აღსანიშნავია, რომ ძველი ავტომანქანების რეალიზაციის მიზნით აუქციონი არც ერთ შემთხვევაში არ გამართულა, ჩანაცვლების შესახებ გაფორმებული ხელშეკრულებების უმეტესობა კი სამინისტროსათვის წამგებიანი იყო. ექსპლუატიაციიდან 7-8 თვის თავზე ახალ მანქანებს ძირითადად მინისტრის მოადგილეებისთვის ყიდულობდნენ. ამ მხრივ ყველაზე მონდომებულები გია ლორთქიფანიძე და შალვა ჯანაშვილი იყვნენ.
რამდენიმე დღის წინ სახელმწიფო აუდიტის სამსახურმა შს სამინისტროს ფინანსური და შესაბამისობის აუდიტის ანგარიში გამოაქვეყნა, რომელიც 2011 წლის 1 იანვრიდან 2012 წლის 30 სექტემბრამდე პერიოდს მოიცავს. დასკვნაში ნათქვამია, რომ ძველი მანქანების შეფასება ზერელედ და უხარისხოდ ხდებოდა:
“ჩანაცვლებას ძველ და ამორტიზებულ ა/მ-ებთან ერთად დაექვემდებარა ახალი, კარგ მდგომარეობაში მყოფი და ძვირადღირებული ა/მ-ები, რომელთა ნარჩენი საბალანსო ღირებულება, მათი ექსპლუატაციის მცირე ვადის გამო ჯერ კიდევ მაღალი იყო. სხვა შემთხვევაში კი ჩასანაცვლებელი ავტომანქანებს აუდიტორი არარეალურად დაბალ ფასად აფასებდა. ე.წ “ავტომობილის შეფასების აქტი” შედგენილია უყურადღებოდ, უხარისხოდ და არადამაჯერებლად. თითქმის არც ერთ შემთხვევაში არ არის დაკონკრეტებული ა/მ-ის დაზიანების ხარისხი და მისი გავლენა საერთო მდგომარეობაზე.”
შს მინისტრის 2011 წლის 23 აგვისტოს ბრძანებით სამმართველოს დაევალა შპს “ქარ რენთ ენდ თრეიდ-ინ ქომფანისთან” მოეხდინა ადრე შესყიდული 4 ავტომანქანის სხვა 4 ა/მ-ით ჩანაცვლება. რაზედაც იმავე დღეს გაფორმდა ხელშეკრულება. ჩასანაცვლებელი 4 ა/მ-იდან, ერთი იყო 2007 წელს გამოშვებული “SKODA OQTAVIA”, რომელიც აუდიტორის მიერ შეფასდა მხოლოდ 2.5 ათას აშშ დოლარად, მაშინ როდესაც ამავე აქტის მიხედვით, მისი გარეგნული მდგომარეობა, სავალი ნაწილი და ძრავი დამაკმაყოფილებელი იყო, სალონიც კარგ მდგომარეობაში იმყოფებოდა. აღნიშნული მანქანა “ქარ რენთ ენდ თრეიდ-ინ ქომფანიმ ” 6,587.6 ლარად, ანუ 60%-იანი (2,470.35 ლარი) სარგებლით გაყიდა. ამავე ხელშეკრულებით ჩანაცვლებულია ერთი 2008 წელს გამოშვებული “ტოიოტა ლექსუსი 570”, რომელიც აუდიტორის მიერ შეფასებულია 63.0 ათას აშშ დოლარად, მიმწოდებლისათვის კი 62.2 ათას აშშ დოლარადაა გადაცემული, ანუ 800 აშშ დოლარით ნაკლებად. სანაცვლოდ მიღებულია ამავე მარკის ა/მ, მხოლოდ 2011 წლის მოდელი, რომლის ღირებულებაც შეადგენდა 99.0 ათას აშშ დოლარს. ანუ, სამინისტრომ დამატებით 36.8 ათასი აშშ დოლარი (60.6 ათასი ლარი) გადაიხადა იმისათვის, რომ 2 წლის განმავლობაში ექსპლუატაციაში არსებული მანქანა ახლით შეეცვალა. აღნიშნული ავტომანქანები (ძველიც და ახალიც) ვანო მერაბიშვილის მოადგილეს გ. ლორთქიფანიძე ემსახურებოდა.
