რომ ამა წლის 23 მარტს ქარისგან დაზარალდა ქ. ოზურგეთში, გრიბოედოვის ქუჩა # 31-ში მდებარე მრავალბინიანი საცხოვრებელი სახლის და ლიფტის შახტის სახურავები. 70%-ითაა შესაცვლელი თუნუქის საფარი. აქტის სისწორეს ვადასტურებთ ხელმოწერით: ოზურგეთის რწმუნებული ლევან მგელაძე, სპეციალისტი ავთანდილ ჩხაიძე.”
ოზურგეთში, გრიბოედოვის ქუჩაზე მდებარე საცხოვრებელი სახლის სახურავის შეკეთება, ხარჯთაღრიცხვა: “ჩვენ, ქვემოთ ხელის მომწერმა კომისიამ, შემადგენლობით: ოზურგეთის მუნიციპალიტეტის გამგებლის მოადგილის შემსრულებელმა გიორგი ღურჯუმელიძემ, გამგეობის ინფრასტრუქტურისა და საინვესტიციო გარემოს განვითარების სამსახურის უფროსის მოვალეობის შემსრულებელმა თემურ გიორგაძემ, ა.(ა) ი.პ. კეთილმოწყობისა და არქიტექტურული დაგეგმარების ცენტრის სპეციალისტმა მალხაზ გორგოშიძემ, ქ. ოზურგეთის ტერიტორიული ორგანოს რწმუნებულმა, ლევან მგელაძემ შევადგინეთ ეს სადეფექტო აქტი მასზედ, რომ ოზურგეთში, გრიბოედოვის ქუჩა # 31- ში მდებარე საცხოვრებელი სახლის სახურავის შეკეთებისათვის საჭიროა, შესრულდეს შემდეგი სახისა და რაოდენობის სამუშაოები:
_ დაზიანებული სახურავის აღდგენა არსებული მასალით, რაოდენობა _ 4 ცალი, გოფრირებული თუნუქი _ 17 ცალი, ხრახნიანი ლურსმანი _ 100 ცალი. აქტის სიზუსტეს ვადასტურებთ: გ. ღურჯუმელიძე, თ. გიორგაძე, მ. გორგოშიძე, ლ. მგელაძე.
ოზურგეთში, გრიბოედოვის ქუჩაზე # 31-ში მდებარე საცხოვრებელი სახლის შეკეთების ხარჯთაღრიცხვა თანხით, საერთო ჯამში, ოფიციალური დოკუმენტების თანახმად 862, 48 ლარს შეადგენს.”
ოზურგეთის მუნიციპალიტეტის გამგებლის მოვალეობის შემსრულებელს, კონსტანტინე შარაშენიძეს “გურია ნიუსმა” ოფიციალური განცხადებით 8 ივლისს მიმართა:
_ გთხოვთ, მოგვაწოდოთ ოზურგეთის მუნიციპალიტეტში სტიქიით დაზარალებული ოჯახების ჩამონათვალი, მოქალაქეთა სახელობითი სია, ასევე კონკრეტულად, ვის საცხოვრებელ სახლს დასჭირდა სრული გადახურვა, მათი მისამართი, საკონტაქტო ტელეფონის მითითებით. ასევე გთხოვთ, მოგვაწოდოთ იმ მოქალაქეთა ჩამონათვალი, ვის საცხოვრებელ სახლსაც დასჭირდა სხვადასხვა სახის მასალები, რა თანხები ან რა მასალები გაიხარჯა თითოეულზე ცალ-ცალკე, მათი მისამართები. ასევე გთხოვთ, მოგვაწოდოთ ზარალის დამთვლელი კომისიის დასკვნა. შესაბამისი ხარჯთაღრიცხვები, სადეფექტო აქტები.
საქართველოს მთავრობის განკარგულებით, ოზურგეთის მუნიციპალიტეტს სტიქიის შედეგების სალიკვიდაციოდ, 450 000 ლარი გამოეყო.
მუნიციპალიტეტს სარეაბილიტაციო მასალებით დახმარება საქველმოქმედო ფონდმა “ქართუმ” და ფინანსთა სამინისტროს მომსახურების სააგენტომ გაუწიეს.
