ვიზიტის ფარგლებში დავით სერგეენკომ შეხვედრები გამართა ამერიკელ კონგრესმენებთან, ჯანდაცვის ეროვნული ინსტიტუტის (National Health Institute), კიბოს ეროვნული ინსტიტუტის (National Cancer Institute) და უნივერსიტეტების – ჯონ ჰოპკინსის, ემორის, დიუკისა და პიტსბურგის – სამედიცინო სკოლების ხელმძღვანელ პირებთან.
“გურია ნიუსი” დაინტერესდა რა კონკრეტული შედეგებით დაბრუნდა მინისტრი საქართველოში.
_ ბატონო დავით, ვიზიტის ფარგლებში განიხილეთ საქართველო–ამერიკის თანამშრომლობის საკითხები რამდენიმე კონკრეტული მიმართულებით, განსაკუთრებით კი იმ პრობლემებს შეეხეთ, რაც საქართველოში ონკოლოგიის მიმართულებას უკავშირდება, რაზე შეჯერდით ამერიკელ კოლეგებთან?
_ როგორც ონკოლოგიაში, ასევე სხვა მიმართულებებში, მთავარი პრობლემა ისაა, რომ არ არსებობს ხარისხის კონტროლისა და შეფასების სისტემა. ჩვენ ობიექტურად არც კი ვიცით არსებული სტატუსი კარგია თუ საჭიროებს გაუმჯობესებას. შესაბამისად, ლეიტმოტივი მთლიანად, როგორც იმ შეხვედრების რაც ამერიკაში გვქონდა, ასევე სამინისტროს მუშაობის, არის ამ სისტემების ობიექტური სურათის დანახვა. უნდა დავადგინოთ სად გვაქვს სისუსტეები და შემდეგ ვიზრუნოთ მის გამოსწორებაზე.
_ როგორც ვიცით, აშშ-ს კიბოს ეროვნული ინსტიტუტთან უკვე მიმდინარეობს კონსულტაციები საქართველოში ონკოლოგიის ეროვნული კონცეფციისა და დარგის განვითარების გეგმაზე სამუშაოდ, რაც ჩვენთვის ძალიან მნიშვნელოვანი პრობლემაა.
_ ეს სამდღიანი შეხვედრები, რომელიც ამერიკაში მქონდა, შეგვიძლია პირობითად სამ ბლოკად დავყოთ თემების მიხედვით. მთავარი ბლოკი იყო კონგრესმენებთან შეხვედრა. ორი კონგრესმენი, რომელსაც შევხვდი, განათლებით ექიმები იყვნენ და ჩემთვის ძალიან დიდი პატივი იყო მათთან ურთიერთობა. მათთან შეხვედრის მთავარი მიზანი იყო, რომ ჩვენი მხრიდან გაგვეკეთებინა პრეზენტაცია ქართულ ჯანდაცვაში არსებულ ვითარებაზე და მათთვის გვეთხოვა დახმარება. მათ ეს დახმარება აღგვითქვეს კონკრეტული მიმართულებებით როგორც ონკოლოგიაში, ასევე პირველად ჯანდაცვაში.
მეორე ბლოკი იყო წამყვან კვლევით ინსტიტუტებთან შეხვედრა, ისეთი, როგორიც არის “ამერიკის კიბოს ნაციონალური ინსტიტუტი”. მათთან, ტოპმენეჯმენტთან ყველაზე ხანგრძლივი შეხვედრა მქონდა, სადაც ჩემს ხელთ არსებული ინფორმაცია დაწვრილებით წარუდგინე. მოუყევი ჩემი შეხედულება, როგორ ვხედავდი ამ დარგის განვითარებას. აბსოლუტურ უმრავლესობაში დამეთანხმნენ და სამუშაო გეგმაზე შევჯერდით.
ამერიკის კიბოს ინსტიტუტი ჩამოაყალიბებს გუნდს, რომელთანაც ჩვენ შევათანხმებთ გარკვეულ სამუშაო გეგმას. მათი გუნდი ჩამოვა და უშუალოდ შეაფასებს აქ არსებულ ვითარებას არა იმ სტატისტიკური მონაცემებით, რომელიც არსებობს, არამედ ადგილზე გაეცნობიან სიტუაციას. შევლენ კლინიკებში, გაესაუბრებიან ექიმებს, პაციენტებს, რათა რეალური სურათი შეექმნათ ყველაფერზე.
მესამე ბლოკი იყო წამყვან საუნივერსიტეტო კლინიკების ხელმძღვანელებთან შეხვედრა. ეს არის ჯონ ჰოპკინსი რომელიც ამერიკული კლინიკების რეიტინგში არავის უთმობს პირველ ადგილს და შეხვედრა გვქონდა ასევე “პიტსბურგის” საუნივერსიტეტო კლინიკის ხელმძღვანელობასთან. მასთან საუბარი გვქონდა საავადმყოფოს მართვის გუნდის ჩამოყალიბებასა და მომზადებაზე. რაც არ უნდა იმუშაოს გუნდმა, თუ მმართველი გუნდი არ ჰყავს სათავეში კარგად მომზადებული, ყველაფერი წყალშია ჩაყრილი. ეს იყო ის ძირითადი საკითხები, რაზედაც ამერიკაში ვიზიტის დროს ვისაუბრეთ.