მინისტრის 2011 წლის 27 სექტემბრის ბრძანებით სამმართველოს დაევალა იმავე შპს “ქარ რენთ ენდ თრეიდ-ინ ქომფანისთან” განეხორციელებინა ადრე შესყიდული სამი ავტომანქანის ერთი სხვა ა/მ-ით ჩანაცვლება, რაზედაც იმავე დღეს გაფორმდა ხელშეკრულება. ჩასანაცვლებელი სამი ა/მ- იდან, ერთი იყო 2010 წელს გამოშვებული “რეინჯ როვერი” , მეორე 2007 წელს გამოშვებული “მერსედეს S500 , მესამე კი 2005 წელს გამოშვებული “მერსედეს CLS 501”, რომელიც აუდიტორის მიერ 50.0 ათას, 36.0 ათას და 20.0 ათას აშშ დოლარად იყო შეფასებული. აღნიშნული ხელშეკრულებით, მაღალი კლასის კარგ მდგომარეობაში მყოფი (ექსპერტის შეფასებით) 3 ერთეული ა/მ-ის ნაცვლად მიღებულია ძალიან ძვირადღირებული, კერძოდ 127.8 ათასი აშშ დოლარის ღირებულების “მერსედეს S500-” , რისთვისაც შსს-მ სხვაობა – 36.4 ათასი ლარი (21.8 ათასი აშშ დოლარი) გადაიხადა. აღსანიშნავია, რომ მერსედესის მარკის სამივე ზემოხსენებული ა/მ (ძველებიც და ახალიც) მინისტრის მოადგილეს გ.ლორთქიფანიძეს ემსახურებოდა.
მინისტრის 2011 წლის 20 ივნისის ბრძანებით სამმართველოს დაევალა იმავე შპს “ქარ რენთ ენდ თრეიდ-ინ ქომფანისთან” განეხორციელებინა ადრე შესყიდული ორი ა/მ-ის “რენჯ როვერ სპორტ TDV 6”-ის მარკის ა/მ-ით ჩანაცვლება, რომლის ღირებულებაც შეადგენდა 63.0 ათას აშშ დოლარს. ჩასანაცვლებელი ორი ა/მ-იდან, ერთი იყო 16 ათას დოლარად შეფასებული 2006 წელს გამოშვებული კარგ მდგომარეობაში მყოფი “JEEP HUMMER H3” , მეორე კი 2010 წელს გამოშვებული, ასევე კარგ მდგომარეობაში მყოფი, 44.0 ათას აშშ დოლარად შეფასებული “TOYOTA PRADO”. ჩანაცვლება განხორციელდა 22 ივნისს და მომწოდებელს ფასთა შორის სხვაობის სახით გადაერიცხა 5.0 ათასი ლარი, ახალი “რენჯ როვერ სპორტ TDV 6 პერსონალური მომსახურებისათვის მინისტრის მოადგილეს გ.ლორთქიფანიძეს გადაეცა.
წარმოდგენილი დოკუმენტების მიხედვით ჩანაცვლებული “TOYOTA PRADO” შესყიდულია 2010 წლის ნოემბერში 100.2 ათას ლარად და ემსახურებოდა გ. ლორთქიფანიძეს. რატომ გახდა აუცილებელი 100.2 ათას ლარად შესყიდული მანქანის ჩანაცვლება ექსპლუატაციაში გადაცემიდან 7 თვეში 27,960.8 ლარის (28%) ფასდაკლებით, შს სამინისტროს ამ კითხვაზე პასუხის გაცემა არც უცდია.
რამდენიმე თვეში ლორთქიფანიძემ “რენჯ როვერ სპორტ TDV 6”-იც გამოიცვალა. მანქანა ჩანაცვლების გზით გადაცემულია იმავე შპს “ქარ რენთ ენდ თრეიდ-ინ ქომფანისათვის” გაცილებით ნაკლებ, კერძოდ კი 47.0 ათას აშშ დოლარად , ამ ფასს სამინისტრომ 86.3 ათასი ლარი დაუმატა და ლორთქიფანიძეს ახლა უკვე 100 ათას აშშ დოლარად ღირებული “ბმვ – M5” შეუძინა.
ძვირად ღირებული ავტომანქანების ხშირი ცვლით მერაბიშვილის კიდევ ერთი მოადგილე შალვა ჯანაშვილი გამოირჩეოდა.
მინისტრის 2011 წლის 20 აპრილის ბრძანებით სამმართველოს დაევალა იმავე შპს “ქარ რენთ ენდ თრეიდ-ინ ქომფანისთან” განეხორციელებინა ადრე შესყიდული, 2008 წელს გამოშვებული “ტოიოტა ქამრის” ჩანაცვლება (აუდიტორის მიერ შეფასებულია – 16.0 ათას აშშ დოლარად) “მერსედეს E350”-ით, რომლის ღირებულებაც შეადგენდა 77.5 ათას აშშ დოლარს. მომწოდებელს ფასთა შორის სხვაობის სახით გადაერიცხა 61.5 ათასი აშშ დოლარის ექვივალენტი – 100.8 ათასი ლარი . მოწოდებული ა/მ გამოშვებული იყო 2010 წელს, რაც პერსონალური მომსახურებისათვის გადაეცა მინისტრის მოადგილე შ. ჯანაშვილს.
