სხდომას გამგებლის მოვალეობის შემსრულებელი ზაზა ურუშაძე ესწრებოდა, რომელმაც ფეხბურთის სფეროში არსებული სიტუაციის შესახებ ინფორმაცია ზაზა ურუშაძემ გააცნო საკრებულოს წევრებს: _ სტადიონთან დავალიანება გვქონდა 22 000 ლარი, მაგრამ, როგორც ვიცი, ახლა 27 000-ზე ავიდა. პრობლემაა ისიც, რომ მოედანი, რომელიც ფედერაციამ გააკეთა რთული მოსავლელია და მისი მოვლა თვეში 2 500 -3 000 ლარი ჯდება. ჩამოყვანილი გვყავდა ბალახის სპეციალისტები ფოთიდან, მაგრამ შედეგი ვერ მივიღეთ _ მინდორი სპეციფიურ მოვლას ითხოვს. მიმდინარეობს სარემონტო სამუშაოები _ მონტაჟდება სკამები; რემონტდება გასახდელები და მოსასვენებელი ოთახები; გაკეთდება საკონფერენციო დარბაზი, პატარა ბარი. ორი გასვლითი თამაში გველის წინ და მესამე თამაშში, შეიძლება, ლანჩხუთში შევხვდეთ თბილისის “დინამოს”. მანამდე თუ მოესწრო ეს ყველაფერი, კარგი იქნება.
_ სპონსორის მოძიების მხრივ რა სიტუაციაა? – დაინტერესდა საკრებულოს წევრი მერაბ წილოსანი.
_ გუნდი ამჯერად გრიგოლეთშია _ სასტუმრო გვაქვს მათთვის ნაქირავები. ერთ თვის საფასური უკვე გადავიხადეთ და მეორე თვისაა გადასახდელი. 30 კაცის შენახვა 9 000 ლარი ჯდება. ჩვენივე სახსრებით ვკვებავთ, იმიტომ რომ იაფი გამოგვდის და სიტუაცია კონტროლის ქვეშაა. რაც შეეხება ბაზას, დავალებული გვაქვს, რომ გავასუფთავოთ, იქვე ახლოს ტყე გაიწმინდოს, რომელიც გველებითაა სავსე. ბაზის ნახაზი გაკეთებულია. სამჯერ შევხვდით ეკონომიკის მინისტრს, რომელიც დაგვპირდა, რომ პრემიერმინისტრთან შეთანხმებით, ეს ბაზა ჩვენ გადმოგვეცემა, რაც სპონსორის ძიებაში წინ წაგვწევს.
დიდი მითქმა-მოთქმა გამოიწვია იმან, რომ გუნდიდან ვიღაცას უშვებენ, ვიღაცას ტოვებენ… რამდენჯერმე მომიხდა ყოფილ მწვრთნელთან და ფეხბურთელებთან შეხვედრა. მათ ვუთხარი, რომ გააგრძელონ მუშაობა. არ მაინტერესებს არავის თანამდებობა, ვინ სად იქნება, ჩემთვის მთავარია, კლუბმა ფუნქციონირება გააგრძელოს და იქ იმ ხალხმა იმუშაოს, ვინც წარმატებას მოგვიტანს. ახალი მწვრთნელი უკვე დაინიშნა _ დავით მახარაძე, რომლის ნახვის შემდეგ მე დავრწმუნდი, რომ პროფესიონალია. გავუფორმებთ მას ხელშეკრულებას და ვნახოთ, რა შედეგს დადებს.
რაც შეეხება სპონსორს, ეს საკმაოდ რთული თემაა. ვისაც ფული აქვს, იმან კარგად იცის, რომ მოგებაზე ვერ იმუშავებს და სამ-ოთხ წელიწადს სარჩენი ეყოლება კლუბი. სამ ადამიანთან უკვე სერიოზულად მიდის მოლაპარაკება. ველოდებით ბაზის გადმოცემას, რადგან გვთხოვენ რეესტრის ამონაწერს, რომლის მიხედვითაც ბაზა მუნიციპალიტეტის ბალანსზე იქნება.