ჩვენ მიერ გამგეობიდან გამოთხოვილი ოფიციალური დოკუმენტების საფუძველზე ირკვევა, რომ 2013 წლის 23 მარტს, ოზურგეთის მუნიციპალიტეტში, სტიქიით გამოწვეული ზარალის სალიკვიდაციო სამუშაოების გახორციელებისთვის გამოყოფილი იქნა ასევე 2 000 ლიტრი დიზელი, რომლითაც, როგორც დოკუმენტშია ნათქვამი, სამშენებლო მასალების ტრანსპორტირება გახორციელდა და ასევე, 1 000 ლიტრი ბენზინი, რომელიც, დოკუმენტის თანახმად, ზარალის დამთვლელი კომისიის მოძრაობას მოხმარდა.
# 497 ბრძანების საფუძველზე, 2013 წლის 23 მარტს, ოზურგეთის მუნიციპალიტეტში სტიქიის შედეგად დაზიანებული საცხოვრებელი სახლების მდგომარეობის შესასწავლად, საგანგებო სიტუაციათა მართვის დროებითი კომისია შეიქმნა. კომისიის თავმჯდომარეა კონსტანტინე შარაშენიძე, ოზურგეთის მუნიციპალიტეტის გამგებლის მოვალეობის შემსრულებელი, მოადგილეა გიორგი ღურჯუმელიძე, წევრები: თემურ გიორგაძე, ეკონომიკისა და საინვესტიციო გარემოს განვითარების განყოფილების უფროსი; გელა ჭანუყვაძე, გამგეობის ზედამხედველობის სამსახურის უფროსი; ალეკო ბერიძე, საფინანსო _ საბიუჯეტო სამსახურის უფროსი.
ოფიციალური დოკუმენტის თანახმად, დროებით კომისიას უნდა შეესწავლა დაზიანებული ოჯახების მდგომარეობა, შეედგინა სადეფექტო აქტები და წარმოედგინა ხარჯთაღრიცხვა.
ბრძანებას ხელს აწერს მუნიციპალიტეტის გამგებლის მოვალეობის შემსრულებელი კონსტანტინე შარაშენიძე.
“გურია ნიუსმა” ამ თემასთან დაკავშირებით გამოძიება დაიწყო. თავდაპირველად დავინტერესდით, ქალაქში რამდენი სახლი დაზიანდა სტიქიისგან და რამდენია რეაბილიტირებული.
გამგეობიდან გამოთხოვილი ოფიციალური დოკუმენტების თანახმად, ქალაქ ოზურგეთის მუნიციპალიტეტში 2013 წლის 23 მარტს, ძლიერი ქარის შედეგად, სულ დაზიანდა 340 საცხოვრებელი სახლი. აქედან ქალაქში _ 92. ოფიციალური საბუთების თანახმად, ქალაქში 92 დაზიანებული საცხოვრებელი სახლის ნაცვლად, სულ გადახურულია 17 საცხოვრებელი სახლი, თუმცა, ჩვენ მხოლოდ 10 საცხოვრებელ სახლზე მოგვაწოდეს შესაბამისი ხარჯთაღრიცხვაც და სადეფექტო აქტებიც. სოფლებში კი დაზიანებული 340 საცხოვრებელი სახლის ნაცვლად, რეაბილიტირებულია 47 სახლი.
აქვე გვინდა აღვნიშნოთ, რომ ზარალის დამთვლელი კომისიის დასკვნა ჩვენთვის არ მოუწოდებიათ.
ჩვენ შევეცადეთ, პირველ ეტაპზე ქალაქიდან დაგვეწყო და გადაგვემოწმებინა ეს ინფორმაცია და რეალურად გვენახა, არიან თუ არა დაკმაყოფილებულები ის ოჯახები, რომლებიც სტიქიით დაზარალებულთა სიაში მოხვდნენ. ვისი სახლები გადაიხურა და ვინ ვერ მოხვდა დახმარების სიაში. რა კრიტერიუმებით შეირჩა ის ოჯახები, რომლებსაც გამგეობამ დახმარება გაუწია და სწორედ იმ მრავალსართულიან ბინას ვესტუმრეთ, რის შესახებაც ინფორმაცია მკითხველს თავში ვაუწყეთ.