2011 წლის 26 ოქტომბერს მინისტრის ბრძანებით სამმართველოს დაევალა კვლავ შპს “ქარ რენთ ენდ თრეიდ-ინ ქომფანისთან” ახლა უკვე ექვსი თვის წინ 77.5 ათას აშშ დოლარად შეძენილი “მერსედეს E350”-ის 62,5 ათას დოლარად ღირებული “LEXUS GS350 E350”-ით ჩანაცვლება. ჩასანაცვლებელი “მერსედეს E350”-ის შეფასების აქტში აუდიტორის მიერ დაფიქსირებულია, რომ მისი საერთო მდგომარეობა კარგია, გამოშვებულია 2010 წელს და მისი ექსპლუატაციის ვადაა ერთი წელი, მაშინ როდესაც რეალურად იგი მხოლოდ 6 თვის მანძილზე იმყოფებოდა ექსპლუატაციაში. ავტომანქანა შეფასდა მხოლოდ 50.0 ათას აშშ დოლარად და ჩანაცვლების შემდეგ მომწოდებელს ფასთა შორის სხვაობის სახით გადაერიცხა 12.5 ათასი აშშ დოლარი. ავტომანქანა პერსონალური მომსახურებისათვის ისევ მინისტრის მოადგილეს შ. ჯანაშვილს გადაეცა.
2011 წლის პირველ კვარტალში შს სამინისტრომ შპს “კრესავტოჰაუსისაგან” მიიღო “შკოდა ოქტავიას” მარკის 10 ავტომანქანა, საერთო ღირებულებით 352.4 ათასი ლარი, მაშინ როდესაც სამინისტროსაგან მას სანაცვლოდ გადაცემული ჰქონდა სხვადასხვა მარკის 150 ა/მანქანა, რომლებიც აუდიტორის მიერ ასევე 352.4 ათას ლარად, ანუ ზუსტად მოსაწოდებელი 10 ავტომანქანის ფასად არის შეფასებული. შედეგად, სამინისტრომ მის ბალანსზე რიცხული 150 ავტომაქანა საბალანსო ღირებულებასთან შედარებით 443.9 ათასი ლარით ნაკლებ ფასად გადასცა კერძო საწარმოს.
სულ 2011-2012 წლებში განხორციელებული მსგავსი ოპერაციების შედეგად სამინისტრომ მის ბალანსზე რიცხული 817 ძვირადღირებული ავტომანქანა , რომელთა ნარჩენი საბალანსო ღირებულება ჯამში – 5,520.6 ათასი ლარი იყო, მხოლოდ 2,598.5 ათას ლარად გადასცა ჩამნაცვლებელ კერძო საწარმოებს. შედეგად, ამ საწარმოებიდან მიღებულ იქნა მხოლოდ 68 ა/მ, საერთო ღირებულებით 3,212.2 ათასი ლარი, რისთვისაც სამინისტროს დამატებით 776.4 ათასი ლარის გადახდა მოუხდა.
“საქართველოს შინაგან საქმეთა სამინისტროს სისტემაში ადრე შესყიდული ავტოსატრანსპორტო საშუალების ახალი, იმავე ან გაუმჯობესებული პარამეტრების მქონე ავტოსატრანსპორტო საშუალებით ჩანაცვლების განხორციელების ორგანიზების შესახებ” მინისტრის 2010 წლის 16 თებერვლის №176 ბრძანებით შექმნილი იყო კომისია, რომელსაც ევალებოდა განეხილა და გადაეწყვიტა საბალანსო ერთეულების მიერ ადრე შესყიდული ა/მ-ების ახალი, იმავე ან გაუმჯობესებული პარამეტრების მქონე ა/მ-ებით ჩანაცვლების მიზანშეწონილობა. აღნიშნული კომისიის მიერ შედგენილ არც ერთ ოქმში არ არის დაფიქსირებული, თუ რა მიზეზის გამო გახდა აუცილებელი ჩანაცვლების განხორციელება. ხშირ შემთხვევაში სამინისტროდან შესამჩნევად დაბალ ფასშია გასული მაღალი კლასის, ძვირადღირებული, საკმაოდ ახალი (1-2-3 წლის), კარ მდგომარეობაში მყოფი ა/მ-ები.
შპს “ქარ რენთ ენდ თრეიდ-ინ ქომფანიმ” მხოლოდ ზემოხსენებული “მერსედეს S500-ის” და “მერსედეს CLS 501” მარკის ა/მ-ების რეალიზაციით 22.9 ათასი ლარის (38.1% ფასნამატი) და 11.5 ათასი ლარის მოგება მიიღო (34.4% ფასნამატი). სულ აღნიშნულმა საწარმომ შს სამინისტროსგან შესყიდული 21 ა/მ-იდან, 16 ერთეული ა/მ-ის რეალიზაციით მიიღო 102.2 ათასი ლარის მოგება, რაც ეჭვის ქვეშ აყენებს აღნიშნული ავტომანქანების შეფასების სისწორეს.
