პარტიის რამდენიმე ლიდერი და მოძრაობა “თავისუფალი ზონის” წევრები, გორში, გუშინ, დაახლოებით საღამოს 9 საათისთვის ჩავიდნენ. აქცია, რომელსაც პარტიის 100-მდე აქტივისტი დაესწრო, ანთებული ჩირაღდნების და პარტიული ლიდერების მედიასთან გაკეთებული კომენტარებით შემოიფარგლა და დაახლოებით 1 საათში დასრულდა.
გორის ციხეზე მყოფმა დეპუტატმა ნუგზარ წიკლაურმა “გურია ნიუსს” უთხრა, რომ მსგავსი ღონისძიებები საზოგადოებისათვის 5 წლის წინ მომხდარი ტრაგედიის შეხსენებას ემსახურება.
“დღევანდელი შეკრება არის კიდევ ერთხელ სურვილი იმისა, რომ ქართველ საზოგადოებას გაახსენონ, თუ რა მოხდა 5 წლის წინ, კერძოდ როგორ დაესხნენ მეზობელი ქვეყნის შეიარაღებული ძალები საქართველოს და დღემდე ეს ტერიტორია არის ოკუპირებული. ვფიქრობ, დღევანდელი აქციის ორგანიზატორები მიზნად ისახავენ იმასაც, რომ ჩვენ გავიხსენოთ მსხვერპლი, რაც გავიღეთ ომის დროს და მე, პირადად, მიმაჩნია, რომ მანამ სანამ ჩვენს მიწებზე დგას დამპყრობელი ქვეყნის ჯარისკაცი, იმ ადამიანების საქმე, ვინც მაშინ ბრძოლის ველზე დაეცა, ჯერ არ არის გაკეთებული. მთელი ჩვენი საზოგადოება უნდა იყოს ყველანაირად აქტიური და გაახსენოს ერთმანეთს, რომ ჩვენი მიწა არის დაპყრობილი და აუცილებელია ქვეყნის გაერთიანება.”
აქციის მონაწილეები თბილისიდან გორში უფასო ავტობუსებით გადაიყვანეს და მასზე დასწრება ნებისმიერ მსურველს შეეძლო.
