საკრებულოს თავმჯდომარე ამირან გიგინეიშვილმა დამსწრეთ დღის წესრიგი გააცნო.
“სკოლამდელი საგანმანათლებლო სააღმზრდელო ცენტრის” მუშაობის შესახებ სოციალურ საკითხთა კომისიის თავმჯდომარემ, გოჩა ჯანაშიამ ისაუბრა. შემუშავდა სტრატეგიული გეგმა, რომელიც განსაზღვრავს შემდეგი მიზნების მიღწევას: პოლიტიკის, სტრატეგიების და პროგრამული მოდელების შემუშავებას სკოლამდელი განათლების ხარისხის გაუმჯობესებისა და ეფექტურობის მისაღწევად: _ გეგმა ითვალისწინებს, ხელი შევუწყოთ ისეთ სასწავლო-სააღმზრდელო პროცესს, რომელიც ბავშვს მრავალმხრივად განავითარებს, განვსაზღვროთ პრიორიტეტები იმისათვის, რომ აღვზარდოთ ფიზიკურად ჯანმრთელი, გონებრივად სრულყოფილი, ემოციურად განვითარებული და სოციალურად ადაპტირებული მომავალი თაობა, _ თქვა ჯანაშიამ.
სახანძრო-სამაშველო სამსახურის დებულების შესახებ იურიდიული სამსახურის უფროსმა შოთა ჩაგუნავამ ისაუბრა. მისი თქმით, სამსახურის დებულება შესაბამისობაში მოვიდა საგანგებო სიტუაციების მართვის დეპარტამენტის რეკომენდაციასთან, ასევე ცვლის უფროსს უფროსი სპეციალისტის სტატუსი მიენიჭება.
სოციალური სამსახურის უფროსის მოვალეობის შემსრულებელმა მარინა კეიდიამ, რომელიც სულ ცოტა ხნის წინ დაინიშნა ამ თანამდებობაზე თამარ ასკურავას ნაცვლად, საქართველოს მთავრობის “2013 წლის 1 ივლისიდან საყოველთაო ჯანმრთელობის დაცვის სახელმწიფო პროგრამის” შესახებ ისაუბრა, რომლის მიხედვითაც გადაუდებელი სტაციონარული მომსახურება ანაზღაურდება 100%-ით; ინტენსიური თერაპია და კრიტიკული მდგომარეობის მართვა _ 70%-ით; გეგმიური ქირურგიული ოპერაციები და მათთან დაკავშირებული ყველა გამოკვლევები _ 70%-ით; სრულად ანაზღაურდება 18 წლამდე ასაკის მოსარგებლეებისათვის კარდიოქირურგიული და ონკოლოგიური გამოკვლევები; ონკოლოგია-ქიმიოთერაპია, ჰორმონოთერაპია და სხივური თერაპია 18 წლამდე ასაკის ბავშვებისათვის ანაზღაურდება 100%-ით, სხვა შემთხვევებში _ 80%- ით; მშობიარობასა და ფიზიოლოგიური მშობიარობაზე ლიმიტი 500 ლარია, ხოლო საკეისრო კვეთაზე _800 ლარი.
“ლანჩხუთის მუნიციპალიტეტის 2013 წლის სოციალური პროგრამების დამტკიცების შესახებ” ლანჩხუთის მუნიციპალიტეტის საკრებულოს 2013 წლის 29 იანვრის #2 განკარგულებით დამტკიცებულია 18 წლიდან საპენსიო ასაკის არმქონე მოსახლეობის ოპერაციების თანადაფინანსების პროგრამა, მშობიარობის თანადაფინანსების პროგრამა და შეჭირვებულ ოჯახში მცხოვრებ 6-დან 18 წლამდე ასაკის ბავშვების ოპერაციების თანადაფინანსების პროგრამა: _ ყოველივე აღნიშნულიდან გამომდინარე, ვინაიდან მუნიციპალიტეტის მიერ დამტკიცებული პროგრამების გახორციელება განეკუთვნება ხელისუფლების სხვა ორგანოს უფლებამოსილებას, მიზანშეწონილია მოხდეს აღნიშნული პროგრამების გაუქმება, _ თქვა კეიდიამ.
სხდომაზე მოწვეული იყო ” ენერგო-პროჯორჯიას” ლანჩხუთის მომსახურების ცენტრის მენეჯერი მამუკა გაჩეჩილაძე. როგორც გაირკვა, გრიგოლეთსა და აკეთში ელექტროენერგიის ხშირი გათიშვის შესახებ მენეჯერი ინფორმირებულია. როგორც მან განმარტა, არსებობს ობიექტური მიზეზები, რომლებიც მოსაგვარებელია. რაც შეეხება ღრმაღელეს, იქ გამრიცხველიანება უახლოეს დღეებში დაიწყება.