მალე გვეცოდინება იმ 19 კაცის სია, რომლებიც ძირითად გუნდში დარჩებიან. თუ გაგვიჭირდა, შეიძლება, ერთი უკრაინელი ფეხბურთელიც დავამატოთ. ყოველ შემთხვევაში, ჯერ საიმისო თანხა არ არის, რომ უცხოელს ფული გადავუხადოთ. უკრაინელები ჩამოდიან 26-ში და შეიძლება, დაგვეხმარონ ერთი ფეხბურთელის შენახვაში. თუ სპონსორი მოიძებნა, ცვლილებები ნამდვილად იქნება და ის თავად მიხედავს ყველაფერს.
მე კიდევ ერთხელ შევხვდები იმ ხალხს, ვისაც წვლილი მოუძღვის წინა წლებში გუნდის წარმატებაში და თუ ჩვენთან ურთიერთობის სურვილი ექნებათ, ყველასთვის კარი ღიაა. იმის თქმა, რომ ფული დამიდეთ “კეისით“ და მერე მე მოვალ, არ გამოვა. ფული რომ გვქონდეს, გერმანელებს ჩამოვიყვანთ.
თუ გვინდა რამეს მივაღწიოთ, უნდა დავიწყოთ ბავშვთა ფეხბურთით. მე ვფიქრობ, რომ ჩვენ მზად არ ვიყავით უმაღლესი ლიგისთვის _ არ გვაქვს ინფრასტრუქტურა, სტადიონი, ფორმები… 60 000 ლარი გვჭირდება ამისთვის. ეს სალაპარაკოდ იოლია, მაგრამ როცა ფულზეა ლაპარაკი, ფაქტობრივად, მათხოვრად ვართ გადაქცეულები.
როგორც ვთქვი, 26-ში ველოდებით უკრაინელებს და მათთან ამხანაგური მატჩი უნდა ჩავატაროთ. მინდა, ამ დღისთვის სტადიონამდე მისასვლელი გზა მაინც გასუფთავდეს. შეიძლება პრემირმინისტრიც დაესწროს თამაშს. ჩამოსვლა უნდა სამ მინისტრს. ეს იქნება ჩვენი რეკლამა.
დაახლოებით 15 მილიონია ჩასადები ლანჩხუთის “გურიაში“ ამჯერად, რომ ეს პრობლემები მოგვარდეს. გასულ წელთან შედარებით, გამჭვირვალე იქნება ყველაფერი, დაინახავენ, რაში იხარჯება თანხა.
რაც შეეხება პრემიებს, როგორც წინა წლებში იყო, ისე არ იქნება, გაიცემა მხოლოდ ფეხბურთელზე, მწვრთნელზე, სტადიონის მუშაკზე და ბუღალტერზე.
გამგებელს ისევ მერაბ წილოსანმა მიმართა და გულისტკივილი გამოხატა იმ გუნდის წასვლის გამო, ვინც “გურია“ უმაღლეს ლიგაში გადაიყვანა:
_ რა დააშავა იმ ხალხმა, მამუკა ბარამიძის ხელმძღვანელობით, ვინც გუნდი წარმატებამდე მიიყვანა და ბევრი იბრძოლეს ამისთვის. დღეს არც ერთი აღარ არის გუნდში!
ურუშაძემ თქვა, რომ გუნდის კარი ყველასთვის ღიაა, თუმცა, “არა ისე, ფული “ქეისით” დავუდოთ ვინეს,” _ გაიმეორა მან.
წილოსანს საკრებულოს თავმჯდომარის მოადგილე ზვიად აფხაზავაც დაეთანხმა, შემდეგ საუბარში ილია გვარჯალაძე ჩაერთო და ლანჩხუთის ყოფილი გამგებლის გია გოგუაძის დამსახურება შეახსენა დამსწრეებს: _ თუ დამსახურებაზე მიდგება საქმე, ყველაზე დიდი წვლილი ” გურიას“ წარმატებაში გია გოგუაძეს მიუძღვის, _ თქვა გვარჯალაძემ.
