“ხარჯვასთან დაკავშირებით მიმდინარეობს წინასაგამოძიებო მოკვლევა”

არ არსებობს სტიქიით მიყენებული ზიანის დამთვლელი კომისიის დასკვნა ზარალის ოდენობის შესახებ,” _ აღნიშნულია განცხადებაში, რომლითაც კოალიცია “ქართული ოცნების” წარმომადგენლებმა საქართველოს მთავარ პროკურორს არჩილ კბილაშვილს, პარლამენტის თავმჯდომარეს დავით უსუფაშვილს, შინაგან საქმეთა მინისტრს ირაკლი ღარიბაშვილს, მიმართეს.

ამ საქმესთან დაკავშირებით, ოზურგეთის რაიონულმა პროკურატურამ მოკვლევა დაიწყო, მაჟორიტარმა დეპუტატმა კი ჟურნალისტებს ერთ-ერთ ინტერვიუში ამ საქმეზე ყურადღებისკენ მოგვიწოდა: “როგორ მიმდინარეობს გამოძიების პროცესი, ამაზე მე მოგიწოდებთ, რომ თქვენ მიმართოთ პროკურატურას და დაინტერესდეთ ამ პროცესებით. მარტო დეპუტატს რატომ უსვამთ ასეთ კითხვებს?” _ გვითხრა მაშინ კვაჭანტირაძემ.

რა ხდება აღნიშნულ საქმესთან დაკავშირებით, დაიწყო თუ არა გამოძიება, დაიკითხა თუ არა ოზურგეთის გამგებელი და რამდენად სამართლიანად წარიმართება გამოძიება, ამ კითხვებზე “გურია ნიუსს” ოზურგეთის რაიონული პროკურორი კახა კოჩივარი პასუხობს.

_ ბატონო კახა, რა ხდება იმ საჩივართან დაკავშირებით, რომლითაც კოალიციის წევრებმა პროკურატურას მიმართეს? კონკრეტულად, 23 მარტს სტიქიით მიყენებული ზიანისთვის გამოყოფილი 450 000 ლარის შესახებ?

_ თანხა თქვენ თვითონვე დაასახელეთ. ამ საქმეზე სისხლის სამართლის საქმეზე გამოძიება დაწყებული არ არის _ მიმდინარეობს მხოლოდ წინასაგამოძიებო შემოწმება, ყველა საჭირო პირი იქნება გამოკითხული და ამის შემდეგ გადაწყდება სისხლის სამართლის საქმის აღძვრის ან არაღძვრის და გამოძიების დაწყების საკითხი.

_ ბატონო კახა, “გურია ნიუსმა” ასევე დაიწყო მოკვლევა აღნიშნულ თემაზე. ჩვენ საკუთარი თვალით ვნახეთ რამდენიმე სახლი თუ მრავლასართულიანი საცხოვრებელი კორპუსი, სადაც სამუშაოები ისე არ ჩატარებულა, როგორც გამგეობიდან გამოთხოვილ ოფიციალურ დოკუმენტებში ჩანს. ამის შესახებ “გურია ნიუსში” არაერთი სტატიაც გამოქვეყნდა, რეაგირება კი არ ჩანს. მაგალითად შეიძლება დაგისახელოთ გურამიშვილის #6-ში მდებარე სახლი, რომლის სახურავიც, მოსახლეობის განცხადებით, არ შეკეთებულა, თუმცა, ოფიციალურ დოკუმენტებში წერია, რომ შეკეთებულია.

_ რა თქმა უნდა, რეაგირება იქნება მედიასაშუალებაში გამოქვეყნებული სტატიაზე, თუ კი მასში იკვეთება დანაშაულის შემცველი ნიშნები. ჩვენ აღნიშნულ განცხადებასთან ერთობლიობაში, წინასაგამოძიებო შემოწმების დროს, განვიხილავთ ამ ყველა საკითხს ერთად და მივცემთ შესაბამის რეაგირებას. დიდი მოცულობის სამუშაოა ჩასატარებელი და ამიტომ, როგორც მოგახსენეთ, ვატარებთ წინასაგამოძიებო შემოწმებას, რომლის დროსაც იკითხებიან პიროვნებები. თუ კი დაფიქსირდება რაიმე უკანონობა, ფაქტს მიეცემა სათანადო რეაგირება. ამ ეტაპზე, გამგეობის ყველა შესრულებულ სამუშაოებზე ინიშნება შესაბამისი ექსპერტიზა, რომელსაც თვითონ გამგეობა ნიშნავს და იმ დასკვნებში მიღების შემდგომ, თუ კი იქნება რაიმე დარღვევა, მოვახდენთ სათანადო რეაგირებას.

_ რამდენად შეიძლება იყოს სამართლიანი გამგეობის მიერ დანიშნული ექსპერტიზა?

_ ექსპერტიზა სახელმწიფო დაწესებულებაა და ვალდებულია გასცეს ცნობა, როგორ და რამდენად კანონიერად გაიხარჯა სახელმწიფო თანხები.

_ იქნება თუ არა თქვენ მიერ ჩატარებული გამოძიება სამართლიანი?

_ მერწმუნეთ, რომ თუ კი იქნა გამოძიების დაწყების საფუძველი, გამოძიება წარიმართება სრულიად ობიექტურად და მიუკერძოებლად.

_ ბატონო კახა, რა ხდება 2012, 2011, 2010 წლებში გახორციელებული სოფლის პროექტებთან დაკავშირებით? არ დასრულდა გამოძიება?

_ მაგაზე მე ადრეც გავაკეთე კომენტარი. ამ საქმესთან დაკავშირებით გვქონდა დანიშნული შესაბამისი ექსპერტიზა, რომელმაც იმუშავა, შეამოწმა ყველა ობიექტი. ახლა ველოდებით შესაბამის დასკვნას. გამოძიება მიმდინარეობს და დასკვნის მიღების შემდგომ.

_ ბატონო კახა, როგორც ვიცით, კოალიციის წევრები დაიკითხნენ.

_ კი, გამოკითხული იქნა ყველა ის პირი, ვინც ამ განცხადებაში ფიგურირებს.

_ დაიკითხა თუ არა ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე?

_ წინასაგამოძიებო შემოწმებას ატარებს შსს გურიის სამხარეო სამმართველო და ამ კითხვით შეგიძლიათ, მას მიმართოთ.