თუმცა, რაოდენ გასაკვირიც უნდა იყოს, ოზურგეთში გრიბოედოვის ქუჩაზე # 31-ში მდებარე 12-სართულიანი ბინისთვის, ოფიციალური დოკუმენტების თანახმად, დახარჯულია 862, 48 ლარი. იქ მცხოვრებლები კი აცხადებენ, რომ ამ თანხის ღირებულების მესამედი სამუშაოც არ შესრულებულა.
სვეტა ნადირიანი, ოლგა კასტრიკინა, მანანა ბიწაძე, დალი სიხარულიძე _ # 31 ბინის მცხოვრებლები: _ არ არის სიმართლე, რომ ბინა გადახურეს. არავის არაფერი გაუკეთებია, არ დაუხურავს. მოვიდნენ და გვითხრეს, რომ დაგვიხურავდნენ, მაგრამ არაფერი, მიაჭედეს მხოლოდ რამდენიმე თუნუქი, რომელიც მავთულებით დაამაგრეს. სახურავი არ გამოუცვლიათ, გვაწვიმს თავზე. მე-11 და მე-12 სართულზე წვიმაში ვედროებით დარბიან ოთახებში. დაგვპირდნენ, რომ გაგვიკეთებდნენ. 5 ცალი შიფერი შეგვიცვალეს მარტო, სხვა ბინა გადახურეს კარგად. რატომ ამოგვარჩიეს ასე, არ ვიცით. დაგვეხმარეთ, ძალიან გთხოვთ, არ არის მართალი ის, რაც ამ საბუთებში წერია. ამდენი ათასი ლარი როგორ იქნება დახარჯული? ამოდით, ნახეთ, ჭერში ავიდეთ და თქვენი თვალით ნახეთ, როგორი გაკეთებული და დამაგრებულია თუნუქი, _ ერთმანეთს ლაპარაკს არ აცლიდნენ აღნიშნული ბინის მცხოვრებლები.
ჩვენ შევეცადეთ, გადაგვემოწმებინა ინფორმაცია ოზურგეთის მუნიციპალიტეტის გამგეობის სამსახურში. ეკონომიკის, ინფრასტრუქტურისა და საინვესტიციო გარემოს განვითარების სამსახურის უფროსის მოვალეობის შემსრულებელმა თემურ გიორგაძემ კომენტარისთვის პრესსამსახურისკენ გადაგვამისამართა.
_ პრესსამსახურს მიმართეთ, _ გვითხრა გიორგაძემ.
_ ბატონო თემურ, პრესსამსახურმა მოგვაწოდა ოფიციალური დოკუმენტები, რის საფუძველზეც გადავამოწმეთ ინფორმაციები. აღმოჩნდა, რომ რამდენიმე ადგილზე ისე არ არის შესრულებული სამუშაო, როგორც საბუთებშია ნაჩვენები. ამიტომ გეკითხებით . თქვენი ხელმოწერაა სადეფექტო აქტებსა და ხარჯთაღიცხვებზე. იქნებ, აგვიხსნათ, რაშია საქმე?
_ უკვე ჩართული გაქვთ?
_ რა თქმა უნდა.
_ წინასწარ?
_ მოვედი და გთხოვეთ კომენტარი.
_ რატო იწერ?
_ მოვედი იმიტომ, რომ ჩავიწერო, ბატონო თემურ!
_ არ ვაკეთებ კომენტარს, მიმართეთ პრესსამსახურს.
იგივე პასუხით გამოგვისტუმრა კომენტარის გარეშე ა.(ა)ი.პ კეთილმოწყობისა და არქიტექტურული დაგეგმარების ცენტრის სპეციალისტმა მალხაზ გორგოშიძემ, რომლის ხელმოწერაცაა ასევე სადეფექტო აქტებზე და ხარჯთაღრიცხვებზე.
_ არ ვაკეთებ კომენტარს, _ გვითხრა გორგოშიძემ.
_ ბატონო მალხაზ, არ გაინტერესებთ, გაჩვენოთ თქვენ მიერ ხელმოწერილი აქტები? იქნებ, რას გეკითხებით? რაღაც ისე არ არის, როგორც ოფიციალურ დოკუმენტშია ნაჩვენები და თქვენი კომენტარი გვჭირდება.
