_ დეპუტატის თქმით, “ქართული ოცნების” საარჩევნო შტაბს ოზურგეთში მერაბ ჭანუყვაძე უხელმძღვანელებს.
დეპუტატის ამ განცხადებამ “ქართული ოცნების” ოზურგეთის შტაბში დიდი აჟიოტაჟი გამოიწვია.
“გურია ნიუსი” ამ საკითხზე “ქართული ოცნების” ოზურგეთის რაიონული ორგანიზაციის თავმჯდომარემ დავით დარჩიას ესაუბრა:
_ მე მინდა ამის შესახებ ჩემი პოზიცია დავაფიქსირო და განმარტებაც მოგცეთ _ ჩვენ არაფერი არ ვიცით მერაბ ჭანუყვაძის საარჩევნო შტაბის ხელმძღვანელად დანიშვნის შესახებ.
_ უნდა გცოდნოდათ?
_ რა თქმა უნდა. ნამდვილად უნდა მცოდნოდა, როგორ აპირებს ვინმე საარჩევნო კამპანიის წარმართვას. ამ საკითხის გადაწყვეტა ჩემთან შეთანხმებით უნდა მოხდეს, თან მე როგორც ვიცი, ეს მარტო ჩემთან კი არა, არსად არ არის შეთანხმებული _ ამის შესახებ არც ცენტრში იციან.
_ მაშინ რა გამოდის, ბატონო დავით _ დეპუტატის ნათქვამი, მერაბ ჭანუყვაძის დანიშვნა ცენტრში გადაწყდა და ის ოზურგეთში საარჩევნო შტაბს უხელმძღვანელებსო, სიმართლეს არ შეესაბამება?
_არ ვიცი, ჰკითხეთ ერთი მას! გთხოვთ, რომ კიდევ ერთხელ ჰკითხოთ მას ამის შესახებ, რატომ დაანონსა თუ განაცხადა წინასწარ! არ ვიცი, აზრზე არ ვარ. თქვენ გაგიცხადათ პირველად _ რას ნიშნავს ეს? მე არ ვიცოდი, ჩემთვის არ უთქვამს და გითხრათ თქვენ! ჯერ თვალითაც არ გვინახავს ეს ადამიანი საერთოდ, არავინ იცნობს მას, არ ვიცით, რამდენად მისაღებია მისი კანდიდატურა ჩვენი თანამებრძოლებისთვის. მე, პირადად, არ ვიცნობ ჭანუყვაძეს და აქედან გამომდინარე, სურვილიც არ მაქვს, რომ მას მხარი დავუჭირო.
_ თქვენ აცხადებთ, რომ არ დაუჭერთ მხარს ზვიად კვაჭანტირაძის კანდიდატურას, ვის მოიაზრებდით ამ პოსტზე?
_ არა, მე მხარს არ დავუჭერ, თუმცა, ჯერ საერთოდ არ მიდის საუბარი, ვინ უხელმძღვანელებს შტაბებს რაიონებში _ არ ყოფილა მაგ თემის განხილვა. ვინ იქნება შტაბის ხელმძღვანელი, ჯერ არ გადაწყვეტილა _ შეიძლება იყოს დავით დარჩია, დათო კუკულაძე ან მურად ჩხაიძე. გვყავს ხალხი, რომლებმაც შეიძლება წარმართონ საარჩევნო შეხვედრები, რომლებსაც აქვთ დიდი გამოცდილება და დიდი ბრძოლა გადაიტანეს.
_ ბატონო დავით, იქნებ, დეპუტატსაც არ მოსწონს თქვენ მიერ დასახელებული კანდიდატები და არც თვითონ გეთანხმებათ თქვენს გადაწყვეტილებებში? ამ შემთხვევაში როგორ უნდა მოხდეს ურთიერთშეთანხმება?
_ არ მგონია, მარტო ზვიადის გადასაწყვეტი იყოს რაიმე საკითხი. არის პოლიტიკური საბჭო, საარჩევნო შტაბი და ხელმძღვანელობა, რომლებიც წყვეტს ამ საკითხებს. შეიძლება არ უნდოდეს დათო დარჩია ბატონ ზვიად კვაჭანტირაძეს, მაგრამ ეს იმას არ ნიშნავს, რომ როგორც ზვიადი იტყვის, ისე უნდა გადაწყდეს რამე. ეს ვინმემ არ დაიჯეროს, ტყუილია.
_ ბატონო დავით, როგორც მაშინ თქვენც იტყვით, ისე უნდა იყოს?
_ არა. მაგრამ ეს საკითხი ჩემთვის იყო, როგორ გითხრათ, გამოცანაც… არ ველოდით, რომ თქვენ გეტყოდათ ამას პირველებს. მე გუშინ, მთელი დღის განმავლობაში ვხვდებოდი მას და არაფერი არ უთქვამს. ძალიან გაკვირვებული ვარ _ რატომ არ ჩათვალა საჭიროდ მან, ეთქვა ჩემთვის ის, რაც თქვენთან გაამხილა. ეს არის გასაკვირი.
_ აქციასთან დაკავშირებით გკითხავთ _ როგორია თქვენი მოსაზრება ამ საკითხზე? როგორც ვიცით, აქციის მონაწილეები უკვე იშლებიან _ მათ მოუწოდა ზვიად კვაჭანტირაძემ, რომ დაშლილიყვნენ.
_ ვინც თაობდა თუ ხელმძღვანელობდა ამ აქციას და ორგანიზატორობდა, იმანაც ალბათ ბოლოსდაბოლოს მიიღო სწორი გადაწყვეტილება და მოვიდა გონს, განუცხადა ამ ადამიანებს, რომ დროა დავიშალოთ და წაბრძანდეთ სახლში, თქვენ რაც გინდოდათ, იმას მიაღწიეთო.
_ რას გულისხმობთ?
_ ის ადამიანი ძალიან ახლოს იდგა ამ პროცესებთან, ის, რაც აქ ხდებოდა, მისთვის არ იყო ნამდვილად კარგი და ამისთვის მას თბილ სიტყვებს არავინ ეტყოდა. დეპუტატს, რომელიც იმ რაიონიდანაა, სადაც ეს სამარცხვინო აქცია მიმდინარეობდა, მადლობას ამისთვის არავინ ეტყოდა.
” გურია ნიუსი” ისევ დაუკავშირდა ზვიად კვაჭანტირაძეს, რომელმაც ” გურია ნიუსთან” მცირე კომენტარი გააკეთა:
_ მე მხოლოდ იმის თქმა შემიძლია, რომ დამირეკა ბატონმა დავით საგანელიძემ და მითხრა, ოზურგეთში საარჩევნო შტაბს უხელმძღვანელებს მერაბ ჭანუყვაძე და ეს ექსკლუზიურად გითხარით თქვენ.
დათო დარჩიას იმის თქმა თუ უნდა, რომ მას რატომ არ დაურეკეს პირველად ამის შესახებ და არ ამცნეს, ეს სხვა საკითხია. დეპუტატები არ ნიშნავენ შტაბის ხელმძღვანელებს და არც გადაწყვეტილებებს იღებენ _ ამას აკეთებს ცენტრალური შტაბი. თუ ტყუილია ჩემი განცხადება, ამის შესახებ გავრცელდა მედიაში და მაშინ, ბუნებრივია, იტყოდა ბატონი დავით საგანელიძე, რომ ეს ასე არ არის და ზვიადმა ტყუილი თქვაო. ბუნებრივია, ეს არ მომხდარა. ამ ეტაპზე მე სხვა კომენტარის გაკეთება არ შემიძლია, _ გვითხრა დეპუტატმა.
