მათი განცხადებით, ხელისუფლება ისეთ კანონს იღებს, რომელშიც თავადაც არ არის გარკვეული, რადგან ამით ხალხს აიძულებს თაღლითობა ჩაიდინონ და მიითვისონ ის თანხები, რომელიც მათ ნასესხები აქვთ კერძო კრედიტორებისგან. როგორც აღმოჩნდა, კრედიტორები საკუთარი ინიციატივით მოვიდნენ პარლამენტში, რადგან ზუსტად გაერკვნენ, რა მოხდება 6 თვის შემდეგ და რას ითვალისწინებს ახალი კანონპროექტი.
“ჯერ დაგვიდონ და გაგვაცნონ, რა კანონპროექტი იქნება. მე მგონი, თვითონაც არ იციან, რას აკეთებენ ან რა იქნება 6 თვის შემდეგ. ჩვენ თანახმა ვართ, შეიქმნას ახალი კანონები, მაგრამ უნდა ვიცოდეთ ეს კანონები რა ჩარჩოებში მოექცევა? უნდა ვიცოდეთ, რა ბედი ეწევათ იმ თანხებს, რომელიც ჩვენ ხალხს ვათხოვეთ. ძალიან ბევრი ჩვენთაგანი არის დევნილი, ვცხოვრობ ქირით, მეც დაკარგული მაქვს ბინა. ამ 6 თვის განმავლობაში რომ აჩერებენ სარგებლის მოცემას, ამით აიძულებენ ხალხს, რომ ჩაიდინონ თაღლითობა. მორჩეს ამ სესხების გასტუმრება, ამის შემდეგ დაიდოს ახალი კანონები და იმის მიხედვით იხელმძღვანელონ,” _ განაცხადა კერძო კრედიტორმა ხათუნა ოდიშვილმა ჟურნალისტებთან საუბრისას.
იპოთეკით დაზარალებულებს კი განსხვავებული პოზიცია აქვთ და აცხადებენ, რომ კერძო კრედიტორები მათგან ორმაგად ცდილობენ იმ თანხის ამოღებას, რომელიც გასესხებული აქვთ და ამის ხარჯზე ხალხი ქუჩებში რჩება, სახლების და ყოველგვარი შემოსავლის გარეშე.
“უსახლკაროდ ვრჩებით. 2-3 კვირის წინ ქუთაისში თავი დაიწვა ახალგაზრდა გოგომ, იმის გამო, რომ სესხს ვერ იხდიდა. ხალხი არ ხართ?! შეგვაძლებინეთ გადახდა!” _ ასე მიმართა იპოთეკით დაზარალებულმა გოჩა როხვაძემ კერძო კრედიტორებს. საუბარი მოგვიანებით საკმაოდ ხმამაღალ კამათში გადაიზარდა.
როგორ მოიქცევა საკანონმდებლო ორგანო ამ შემთხვევაში და გათვალისწინებული იქნება თუ არა კერძო კრედიტორების ინტერესები, ჯერჯერობით, დაუდგენელია.