მინისტრის 2011 წლის 16 დეკემბრის ბრძანებით სპეციალურ ოპერატიულ დეპარტამენტს დაევალა მათ სარგებლობაში არსებული 4 ერთეული სხვადასხვა მარკის ა/მ-ის (ღირებულება – 110.2 ათასი ლარი), შპს “იბერია ავტოსთან” 2 ერთეული “VOLKSVAGEN TOUAREG”-ის მარკის ა/მ-ით (ღირებულება – 214.5 ათასი ლარი) ჩანაცვლება. ჩასანაცვლებელ ა/მ-ებს შორის იყო 2008 წელს გამოშვებული “MITSUBUSHI PAJERO” და 2010 წელს გამოშვებული “TOYOTA PRADO”.
აღნიშნული ა/მ-ები შეფასებულია აუდიტორული ფირმა შპს “აუდიტი, კონსალტინგი და კომპანიას” მიერ შესაბამისად 33.0 ათას და 58.0 ათას ლარად. შეფასების აუდიტორულ დასკვნაში ჩანაცვლების აუცილებლობა მითითებული არ არის., მით უმეტეს, რომ 2012 წლის ივლისში სამინისტრომ 45.1 ათას ლარად შეიძინა 2007 წელს გამოშვებული “TOYOTA PRADO”.
მინისტრის 2011 წლის 23 აგვისტოს ბრძანებით სასაზღვრო პოლიციას დაევალა შპს “ქარ რენთ ენდ თრეიდ-ინ ქომფანისთან” განეხორციელებინა 45.0 ათას აშშ დოლარად შეფასებული, კარგ მდგომარეობაში მყოფი, 2009 წელს გამოშვებული “ტოიოტა ლენდკრუიზერ 200”-ის ანალოგიური, მაგრამ ახალი ა/მ-ით ჩანაცვლება.
ახალი ა/მ-ის ღირებულება შეადგენდა 77.7 ათას აშშ დოლარს, რის გამოც სასაზღვრო პოლიციას ფასთა სხვაობის სახით 32.7 ათასი აშშ დოლარი უნდა გადაეხადა მიმწოდებლისათვის. ამრიგად, სამინისტრომ 2 წლის კარგ მდგომარეობაში მყოფი ა/მ-ის ახლით ჩასანაცვლებლად დამატებით 32.7 ათასი აშშ დოლარი (53.9 ათასი ლარი) გადაიხადა.
მინისტრის 2011 წლის 27 სექტემბრის ბრძანებით სამმართველოს დაევალა შპს “კრესავტოჰაუსთან” განეხორციელებინა ადრე შესყიდული 49 ავტომანქანის -ის (შეფასებული 101.2 ათას ლარად), 3 ახალი “შკოდა ოქტავიას” მარკის ა/მ-ით (ზუსტად იმავე ღირებულებით) ჩანაცვლება. ჩასანაცვლებელი 49 ა/მ-იდან, ერთი იყო 2005 წელს გამოშვებული “ლენდ როვერ სანტანა” , რომელიც აუდიტორის მიერ შეფასებული იყო მხოლოდ 5.8 ათას ლარად. უფრო მეტიც, მინისტრის 2012 წლის 30 ივნისის ბრძანებით სამმართველოს დაევალა შპს “იბერია ავტო მარკეტთან” განეხორციელებინა ადრე შესყიდული 49 ა/მ-ის (შეფასებული 97.4 ათას
ლარად), 3 ერთეული ახალი “შკოდა ოქტავიას” მარკის ა/მ-ით (ზუსტად იმავე ღირებულებით) ჩანაცვლება. ჩასანაცვლებელი ა/მ-ებიდან ერთი იყო ასევე 2005 წელს გამოშვებული “ლენდ როვერ სანტანას” მარკის , რომელიც აუდიტორის მიერ შეფასებული იყო მხოლოდ 3.7 ათას ლარად.
შს სამინისტროში ირაკლი ღარიბაშვილის მისვლის შემდეგ ავტოპარკის განახლება გადაწყდა. მერაბიშვილის დროს შეძენილი ძვირადღირებული ავტომანქანები აუქციონზე გასაყიდად გაიტანეს, თუმცა რა ბედი ეწია მათ უცნობია. გამინისტრებიდან 9 თვის თავზე ახალმა მინისტრმა ავტომანქანებში უკვე 16 793 270 ლარი დახარჯვა მოასწრო.
