მის გარემოცვაში კი, მისივე დროის შინაგან საქმეთა სამინისტროს სტრუქტურებში მაღალ თანამდებობებზე ნამუშევარი მეგობრები იქნებიან.
როგორც “გურია ნიუსისთვის“ ხდება ცნობილი, ზურაბ ჩხაიძე შსს მინისტრის ირაკლი ღარიბაშვილის სიმამრის თამაზ თამაზაშვილის ახლო მეგობარია.
სუს-ს გურიის სამსახურის უფროსად დანიშვნის შესახებ, კარგა ხანია, საუბრობენ ირაკლი თავდიშვილის კანდიდატურაზეც. წყაროს თქმით, მან სწორედ ჩხაიძესთან დაპირისპირებაზე თქვა უარი, რის გამოც მისი დანიშვნა აღნიშნულ თანამდებობაზე შეჩერებულია.
ზურაბ ჩხაიძე “გურია ნიუსთან“ აღნიშნავს, რომ ოზურგეთში, ნინო ბურჯანაძის შტაბის ჩამოყალიბებაზე აქტიური საუბრები მიდის:
_ ჯერჯერობით, ოფიციალურად ვერ დაგიდასტურებთ, ვუხელმძღვანელებ თუ არა შტაბს. საუბარი რომ არის ამ საკითხზე, ამაზე ორი აზრი არ არსებობს. ჯერ არ ვარ დარწმუნებული იმაში, თუ ვინ იქნება ჩემს გარემოცვაში. ვიყავი ოზურგეთში, არის საქმიანი საუბრები, შეხვედრები, რაღაც ურთიერთობების ჩამოყალიბება, _ ამბობს ზურაბ ჩხაიძე.
_ ბატონო ზურაბ, თქვენსა და თამაზ თამაზაშვილის ახლო ურთიერთობებზე საუბრობენ. ამბობენ, რომ თქვენ მისი მეჯვარე ბრძანდებით.
_ ასეც რომ იყოს, ამაში მე ცუდს ვერაფერს ვხედავ. ურთიერთობა გვქონდა და ძალიან ახლო. თანამშრომელი იყო ჩვენი და მეც ვხელმძღვანელობდი ერთ-ერთი სამინისტროს. თამაზი მაშინ პოლიციის უფროსი იყო დედოფლისწყაროში, მერე კახეთში სამხარეო პოლიციას ხელმძღვანელობდა. მერე იყო საგზაო პოლიციის უფროსის მოადგილე. ახლო ურთიერთობას ვერ დავარქმევდი, რა დამოკიდებულებაც ჩვენს შორის იყო, ყოველ შემთხვევაში, რამდენიმე შეხვედრა გვქონდა, რა თქმა უნდა. ის გათავისუფლდა იმ საშინელი ადგილიდან…
_ ბატონო ზურაბ, თქვენთან აკავშირებენ, სუს-ის გურიის სამმართველოს უფროსობის შესაძლო კანდიდატს _ ირაკლი თავდიშვილს, ჩვენი ინფორმაციით, ის ამ თანამდებობაზე იმიტომ არ დანიშნეს, რომ საარჩევნოდ თქვენთან დაპირისპირებაზე უარი განაცხადა.
_ პირველად მესმის ეგ ამბავი, მაგრამ ისე კაცურად მოქცეულა, თუ მასე იყო, _ გვითხრა ჩხაიძემ და გვითხრა, რომ როცა გურიაში ჩამოვალ, ყველაფერზე დაუფარავად გესაუბრებით, აქ დასამალი არაფერიაო.
