აღსანიშნავია, რომ თამაშში მონაწილეობა მხოლოდ რამდენიმე ლანჩხუთელმა მიიღო, რამაც ლანჩხუთში დიდი აჟიოტაჟი გამოიწვია.
თამაშზე მოწვეული იყო სპორტისა და ახალგაზრდობის მინისტრი ლევან ყიფიანი, მაგრამ არავინ არ ყოფილა საქართველოს ფეხბურთის ფედერაციიდან.
საქართველოს ფეხბურთის ფედერაციის პრეზიდენტი ზვიად სიჭინავა აცხადებს, რომ ის თამაშზე არ მიუწვევიათ, ხოლო ლანჩხუთის მუნიციპალიტეტის გამგებლის მოვალეობის შემსრულებლის ზაზა ურუშაძის თქმით, რომელიც ღონისძიების ინიციატორი იყო, მან საჭიროდ არ ჩათვალა ფეხბურთის ფედერაციის პრეზიდენტის დაპატიჟება, იმ მიზეზით, რომ მასთან ურთიერთობა არასდროს ჰქონია.
“გურია ნიუსთან” საუბარში გურიის ფეხბურთის ფედერაციის ხელმძღვანელი კახა ებრალიძე ამბობს, რომ მას შესთავაზეს თამაში, თუმცა, უარი განაცხადა:
_ მე შემომთავაზეს, მაგრამ უარი ვთქვი. ორი კვირის წინ გუნდიდან გაგვიშვეს მთელი შემადგენლობა და ახლა როგორ მივიღებდი მონაწილეობას? არც ბანკეტზე დამპატიჟეს, მე კი არა, მთლიანად საქართველოს ფეხბურთის ფედერაცია, _ გვითხრა ებრალიძემ
ამ ინფორმაციის შემდეგ “გურია ნიუსი” საქართველოს ფეხბურთის ფედერაციის პრეზიდენტს ზვიად სიჭინავას დაუკავშირდა:
_ არა, არ ვიცი, არ ვყოფილვარ საქმის კურსში, არავის ჩემთვის არაფერი უთქვამს, არავის არ დავუპატიჟებივართ.
_ ბატონო ზვიად, როგორ ფიქრობთ, რატომ არ ჩათვალეს საჭიროდ თქვენი დაპატიჟება?
_ ალბათ, იფიქრეს, რომ არ ვიყავი საქართველოში. აბა, სხვა რა უნდა ვიფიქრო, მეც არ ვიცი. ვინ იყო ისე დაპატიჟებული და მიწვეული?
_ ჩვენ მხოლოდ ლევან ყიფიანი ვნახეთ.
_ ეს ღონისძიება თუ გურიის ფეხბურთის ფედერაციის ეგიდით გაკეთდა, მე ორშაბათს დავიბარებ კახა ებრალიძეს და მაგას “მოხვდება”. არა, მე მართლა საქმის კურსში არ ვყოფილვარ, სამწუხაროდ, მაგრამ თუ მინისტრი იყო, ეს დიდი რანგის შეჯიბრება ყოფილა და ცუდია, რომ არ ვიყავით. მაგრამ მომავალში, გამოვასწორებთ ჩვენც და გურიაც.
_როგორ შეაფასებდით ამ ფაქტს?
_ რა ვიცი აბა, ძალიან კარგია უკრაინელი ვეტერანები თუ ჩამოვიდნენ და ჩვენმა ვეტერანებმა ეთამაშეს მათ. ამას რა შეფასება უნდა? ძალიან კარგია, ეს არის ფეხბურთის პოპულარიზაცია. ალბათ, გულშემატკივრებმა იხილეს ვარსკვლავები და მიიღეს დიდი სიამოვნება. მე არ ვიყავი და ვერ შევაფასებ. მოდით, რა, ცუდზე არ მინდა ვიფიქრო, ჩავთვალოთ, რომ ალბათ, გამორჩათ, რომ ფეხბურთის ფედერაცია არსებობს საქართველოში, მეტი არაფერი…
ლანჩხუთის მუნიციპალიტეტის გამგებლის მოვალეობის შემსრულებელმა ზაზა ურუშაძემ გვითხრა, რომ სიჭინავასთან ურთიერთობა არასდროს ჰქონია:
_ ბატონო, ზაზა, რატომ არ დაპატიჟეთ ზვიად სიჭინავა?
_რა ვიცი, აბა? მე მასთან არასდროს არ მქონია რაიმე სახის ურთიერთობა. მე ჩავთვალე საჭიროდ, რომ დამეპატიჟებინა სპორტის მინისტრი, _ გვითხრა ურუშაძემ.
