თუ რაიმე გასარკვევი გაქვს, ილაპარაკე კაცურად _ ასე ჩასაფრებულმა როგორ უნდა მოკლა ადამიანი? მე ვიცი ერთი რამ _ ეს გააკეთეს შემსრულებლებმა, დამკვეთი არის სხვა. ჩემი ერთადერთი საფიქრალი ახლა ისაა, ვიცოცხლო ჩემი შვილის მკვლელობის დამკვეთის გამოსამზეურებლად, რათა საკადრისი პასუხი ვაგებინო გოჩას მკვლელობისთვის, _აცხადებს “გურია ნიუსთან” რამდენიმე დღის წინ საკუთარ სახლთან ჩაცხრილული გოჩა გუჯაბიძის მამა ვარდენ გუჯაბიძე.
5 აგვისტოს, ღამის თერთმეტ საათზე, ოზურგეთის მუნიციპალიტეტში მომხდარი მკვლელობის შესახებ ინფორმაციას ჯერ არავინ ფლობს. მოკლული გოჩა გუჯაბიძე, რამდენიმე თვეა, რაც ამნისტიით გათავისუფლდა და საკუთარ სახლთან დაუდგენელმა პირებმა ავტომატებით ჩაცხრილეს. ის პირველად მამამ, ვარდენ გუჯაბიძემ ნახა და, ფაქტობრივად, უკვე გარდაცვლილი, თავადვე მიიყვანა საავადმყოფოში. სხვა ინფორმაციას ამ ეტაპზე გარდაცვლილის ახლობლები არ ფლობენ.
“არ ვიცით, რა შეიძლებოდა გამხდარიყო ახალგაზრდა კაცის ასე გამეტების მიზეზი,” _ ამბობენ ოჯახის ახლობლები.
ოზურგეთის მუნიციპალიტეტის სოფელ გურიანთაში მცხოვრები გოჩა გუჯაბიძე ციხიდან ამნიისტით 14 თებერვალს გამოვიდა. გუჯაბიძის მამა ამბობს, რომ მის შვილს ავტომატის რამდენიმე ჯერი სახლთან გვიან ღამით დააცალეს.
_ ავტომატის ტყვიებითაა გადატენილი ყველაფერი. სახლში ვიყავი ამ დროს. მე რომ ეზოში გოჩას მანქანის შემოსვლა გამეგო, ყველაფერს ჩემი თვალით დავინახავდი, ცუდი ამინდი იყო და ამით ისარგებლეს. ვერ გავიგე მისი მოსვლა, გავიგე ჯერ სამი გასროლა, მერე ლამის ფანჯრები ჩამოიღო, მომენტალურად ავტომატის ისეთი ჯერი გაისმა. ახლობელს ბავშვი შეეძინა და იმის სანახავად იყო წასული. ეგენი კი ჩასაფრებულები ელოდნენ მის მოსვლას სახლში. გამოვვარდი სიბნელეში, მივხდი კარგად რომ არ იყო საქმე. _ გოჩა, გოჩა! _ განწირული ვყვიროდი. ვიფიქრე მანქანით გავეკიდები მკვლელებს,-მეთქი, მაგრამ როცა გოჩა მიწაზე დაგდებული დავინახე, იქნებ, გადავარჩინო,-მეთქი, ვიფიქრე. გული ფეთქავდა, მაგრამ საავადმყოფოში მისვლამდე ხელში ჩამაკვდა.
როცა “გურია ნიუსში” სტატია გამოქვეყნდა, გახსოვთ კარგად, ვამბობდი, როგორ დაიჭირეს ჩემი შვილი. მაშინ პროკურორმა საყვედური მითხრა, რატომ მიეცი ამ ყველაფერს პოლიტიკური სარჩულიო. ვუთხარი კიდეც პროკურორს _ ვთქვი, აქციაზე მივდივარ,-მეთქი და მეორე დღეს გოჩა დაიჭირეთ; 1 ოქტომბერს არჩევნებში აქტიურობისთვის მეუღლე და ოჯახი მიმყავდა მანქანით, დამიჭირეთ და მანქანა წამართვით და არ ჰქვია ამას პოლიტიკური,-მეთქი? ახლა რა ვთქვა, რას რა დავარქვა აღარ ვიცი, არავინ არაფერი არ იცის.
_ ხომ არ გაქვთ ეჭვი, ვის ან რატომ უნდა მოეკლა თქვენი შვილი?
_ მე მითხრეს ასეთი რამ _ როცა გოჩა ციხიდან გამოსულა, რომ თითქოს პოლიციის უფროსს უთქვამს, იცოდე, შენი ნებით დატოვე საქართველოო. მე ვუთხარი კიდეც ირაკლი შავიშვილს, რატომ უთხარი გოჩას,-მეთქი? ვიღაცას უშლიდა ჩემი შვილი ხელს. ვის _ ჯერ არ ვიცი, თუმცა, გპირდებით აუცილებლად ავხდი ფარდას ყველაფერს.
როგორც კი გოჩას დავასაფლავებთ, აუცილებლად ყველაფერს, მოგიყვებით. მე ჯერ არ მქონია გოჩას მეგობრებთან საუბარი, მათ ეცოდინებათ ამის შესახებ, იცოდეთ, რომ ამ საქმეს ასე არ დავტოვებ, _ გვითხრა ვარდენ გუკაბიძემ.
ჩვენ დავუკავშირდით შსს გურიის სამხარეო სამმართველოს ოზურგეთის რაიონული პოლიციის უფროსს ირაკლი შავიშვილს, რომელმაც გვითხრა, რომ ამ თემასთან დაკავშირებით ვერანაირ კომენტარს ვერ გააკეთებს; _ ვერანაირ კომენტარს ვერ გავაკეთებ, არ შემიძლია, _ გვითხრა შავიშვილმა.
