_ ერთი კვირაა ველოდები პასუხს ოზურგეთის მუნიციპალიტეტის გამგეობიდან, 19 აგვისტოს ბახმაროში მინდა ახალი რეკორდის დამყარება. არ ვიცი დამაფინანსებენ თუ არა, ადრე ეს პრობლემა არ იყო. გამგებელს გურიის ვიცე-გუბერნატორი, ლელა თავართქილაძე ესაუბრა და ვნახოთ, როგორ გადაწყდება ეს საქმე. ოზურგეთის მუნიციპალიტეტის საკრებულოს დეპუტატი, ირინა საჯაია და ოზურგეთის მუნიციპალიტეტის გამგეობის კულტურის სამსახურის უფროსი, მაია თანდილაშვილი ასევე საქმის კურსში არიან.
გადაწყვეტილი მაქვს, ბახმაროში ცენტრალურ ელექტრო გადამცემ ბოძზე ასვლა, 15 საფეხურზე მეტზე უნდა ავიდე და ჩამოვიდე, ამავე დღეს ვაპირებ წუთში სისწრაფის რეკორდის მოხსნას, ფეხით ბურთი წუთში 200-ჯერ უნდა ავკინძლო. _ ამბობს „გურია ნიუსთან“ საუბრის დროს, გოდერძი მახარაძე.
მისივე განცხადებით, ახალი რეკორდის დასამყარებლად მას 2500 ლარი სჭირდება.
_ ჩვენს მიერ მოპოვებული ინფორმაციით, თქვენ ცოტა ხნის წინ იმყოფებოდით თურქეთში და იქ შემოგთავაზეს, რომ მათი სახელით გამოხვიდეთ.
_ იყო მცდელობა, მაგრამ სტამბულში არ დავრჩენილვარ. ორდღიანი შეხვედრა მომიწყვეს და წამოვედი უკან. მოქალაქეობის და სხვა შემოთავაზებებზე მე არ ვთანხმდები.
_ ანუ იყო შემოთავაზება მოქალაქეობის მიღებაზე?
_ კი, იყო არა მარტო თურქეთიდან, მსოფლიოს სხვა ქვეყნებიდანაც. მე მინდა, რომ საქართველოს სახელით გამოვიდე ყველგან და ვასახელო ჩემი ქვეყანა.
ოზურგეთის მუნიციპალიტეტის გამგეობის პრესამსახურის უფროსის, ნინო სალუქვაძის თქმით, 19 ივლისს გოდერძი მახარაძემ მუნიციპალიტეტის გამგეობაში შემოიტანა წერილი, სადაც ითხოვს დაფინანსებას, რათა ბახმაროში 19 აგვისტოს კიდევ ერთი რეკორდი დაამყაროს. ამ ეტაპზე მისი წერილი განხილვის პროცესშია.
