ჟანა მეგრელიშვილი, ჟურნალისტი: – რამდენიმე წუთის წინ ერთ-ერთ მოქალაქეს, რომელიც თქვენთან პრობლემებზე სასაუბროდ მოვიდა, განუცხადეთ: ნახეთ გამგებელი მაქაა და ასევე მისი “უფროსი” ადიკო ივანიშვილი, ამასთან დაკავშირებით კომენტარი, თუ შეიძლება, ანუ კოტე შარაშენიძის უფროსი ადიკო ივანიშვილია?
ზვიად კვაჭანტირაძე, მაჟორიტარი დეპუტატი: – გამგებლის “უფროსი მეგობარი” ადიკო ივანიშვილია. სხვათა შორის, მქონდა ადიკოსთან საუბარი, მას ძალიან დიდ პატივს ვცემ და მის მიმართ ძალიან დიდი სიყვარულიც გამაჩნია.
ეს ინტერვიუ, რომელშიც კვაჭანტირაძეს არ უარუყვია, რომ პრობლემებზე სასაუბროდ მისული რიგითი მოქალაქე გამგებელთან და მის “უფროსთან“ – ადიკო ივანიშვილთან გადაამისამართა, “გურია ნიუსის“ ვებ გვერდზე 14 ივლისს გამოქვეყნდა. იმ დღეს, ჩოხატაურს ბიძინა ივანიშვილი სტუმრობდა. პრემიერთან ექსკლუზიური ინტერვიუს დაწყებამდე, კვაჭანტირაძემ ასეთი კომენტარი გააკეთა: “ჟანა მეგრელიშვილს ჩემი ხელით დავახრჩობ, სათაურში შეუცვლია“… საუბარს პრემიერის მრჩეველი და ფინანსთა მინისტრი ნოდარ ხადური ისმენდნენ (ამ საუბრის ჩანაწერი რედაქციაში ინახება). შეპასუხებაზე, რომ დეპუტატს ასეთი საუბარი არ შეეფერებოდა, კვაჭანტირაძემ დაბეჯითებით გაიმეორა, რომ ჟურნალისტს მისი ხელით “დაახრჩობდა“.
მუქარაზე გადასულ დეპუტატთან საუბარი იმ მიზეზით შეწყდა, რომ პრემიერმა ინტერვიუსთვის მზადყოფნა გამოთქვა. დასმულ შეკითხვებს შორის, ერთ-ერთი სწორედ კვაჭანტირაძის კომენტარს და შარაშენიძე-ადიკო ივანიშვილის მეგობრობას ეხებოდა.
ინტერვიუს დასრულების შემდეგ, ოზურგეთის მაჟორიტარი დეპუტატი იმით დაინტერესდა, ვუთხარი თუ არა პრემიერს, რომ ოზურგეთის გამგებელი, კოტე შარაშენიძე ჩემი ნათესავია. ამ რემარკისთვის პასუხის გაცემას არც ვაპირებდი, რომ არა მოგვიანებით, კვაჭანტირაძის მიერ ფეისბუქში დასმული რიგი შეკითხვები და მინიშნებები.
რამდენიმე თვით ადრე
აღდგომას, შუხუთში მყოფ პრემიერთან “გურია ნიუსის“ ინტერვიუს დროს, კვაჭანტირაძემ ირონიული რეპლიკა “ჩააგდო“:
_ ოხ, რა ხართ ეს “გურია ნიუსი?!
მაშინ, დეპუტატს ამ საქციელზე პრემიერმა გასცა პასუხი; იგი კვაჭანტირაძეს მიუბრუნდა და უთხრა: ჟურნალისტების გარეშე ქვეყანა არ აშენდება. შენც კარგად გააცნობიერე ეს და დანარჩენმა დეპუტატებმაც! (იხ.ვიდეო ჩანაწერი)
როგორც ჩანს, დეპუტატს პრემიერის შენიშვნა დაავიწყდა, როცა 14 ივლისს, ჟურნალისტის საკუთარი ხელით დახრჩობა “დააანონსა“, (იხ.აუდიო ჩანაწერი) ფეისბუქის ღია გვერდზე კი, რბილად რომ ვთქვათ, არაპროფესიონალიზმში “გვამხილა“, ოზურგეთის გამგებლის ნათესავობა კი ბრალდებად წამომიყენა.
