაცემულია 12 480 ლარი. საბიუჯეტო თანხების არამიზნობრივ ხარჯვას ადასტურებს ის ფაქტებიც, რომ სპორტულ ცენტრში დასაქმებულია 3 საქმის მწარმოებელი.
აუდიტის სამსახურს მიზანშეწონილად არ მიაჩნია ერთი საქმის მწარმოებლის გარდა ამ სამსახურში დამატებით ორი საქმის მწარმოებლის დასაქმება, რომლებზეც გაცემულია 2011 წლის 03.01-დან 2013 წლის 01.04-მდე 11 000 ლარი.
საგულისხმოა ის ფაქტიც, რომ ერთი და იგივე ფუნქციის შესასრულებლად დასაქმებული არიან როგორც მომარაგების, ასევე ლოჯისტიკის სპეციალისტები. ასევე სპორტული ცენტრის დირექტორს, მოადგილეს და სასწავლო ნაწილის გამგეს საშტატო განრიგით თანამდებობრივი სარგო შეადგენს, შესაბამისად, 500, 450 და 450 ლარს. ამავე დროს, ისინი დასაქმებულები არიან სხვადასხვა წრეებში ერთი და იმავე სამუშაო საათებში შესაბამისი ანაზღაურებით. თითოეულის ხელფასი 230 ლარია. აუდიტის სამსახურს მიზანშეწონილად არ მიაჩნია ერთი და იმავე სამუშაო საათებში ორი სხვადასხვა სამსახურეობრივი მოვალეობის შესრულება.”
როგორ აღმოჩნდა “სპორტული ცენტრის” საქმე დამატებით განსახილველად პროკურატურის ხელში? როგორც ირკვევა, ამაში საკრებულო არ ურევია. “ცხელი ხაზის” საშუალებით გახორციელებული ზარის შედეგად, პროკურატურამ თავად მოითხოვა აუდიტის დასკვნა.
როგორც საკრებულოს თავმჯდომარემ ამირან გიგინეიშვილმა გვითხრა, სპორტული ცენტრის საკითხს პროკურატურა საკმაოდ დიდი ხანია სწავლობს: “აქედან გამომდინარე, ველოდებით მის დასკვნას. პროცესი დაახლოებით შემიძლია გითხრათ რა პროცესშია _ ეს საქმე გადაცემულია სამხარეო ბიუროს ექსპერტიზას და ველოდებით პასუხს. მე თავის დროზე მივწერე ამ ა(ა)იპ-ის ხელმძღვანელს, რომ ის ვალდებულია ითანამშრომლოს პროკურატურასთან და მისი ბრალდებების ან პასუხისმგებლობის საკითხი დადგება მას შემდეგ, როცა იქნება პროკურატურის დასკვნა. “
პროკურორი მამუკა ნადირაძის თქმით, გამოძიება მიმდინარეობს: “ველოდებით დასკვნას, რომლის შედეგადაც გაირკვევა, რასთან გვაქვს საქმე. გამოძიების ინტერესებიდან გამომდინარე, მეტს ვერაფერს გეტყვით,” _ გვითხრა ნადირაძემ.
სტატიები მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