_ მე რაც შევამოწმე და რაც ვნახე, იმაზე მოვაწერე ხელი და რა გაკეთდა და რა არ გაკეთდა, ეგ მე არ ვიცი. მე ვნახე, რომ იყო სახურავი ამძვრალი. ამაზე მოვაწერე ხელი. მერე რა გაკეთდა და როგორ, მოიძიეთ “ფორმა ორი” და ნახეთ. ჩემი საქმე არააა, მე დავაფიქსირე პრობლემა, _ გვითხრა მალხაზ გორგოშიძემ.
ოზურგეთის მუნიციპალიტეტის გამგებლის მოვალეობის შემსრულებლის მოადგილე გიორგი ღურჯუმელიძე აცხადებს, რომ “ამჟამად ობიექტების სია გაგზავნილია სამხარაულის ექსპერტიზის ბიუროში. 70 პროცენტს ვურიცხავთ შესრულებული სამუშაოებისთვის. 30 პროცენტს ვუკავებთ შემსრულებელს, სანამ სამხარაულის ექსპერტიზის ბიუროს დადებითი დასკვნა არ იქნება და მერე ჩავურიცხავთ დანარჩენს, თუკი დაადასტურებენ, რომ ამდენი ღირდა. ისინი ღირებულებასაც შეამოწმებენ და ხარისხსაც.”
_ როგორც ვიცით, საქმე ძიებაშია. თქვენ აწერთ ყველა დოკუმენტს ხელს, როგორ ფიქრობ, აღმოჩნდება თუ არა რაიმე დარღვევა სტიქიით დაზარალებულთა საქმეში?
_ კი, ბატონო, ყველაფერზე მე ვაწერ ხელს. “ფორმა ორზეც” და ყველა დოკუმენტზეც. მიღება-ჩაბარების აქტებზე და ხარჯთაღრიცხვებზე ინსპექტირების ჯგუფი აწერს ხელს, რომლის ხელმძღვანელიც მე ვარ, ბეჭედს ვარტყამ. პოლიციამ ჩემი მხრიდან რა დანაშაული უნდა დაინახოს? არანაირი დანაშაული აქ არ არის, თუმცა გარკვეულმა ჯგუფმა ჩათვალა რომ არის. მოგვთხოვა პოლიციამ დოკუმენტაცია და გავუგზავნეთ, მიმდინარე ეტაპი ექსპერტიზას ჩავაბარეთ. 41 ობიექტია. კიდე ჩასაბარებელი გვაქვს რამდენიმე ობიექტი. ელოდებიან დასკვნას და თუ ნახავენ რაიმე დანაშაულის ნიშნებს, კი ბატონო, პასუხსაც გავცემ.
_ ამჯერად ერთ კონკრეტულ ფაქტზე შეგეკითხებით. ეს ეხება # 31-ში მდებარე მრვალსართულიან საცხოვრებელ ბინას. მოსახლეობა აცხადებს, რომ არ გადახურულა ეს ბინა და ის თანხები, რაც წერია დოკუმენტებში, არაა გახარჯული.
_ კი, ვიცი ეგ ბინა. აქ იყო რაღაც ნაწილი გასაკეთებელი, თუ სახურავი იყო შესაცვლელი, ყველგან შეცვლიდნენ. ძალიან კარგია, თუ მასეთი ფაქტი არსებობს, რომ მოსახლეობა გააცხადებს, არ შესრულებულა სამუშაოო. თუ უხარისხოდ გაკეთდა, ამას ჩვენი ექსპერტებიც ნახავენ და ჩვენც შესაბამისად, იმ 30 პროცენტს არ ჩავურიცხავთ, ვინც სამუშაო უხარისხოდ შეასრულა. მახსოვს, გრიბოედოვზე ეს ბინები რაღაც სპეციფიკური იყო. მივალთ და დავაჯარიმებთ. იყო ასეთი შემთხვევა ერთ ადგილზე, გურამიშვილის ქუჩაზე, გვაცნობა მოსახლეობამ, რომ გადახურულში ისევ წყალი ჩამოდისო. მივედით და გავასწორეთ, _ გვითხრა ღურჯუმელიძემ.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