პოლიტიკოსების, საჯარო მოხელეების მხრიდან უსაფუძვლო შეურაცხყოფა არ გვაკვირვებს, მაგრამ იმ ადამიანის მხრიდან, რომელიც რამდენიმე თვის წინ, მედიის თავისუფლებაზე ბევრს საუბრობდა, ასეთი საქციელი და გამონათქვამები, სხვა თუ არაფერი, სირცხვილია….
სამწუხაროა, რომ ასე იყო შევარდნაძის, ნაციონალების დროს და ასეა ახლაც… სამაგიეროდ, ჟურნალისტებისგან განსხვავებით, თავს მშვენივრად გრძნობენ ხელისუფლებასთან კოჰაბიტაცია-სიამტკბილობაში მყოფი ის პირები, რომლებიც განსხვავებული შეხედულების გამო, თანამოქალაქეებს, ჟურნალისტებს სულ ცოტა ხნის წინ სცემდნენ, იჭერდნენ, აგინებდნენ, შანტაჟს უწყობდნენ…
მერე რა, რომ მათ მიმართ ბევრი შეკითხვა, ხშირად მათ მიერ ჩადენილი კონკრეტული დანაშაულის აშკარა ფაქტები არსებობს?!
მერე რა, რომ ამას ვწერთ, საზოგადოება კითხულობს და პროკურატურა დუმს; მერე რა, რომ დღეს პოლიციის მაღალჩინოსნებად ის ადამიანები მუშაობენ, რომლებიც სულ ცოტა ხნის წინ, პოლიტიკური პოლიციის ავანგარდში იდგნენ და ხელს ყველაფერზე აწერდნენ!
როგორც ჩანს, ეს მართლაც არაფერია იმათთვის, რომლებმაც 1 ოქტომბერს თანამდებობები ერთი მუჭა შეურიგებელი მოქალაქეების თავდაუზოგავი ბრძოლით და ამომრჩეველთა თავგანწირვით მიიღეს!
მთავარია, მათი ინტერესები დაკმაყოფილდა _ აქვთ მაღალი ხელფასები, გავლენა და როცა მოესურვებათ, რაც მოესურვებათ, იმას იტყვიან!.
საზოგადოებას, უკაცრავად ამ სიტყვისთვის, “ფეხებზე დაიკიდებენ“ და ოზურგეთის დეპუტატ-გამგებლის მსგავსად, შიდა დაპირისპირებით დაკავდებიან. პირველი ამ საკითხს ფეისბუქის პოსტებით არჩევს, მეორე კი, ან კომენტარს არ აკეთებს ან მხრებს იჩეჩავს _ სულ არ მაინტერესებს, ვინ რას ამბობსო…
ამასობაში კი, სტიქიით დაზარალებული მოსახლეობა დახმარებას ელოდება, უმუშევარი ადამიანები – დასაქმებას, დაპირებული საწარმოების გახსნას, სოციალურად დაუცველი ოჯახები – საზრდოს შვილებისთვის…
“გურიაში იმფერი გაჭირვებაა, ბანკომატში “კარტა“ რომ შევდე, დამიწერა, ფული მასესხეო“, _ ეს ანეკდოტი სულ ცოტა ხნის წინ გავრცელდა გურიაში. სამწუხაროდ, ამ ანეკდოტს რეალური საფუძველი აქვს – გურიაში სიდუხჭირეა.
და ბოლოს; თქვენ წარმოიდგინეთ, ჩვენ, ჟურნალისტებსაც გვყავს ნათესავები, მაგრამ ჩვენს საქმიანობაში ფაქტები, მოვლენებია მთავარი და ძალიან ხშირად, ნათესავების გაკრიტიკებაც, მხილებაც გვიხდება. ნათესავური კავშირები ჩვენს საქმიანობაზე არასდროს ახდენს გავლენას ბევრი პოლიტიკოსისგან განსხვავებით – ნათესავობა “საჭიროების“ მიხედვით რომ ესმის! ამიტომ, უფრო მნიშვნელოვანია, დეპუტატმაც და გამგებელმაც იმ დაპირებების შესრულებას მიხედოთ, ოზურგეთელებს წინასაარჩევნოდ უხვად რომ დაურიგეთ!
ჟურნალისტების ლანძღვას, დადანაშაულებას და თუნდაც “დახრჩობას“, მერეც მოასწრებთ! ჯერ საქმეა გასაკეთებელი, საქმე!
